Read Quechua Cuzco Bible 1988 1 TIMOTEO 5 Bible Online

1 TIMOTEO 5 - Quechua Cuzco Bible 1988 bible

1 TIMOTEO 5

¹Kurak runataqa ama k'amiychu, aswanpas taytaykita hina yuyaychaykuy. Waynakunatapas wawqeykikunata hina rikuy,

²kurak warmikunatapas mamaykita hina rikuy, sipaskunatapas tukuy ch'uya-kaywan panaykikunata hina rikuy.

³Cheqaqpuni mana piniyoq viudakunataqa yanapaykuy.

⁴Ichaqa pi viudapas wawakunayoq nietokunayoq kan chayqa, paykunan ñawpaqtaqa Diospi iñiq hina familiankuta yanapaykunanku, ahinapin tayta-mamankumanpas uywasqankumanta kutichinanku, Diospas chaytapunin munan.

⁵Cheqaqpuni mana piniyoq viudaqa Diospin suyakun, mana p'itiyta mañakuspan tuta p'unchay rogakun.

⁶Aycha kusichiyllapi puriq viudan ichaqa wañusqa hina kashan.

⁷Chaykunata hunt'anankupaq kamachiy ama piwanpas anyachikunankupaq.

⁸Pipas ayllunta mana yuyarinchu, aswantaqa familianta mana uywanchu chayqa, cheqaq iñiymantan t'aqakapun, hinaspan mana iñiyniyoq runamantapas aswan mana allinraq kapun.

⁹Viudakuna qelqana libropiqa soqta chunka kurak watayoq, ch'ulla qosaq warmin kaq viudakunallan qelqasqa kananku.

¹⁰Allin ruwasqankunapi reqsisqa kachun: wawakunata allin uywaq, qorpachayta allin yachaq, iñiq-masinkunata huch'uyyaykukuywan serviq, llakisqakunata sonqochaykuq, tukuy allin ruwaykunata hunt'aq.

¹¹Sipas viudakunata ichaqa amaraq libropi qelqaychu. Paqtan cuerponkuwan atipachikuspa wakmanta casarakuyta munankuman, hinaspa Cristomanta karunchakunkuman.

¹²Ahinapin prometekusqankuta p'akispa huchachasqa kankuman.

¹³Hinallataq wasin-wasinta purispa qella yachankuman, manan qellallapaschu aswanpas simi apa-kaytan yachankuman, tukuy imaymanaman chapukuspa mana rimanakunata rimankuman.

¹⁴Chayraykun sipas viudakunataqa casarakunankuta munani, wawakunayoq kanankuta, wasinkupi kaqkunata qhawanankuta ima, ahinapi awqanchis ama huchachawananchispaq.

¹⁵Wakin viudakunaqa t'aqarikapuspankun Satanaspa qhepanta ripushanku.

¹⁶Mayqen iñiq warmiqpas[2] ayllunpi viudakuna kan chayqa, yanapananmi chay viudakunata, manataqmi iñiq t'aqaq uywananpaqchu saqerparinan, ahinapin iñiq t'aqaqa cheqaqpuni mana piniyoq viudakunallata uywanqa.

¹⁷Iñiq t'aqapi allinta kamachiq uma runakunaqa allin pagasqapunin kananku, astawanqa Diospa siminta willaq yachachiq runakuna.

¹⁸Diospa Simin Qelqan nin: Erata saruq torotaqa aman senq'apankichu, nispa. Qelqaqa nillantaqmi: Llank'aqmanqa llank'asqanmanta paganapunin, nispa.

¹⁹Uma runata huchachaqtinkuqa iskaypas kinsapas testigo kallaqtinmi uyarinki.

²⁰Huchallapipuni kashaq uma runakunataqa llapa iñiqkunaq qayllanpi anyay, chay hinapin wakinkunapas manchakunqaku.

²¹Diospa qayllanpi, Señor Jesucristoq qayllanpi, akllakusqan angelkunaq qayllanpiwanmi kamachiyki, ama pimanpas sayapakuspa, ama ñawpaqmanta yuyaykusqaykiman hina ruwaspa chaykunata hunt'anaykipaq.

²²Ama pimanpas usqhaylla makiykita churaspa akllaychu iñiq t'aqapi llank'ananpaq, paqtan huchalliysikuq-masin rikhuriwaq. Qanqa ch'uyatapuni kawsay.

²³Amaña unullataqa ukyaychu, aswanpas wiksa nanayniyki hawa, sapa kuti onqosqayki hawapiwan huk chhikan vinota ukyakuy.

²⁴Wakin runaq huchankunaqa manaraq juzgasqa kashaqtinmi sut'inchakapunña, wakin runaq huchantaq ichaqa qhepataña rikhurin.

²⁵Chay hinallataqmi allin ruwasqakunapas sut'ipuni rikhurin, mana sut'i rikhuriq allin ruwasqakunapas manataqmi pakasqallaqa qhepakunmanchu.