Read Quechua Cuzco Bible 1988 1 TIMOTEO 2 Bible Online

1 TIMOTEO 2 - Quechua Cuzco Bible 1988 bible

1 TIMOTEO 2

¹Ñawpaqtaqa kaytan yuyaychayki: llapa runapaq Diosmanta mañapuychis, valekuychis, rogakuychis, Diosman graciasta qoychis.

²Mañapullaychistaq reykunapaqpas, llapa kamachikuqkunapaqpas, allin kawsaypi, sumaq kawsaypi kawsakunanchispaq, Diosman sonqollisqa, lliwpipas paypa sonqonman chayaqta ruwaspa.

³Qespichiqninchis Diospa qayllanpi chay hina mañakuyqa allinmi, paypa sonqonman chayaqtaq kanpas.

⁴Payqa munanmi llapa runa qespichisqa kananta, cheqaq-kayta reqsinankutapas.

⁵Diosqa ch'ullallan, hinallataqmi Diostawan runakunatawan allipunachiqpas ch'ullalla, paymi Jesucristo runaqa.

⁶Jesucristoqa pay kikinmi wañuyman hap'iykachikurqan, llapa runa huchankumanta kacharichisqa kanankupaq, chaywanmi Diosqa yuyaykusqanta tiemponpipuni sut'inchan.

⁷Chaypaqmi ñoqaqa churasqa karqani, willaq kanaypaq apóstol*f** kanaypaqwan, hinaspa iñiymanta cheqaq-kaymantawan mana Judío runakunaman yachachinaypaq. Cheqaqtan rimani, manan llullakunichu.

⁸Chayraykun munani hinantinpi llapa runakuna ama phiñakuspa, ama churanakuspa, ch'uya sonqowan makinta hoqarispa Diosmanta mañakunankuta.

⁹Hinallataq munani warmikunapas iman p'achakunata hinalla p'achakunankuta allinta hap'iq p'achawan, mana qoriwanpas, perlakunawanpas, ancha valorniyoq p'achawanpas churakunankuta, manallataq chukchankutapas k'achanchakunankuta,

¹⁰aswanpas munanin allinkunata ruwaspa Diosta yupaychaq warmikuna hinapuni kawsanankuta.

¹¹Iñiq t'aqa huñukuypi warmiqa ch'inlla yachaqakuchun, tukuy imapi kasukuspa.

¹²Warmitaqa manan yachachinanta munanichu, manallataq qharita kamachinantapas, aswanpas ch'inlla kanantan munani.

¹³Diosqa Adantan ñawpaqta ruwarqan, chaymantañan Evataqa.

¹⁴Manataqmi Adanchu q'otusqa karqan, aswanpas Evan q'otuchikuspa huchallikurqan.

¹⁵Ichaqa wawakunata wachakuspan iñiypi, munakuypi, ch'uya-kaypi, allin yuyaypi qaqata sayaspa qespichisqa kanqa.