Read Quechua Cuzco Bible 1988 1 TIMOTEO 6 Bible Online

1 TIMOTEO 6 - Quechua Cuzco Bible 1988 bible

1 TIMOTEO 6

¹Llank'aq kamachikunaqa tukuy imapipas allintapuni patronninkuta respetachunku, Diospa sutinpas yachachikuynin chispas ama pisichasqa kananpaq.

²Wakin kamachikunaq patronnin iñiq kaqtinqa, ama iñiq kasqanraykuchu chay kamachikuna pisichachunku. Paykunaqa munasqa iñiq wawqepaqmi llank'anku, chayraykun aswan allintapuni llank'ananku. Chaykunata yachachiypas kamachiypas.

³Pipas q'ewisqa yachachikuyta yachachin, manataq Señorninchis Jesucristoq cheqaq siminkunatapas cheqaq yachachikuyninchistapas kasukunchu chayqa,

⁴pay kikinta hatunchakuqmi, manataq imatapas yachanchu. Chay hina runaqa wañunraqmi tapunakuymanta, churanakuymantapas. Chaykunamantataqmi paqarimun envidiakuykuna, ch'aqwaykuna, k'amikuykuna, millay watupakuykuna,

⁵waqllisqa yuyayniyoq runakunawan mana tukukuq thawtiykuna. Chay hina runakunaqa manapunin cheqaq-kayta reqsinchu, Dios yupaychaytapas astawan qolqeta tarinapaq kasqallantan yuyanku[3].

⁶Pipas imachus kapuqninwan sonqopas-sonqo kan chayqa, paypaqqa hatun qhapaq-kayta tariy hinan Dios yupaychayqa.

⁷Kay pachamanqa manan imatapas apamurqanchischu, manallataqmi imatapas apasunchischu.

⁸Chayrayku, mikhunanchispaqpas p'achakunanchispaqpas kashaqtinqa, chaykunawanmi sonqopas-sonqo kashananchis.

⁹Qhapaqyayta munaq runakunan ichaqa wateqayta mana atipaspa, toqllaman hina urmaykunku, hinaspan mana valeq waqllichiq munapayaypi rikukapunku, chaykunawanmi chinkayman ñak'ariyman urmaykapunku.

¹⁰Qolqe sonqo-kaymi tukuy mana allinkunata paqarichiqqa, chaymi wakinkunapas chayta munapakuspanku iñiyta saqepurqanku, hinaspa imaymana llakikunapi rikukurqanku.

¹¹Qan ichaqa, Dios sonqo runa, tukuy chaykunamanta t'aqakuy, hinaspa sayay chanin kawsaypi, Dios sonqo-kaypi, iñiypi, munakuypi, pacienciayoq-kaypi, llamp'u sonqoyoq-kaypi ima.

¹²Allinta maqanakushaq hina iñiypi kallpachakuy, wiñay kawsayman hap'ipakuy, chaymanmi Diosqa waqyarqasunki askha testigokunaq qayllanpi ancha sut'itapuni iñiyniykita rimariqtiyki.

¹³Chhaynaqa, tukuy imaymanata kawsachiq Diospa ñawpaqenpi, Poncio Pilatoq ñawpaqenpi allin sut'ita rimariq Jesucristoq ñawpaqenpi ima, kamachiyki:

¹⁴mana pantaspa kamachisqayta allintapuni kasukuy Señorninchis Jesucristoq kutimunankama.

¹⁵Chaytan Diosqa tiempon chayamuqtin rikhurichimunqa. Payqa yupaychasqa Kamachikuqmi, sapallan Diosmi, reykunaq Reynin, señorkunaqpas Señornin.

¹⁶Pay sapallanmi mana wañuqqa, mana chimpaykuy atina k'anchaypi tiyaqqa. Paytaqa manan pi runapas rikurqanchu, manataqmi rikuytapas atinmanchu. ¡Payllapuni tukuy atiyniyoq kachun! ¡Payllapuni wiñay-wiñaypaq yupaychasqa kachun! Ahinapuni kachun.

¹⁷Kay pachapi qhapaqkunata kamachiy ama hatunchakuq kanankupaq, amataq qhapaq-kaykunamanpas k'askakunankupaq, aswanpas kawsaq Diosman hap'ipakunankupaq. Qhapaq-kaykunaqa tukurqokuqllan. Payllan kusikunanchispaq tukuy imaymanata askhatapuni qowanchis.

¹⁸Allinkaqta ruwanankupaq kamachiy, allinkunata ruwaspa t'ikarichunku, hinallataq mana mich'akuspa qoykukuq yanapaykukuq kachunku.

¹⁹Ahinapin hamuq tiempopaq allin taqesqa hina, allin takyachisqa hina, tukuy imaymanankupas kanqa, hinaspan cheqaq wiñay kawsayta aypanqaku.

²⁰Timoteo, imatachus Dios yachachirqasunki chayta waqaychay. Ama uyariqpas tukuychu Dios contra thawtiykunataqa, “yachay” nispa sutichasqa yanqa churanakuykunatapas.

²¹Chay hina yachachikuykunata qatikuspankun wakinkunapas cheqaq iñiymanta t'aqakapunku. Diosninchismi sumaqta qhawarisunkichis.