Read Quechua Cuzco Bible 1988 2 TIMOTEO 1 Bible Online

2 TIMOTEO 1 - Quechua Cuzco Bible 1988 bible

2 TIMOTEO 1

¹Ñoqa Pablon Jesucristoq apostolnin*f** kani, Diospa munayninman hina, Jesucristopi prometesqa kawsayta willanaypaq.

²Munasqa churíy Timoteo, Dios Yayan, Señorninchis Jesucristopiwan sumaqta qhawarisunki, khuyapayasunki, thak-kaynintapas qosunki.

³Diosmanmi graciasta qoni, tuta p'unchay mañakuspan yuyarikullaykipuni. Diostan ch'uya sonqowan servini, imaynan machulaykuna servirqan hinata.

⁴Waqasqaykita yuyarispaymi maytapuni qanta rikuykuyta munayki anchata kusikunaypaq.

⁵Yachanin cheqaqtapuni Diospi iñisqaykita. Ñawpaqtaqa hatun mamayki Loidawan mamayki Eunicepiwanmi chay hina iñiyniyoq karqanku, allintan yachani qanpas chay hina iñiynillayoqtaq kasqaykita.

⁶Makiykunata qanman churaykuqtiymi Diosqa qokuyta qorqasunki, chaymi yuyarichiyki chay qokuyta ninata hina sansarichinaykipaq.

⁷Diospa qowasqanchis Santo Espirituqa manan manchalitachu ruwawanchis, aswanmi atiyta, munakuyta, kikinchista cuidakuytawan qowanchis.

⁸Chay hinaqa, ama p'enqakuychu Señorninchismanta willakuytaqa, amallataq ñoqa presomantapas p'enqakuychu, aswanpas Cristomanta allin willakuykunarayku ñoqa hina ñak'ariy, Diospa kallpachasqasuykiman hina.

⁹Paymi qespichiwarqanchis, hinaspan payllapaqña kawsananchispaq waqyawarqanchis, ichaqa manan allin ruwasqanchisraykuchu, aswanpas paypa yuyaykusqanman hina khuyapayawasqanchisman hinan. Chay hinatan Diosqa Jesucristopi khuyapayawarqanchis manaraq kay pachapas qallarishaqtin.

¹⁰Kunanmi ichaqa qespichiqninchis Jesucristoq hamusqanwan chay khuyapayakuyninta rikuchiwanchis, paymi wañuyta atipanña, hinaspa allin willakuykunawan sut'ita rikuchirqan mana hayk'aq tukukuq wiñay-wiñay kawsayta.

¹¹Diosmi ñoqata apostolnin*f** kanaypaq churawarqan allin willakuyninkunata willanaypaq yachachinaypaqwan.

¹²Chayraykun ñak'ariykunata muchushani, ichaqa manan p'enqakunichu, ñoqaqa Jesucristota reqsinin, paypin iñini, allintataq yachanipas paypa qowasqanta[1] taripay p'unchaykama waqaychananpaq atiyniyoq kasqanta.

¹³Ñoqamanta uyarisqayki cheqaq yachachikuykunata hap'ispa, chayman hina yachachiy hinaspa Jesucristowan hukllachasqa kaspa iñiywan munakuywan kawsay.

¹⁴Diospa hap'ichisqasuyki allin yachachikuyta waqaychay, ñoqanchispi tiyaq Santo Espirituq yanapayninwan.

¹⁵Imaynan yachankiña hina, Asia provinciapi kaqkunaqa llapankun saqerpariwanku, paykuna ukhupin kanku Figelowan Hermogeneswan.

¹⁶Onesiforoq wasinpi kaqkunata Señor khuyapayachun, payqa askha kutipin kallpachaykuwarqan, manataq preso kasqaymantapas p'enqakurqanchu,

¹⁷aswanmi Roma llaqtaman chayamuspa hina tukuy sonqo maskhawarqan tarinawankama.

¹⁸Señorninchis taripay p'unchaypi payta khuyapayachun. Qanmi allinta yachanki Efeso llaqtapipas anchatapuni yanapakusqanta.