Read Quechua Cuzco Bible 1988 2 TIMOTEO 4 Bible Online

2 TIMOTEO 4 - Quechua Cuzco Bible 1988 bible

2 TIMOTEO 4

¹Jesucriston hamunqa kamachikunanpaq, wañuqkunatapas kawsaqkunatapas juzgananpaqwan, chaymi paypa qayllanpi Diospa qayllanpiwan tukuy sonqo kamachiyki:

²Diospa siminta willay, atikuqtinpas mana atikuqtinpas willallaypuni. Hinallataq tukuy pacienciawan yachachispa uyanchay, anyaykuy, kunaykuy.

³Hamuq tiempo chayamuqtinmi cheqaq yachachikuyta mana uyariytapas munanqakuñachu, aswanmi yanqa uyariyllata munaq kaspanku paykunaqa munayninkuman hina askha yachachiqkunata huñunqaku,

⁴hinaspan cheqaq-kayta mana uyariyta munaspa cuentokunata uyarinqaku.

⁵Qan ichaqa tukuy imapipas allin yuyayniyoqpuni kay, ñak'ariykunata muchuy, Jesucristomanta allin willakuykunata willay, Diospa qosqan llank'anaykita allinta hunt'ay.

⁶Ñoqaqa sacrificasqa kanaypaqñan kashani, ripunay p'unchaypas qayllamushanñan.

⁷Allin maqanakuytan maqanakuniña, llank'anaytan tukuniña, iñiyniypin qaqata sayarqani.

⁸Kunanqa chanin kawsasqaymantan hanaq pachapi corona suyashawan, chaytan chanin Juez Señorqa taripay p'unchay qowanqa, manataq ñoqallamanchu, aswanpas paypa kutimunanta makillaña llapa suyaqkunamanpas qollanqataqmi.

⁹Imaynamantapas usqhayllapuni watuykakamuway.

¹⁰Demasqa kay pacha kaqkunata munakuspanmi saqerpariwan, hinaspan Tesalónica llaqtata ripun. Hinallataq Crescentepas Galacia provinciata ripun, Titotaq Dalmacia provinciata ripun.

¹¹Lucasllan ñoqawan kashan. Marcosta maskhamuspa pusamuway, payqa kusatan llank'anapi yanapakunman.

¹²Tiquicotaqa Efeso llaqtatan kachani.

¹³Hamuspaykiqa Troas llaqtapi Carpoq wasinpi saqemusqay ponchoyta apamuwanki, hinallataq qelqa k'uyukunatapas, astawanqa qarapi qelqasqakunata.

¹⁴Herrero Alejandron imaymana mana allinkunata ruwaykuwarqan, Señormi ruwasqanman hina kutichipunqa.

¹⁵Qanpas chay runamanta cuidakuy, payqa sinchitapunin willasqanchis contra sayarirqan.

¹⁶Ñawpaqkaq kutipi kamachikuqkunaq ñawpaqenpi tupapakushaqtiyqa manan pipas ñoqawan karqanchu, llapallankun saqerpariwarqanku. Suyakushanin amapuni paykunata Diospa huchachananta.

¹⁷Chaywanpas Señormi ñoqawan kasharqan, hinaspa kallpachawarqan, chaymi hunt'asqata allin willakuykunata willarqani llapa mana Judío runakunaq uyarinanpaq. Ahinapin leonpa siminmanta hina qespichisqa karqani.

¹⁸Señormi tukuy mana allinkunamanta qespichiwanqa, hinaspa hanaq pacha kamachikuyninpi kanaypaq waqaychawanqa. Wiñay-wiñaypaq Señorqa hatunchasqa kachun. Ahinapuni kachun.

¹⁹Priscata Aquilatawan napaykapuway, Onesiforoq wasinpi kaqkunatawan.

²⁰Erastoqa Corinto llaqtapin qhepakamurqan, Trofimotataq Mileto llaqtapi onqosqata saqemurqani.

²¹Manaraq para tiempo chayamushaqtin hamuypuni imaynallamantapas. Napaykamusunkin Eubulo, Pudente, Lino, Claudia, llapan wawqe-panakunapiwan. Señor Jesucristo qanwan kachun, Diosninchis llapaykichista sumaqta qhawarisunkichis.