Read Quechua Cuzco Bible 1988 TITO 1 Bible Online

TITO 1 - Quechua Cuzco Bible 1988 bible

TITO 1

¹Ñoqa Pablon Diospa kamachin kani, Jesucristoq apostolnin*f**. Paymi kachawarqan Diospa akllakusqankunata iñiyninkupi wiñachinaypaq, Diosta tukuy sonqo yupaychanaman hina cheqaq-kayta reqsichinaypaq.

²Ahinapin paykunaqa wiñay kawsayta suyakunqaku. Chay kawsaytan mana llullakuq Diosqa prometerqan, manaraq kay pachapas kamasqa kashaqtin,

³hinaspan tiemponpi siminta reqsichirqan allin willakuykunata willaqtiy. Chaykunatan Qespichiqninchis Diosqa confiawaspa willanaypaq kamachiwarqan.

⁴Kay cartatan qelqamuyki iñiqmasiy cheqaq churíy Tito. Dios Yayanchis Señorninchis Jesucristopiwan sumaqta qhawarisunki, thak-kaytapas qosunki.

⁵Creta islapiqa saqerqayki ruwanaraq kashaqta tukupanaykipaqmi, hinaspa sapanka llaqta iñiq t'aqapi uma runakunata churanaykipaq, imaynan nirqaykiña hinata.

⁶Uma runaqa mana huchachanan kanan, ch'ulla warmiq qosallan, hinallataq wawankunapas Jesucristopi iñiq kananku, amataq millay puriymantapas mana kasukuq k'ullu kaymantapas qhawasqachu kananku.

⁷Umalliqa mana huchachanan kanan, Diospa mayordomon kasqanrayku. Paymi kanan mana anchaykachaq, mana saltaq sonqo, mana machaq, mana maqanakuq, qolqellata tariyta mana munaq ima.

⁸Aswanpas payqa kanan qorpachaqllapuni, allinkaq ruwayta munaq, allin yuyaywan puriq, chaninta kawsaq, Diosllapaqña kawsaq, pay kikinta kamachikuq.

⁹Payqa yachaqasqan cheqaq simitan hap'ikunan, ahinapin cheqaq yachachikuyta yachachispa hukkunata kallpachanqa, kutipakuqkunatapas upallachinqa.

¹⁰Askhan kanku mana kasukuq k'ullu runakuna, paykunan yanqa rimaspa q'otukuqkuna kanku, chaykunamanta astawanqa wakin iñiq Judío runakunan kanku.

¹¹Chay runakunataqa upallachinapunin, paykunaqa mana yachachinata yachachispan familiakunata llapanta waqllichinku, qolqeta ganayta munaspalla.

¹²Kikin Creta islamanta paykunaq profetallantaqmi*f** nirqan: Creta runakunaqa hina llullapunin kanku, millay salqa animalkuna hina, rakrapukuna, qellakuna ima, nispa.

¹³Chay nisqanqa cheqaqpunin, chayrayku paykunataqa k'arakta anyay, iñiyninkupi allin kanankupaq,

¹⁴Judío runakunaq yanqa willakuyninkunatapas ama kasunankupaq, cheqaq-kaymanta t'aqakuq runakunaq kamachisqankutapas ama kasunankupaqwan.

¹⁵Ch'uya kaqkunapaqqa tukuy imapas ch'uyallataqmi, huchawan qhellichasqakunapaq mana iñiqkunapaqmi ichaqa mana imapas ch'uya kanchu, yuyayninkupas concienciankupas huchawan qhellichasqa kasqanrayku.

¹⁶Paykunaqa “Diosta reqsiyku” ninkun, ichaqa ruwayninkuwanmi Diosta neganku. Paykunaqa Diospa millakusqan, mana kasukuq k'ullun kanku, manapunin ima allin ruwaytapas atinkuchu.