Read Quechua Cuzco Bible 1988 1 TIMOTEO 4 Bible Online

1 TIMOTEO 4 - Quechua Cuzco Bible 1988 bible

1 TIMOTEO 4

¹Santo Espirituqa sut'itapunin nin: Qhepa tiempopin cheqaq iñiymanta wakin t'aqakapunqaku, pantachiq espiritukunata, supaykunaq yachachikuynintawan uyarispanku.

²Chay yachachikuytan iskay uya llulla runakuna yachachinku, paykunaqa fierro pariwan ruphachisqa hina mana sienteq concienciayoqmi kanku, nispa.

³Chay runakunaqa hark'akunmi casarakunatapas wakin mikhuyta mikhunatapas. Diosmi chay mikhunakunataqa kamarqan cheqaq-kayta reqsiq iñiqkuna graciasta qospa mikhunankupaq.

⁴Diospa tukuy imaymana kamasqanqa allinmi, Diosman graciasta qospa mikhunchis chayqa manan imapas wikch'unapaq hinaqa kanchu.

⁵Diospa siminmi graciasta qospa mañakuypiwan chay mikhunakunataqa ch'uyanchapun.

⁶Chaykunatachus wawqe-panakunaman yachachinki chayqa, Jesucristoq allin kamachinmi kanki, hinaspa paypi iñiymanta cheqaq simikunawan kasukushasqayki allin yachachikuywan kallpachakunki.

⁷Ama uyariychu Dios contra thawtiykunata mana valeq cuentokunatapas, aswanpas Dios sonqo kawsanaykipaq yachaqashallaypuni.

⁸Ejercicio ruwayqa asllatan yanapawanchis, Dios sonqo kawsaymi ichaqa tukuy imapaq allin, kunan kawsaypipas hamuq kawsaypipas allinninchispaq kasqanrayku.

⁹Kay rimayqa cheqaqmi, chayraykun llapa runapas iñinanpuni:

¹⁰Kawsaq Diosmanmi hap'ipakunchis, payqa tukuy runakunaq qespichiqninmi, astawanqa paypi iñiqkunapaq. Chayraykun sinchita llank'aspa sayk'uyta muchunchis.

¹¹Chaykunata kamachiy, hinaspa yachachiy.

¹²Ama pipas wayna kasqaykita pisichachunchu, aswanpas qanqa iñiyniyoqkunaq yachaqakunan hinapuni kay rimayniykipi, puriyniykipi, munakuyniykipi, iñiyniykipi, ch'uya kawsayniykipiwan.

¹³Hamunaykamaqa iñiqkunaman Diospa Simin Qelqakunata leeshallaypuni, wawqe-panakunatapas kallpachashallaypuni yachachishallaypuni.

¹⁴Ama qonqaychu Diospa qosqasuyki qokuyta, chaytan chaskirqanki iñiq t'aqapi profetakuna*f** rimaqtinku, uma runakuna qan pataman makinkuta churaykuqtinku.

¹⁵Chaykunataqa makillapuni ruway, chaykunaman k'askakuy, ahinapin iñiypi wiñasqaykita lliwpas sut'ita rikunqaku.

¹⁶Qan kikiykita allinta qhawakuy, hinallataq yachachikuyniykitapas, chaykunapi qaqata sayay. Chayta ruwaspaqa qan kikiykitan qespichikunki, hinallataq uyariqniykikunatapas.