Read Quechua Cuzco Bible 1988 1 TIMOTEO 3 Bible Online

1 TIMOTEO 3 - Quechua Cuzco Bible 1988 bible

1 TIMOTEO 3

¹Kay rimayqa cheqaqmi: Pipas umalli kaytapuni munan chayqa, allin llank'aytan akllakun.

²Chaymi umalliqa kay hina kanan: mana huchachana, ch'ulla warmiq qosallan, pay kikinta allin cuidakuq, allin yuyaywan puriq, respetanapaq hina kawsaq, qorpachaqllapuni, yachachinanpaqpas allin wakichisqa.

³Paymi kanan mana machaq, mana saltaq sonqo, aswanpas llamp'u sonqo, piwanpas mana churanakuq, qolqeman mana k'askakuq.

⁴Paymi kanan wasinpi kaqkunata allinta kamachiq, wawankunatapas kasukuqta, respetakuqta yachachiq.

⁵Wasinpi kaqkunata mana kamachiyta yachaqqa, ¿imaynatan Diospa iñiq t'aqanta qhawanman?

⁶Umalliqa ama chayllaraq iñiqchu kachun, paqtan sinchita hatunchakuspa saqra hina huchachasqa kanman.

⁷Diospi mana iñiq runakunaqpas allinpaq hap'isqanmi kanan, ama p'enqaymanpas saqraq toqllanmanpas urmaykunanpaq.

⁸Chay hinallataqmi yanapakuq qharikunapas respetana runakuna kananku, rimasqanku hunt'aqkuna, mana machaqkuna, qolqellata tariyta mana munaqkuna.

⁹Paykunan ch'uya concienciawan k'askakunanku iñiymanta sut'inchasqa yachachikuyman.

¹⁰Chay runakunaq kawsaynintaqa ñawpaqtaraqmi allinta qhawankichis, chaymantañan mana huchachana hina kaqtinku yanapakuq kanankupaq churankichis.

¹¹Hinallataq warminkupas[1] respetana warmikuna kananku, ama simi apachu, pay kikinta allin cuidakuq, tukuy imapipas hunt'aq.

¹²Yanapakuqkunaqa ch'ulla warmiq qosallanmi kananku, wawankutapas wasinkupi kaqkunatapas allintan kamachinanku.

¹³Allinta llank'aq yanapakuqkunaqa sut'i reqsisqan kanqaku, Jesucristopi iñisqankuta willakuytapas manan manchakunqakuchu.

¹⁴Usqhayllan qanwan tupaykuyta munashani, ichaqa paqtan manapas usqhamuymanchu, chaymi kay cartata qelqamuyki imaynatachus Diospi iñiqkuna ukhupi purinanchista yachanaykipaq, chaykunan kawsaq Diospa iñiq t'aqan. Chay iñiq t'aqan Diosmanta cheqaq-kayta takyachinpas waqaychanpas.

¹⁶Diospi iñiymanta sut'inchawasqanchis may hatunpuni kasqantaqa lliwmi yachanku: Criston runa cuerpoyoq rikuchikurqan, Santo Espiritun chanin kasqanta sut'incharqan, angelkunaq rikusqanmi karqan, hatun suyukunaman willasqan karqan, kay pacha runakunan paypi iñirqan, hanaq pachaman hoqarisqan karqan.