Read Quechua Cuzco Bible 1988 TITO 2 Bible Online

TITO 2 - Quechua Cuzco Bible 1988 bible

TITO 2

¹Qan ichaqa, cheqaq yachachikuyman hina yachachiy.

²Kurak runakunata yachachiy kikinkuta allinta cuidakunankupaq, respetanapaq hina kawsanankupaq, allin yuyaywan purinankupaq, hinallataq yachachiy iñiypi, munakuypi, pacienciapipas allin kanankupaq.

³Kurak warmikunatapas yachachillaytaq Diospaq t'aqasqa hinapuni kawsanankupaq, ama yanqa-qasi tumpaq kanankupaq, ama machaq kanankupaq, aswanpas allinkaqta yachachiq kanankupaq.

⁴Ahinapin yachachinqaku sipas warmikunata qosanku munakuyta, wawanku munakuyta,

⁵allin yuyaywan puriyta, ch'uya kawsayniyoq-kayta, wasinkupi imapas ruwakuyta, sumaq sonqo kayta, qosankumanpas kasukuyta, chhaynapi ama pipas Diospa simin contra rimananpaq.

⁶Waynakunatapas yuyaychay kikinkuta allin cuidakuq kanankupaq.

⁷Tukuy imapi qan kikiyki allin kawsayniykita rikuchiy. Yachachispaykiqa tukuy sonqowan respetanapaq hina yachachiy,

⁸rimasqaykiqa mana huchachana cheqaqpuni kachun. Ahinapin qan contra sayariqkunapas p'enqakunqaku, manataq ima mana allintapas ñoqanchismanta rimanqakuchu.

⁹Kamachi runakunata yachachiy patronninkuta tukuy imapi kasukunankupaq, kusichiq kanankupaq, ama kutipakuqchu kanankupaqwan.

¹⁰Ama imatapas suwakuchunkuchu, aswanpas tukuy imapipas hunt'aqpuni kachunku. Qespichiqninchis Diosmanta yachachikuyqa tukuypi sumaqpuni kasqanta rikuchinankupaq.

¹¹Diosmi hatun munakuyninta rikuchiwarqanchis, llapa runa qespichisqa kanankupaq.

¹²Chay munakuyninmi yachachiwanchis Diospa mana munasqan kaqkunatapas, kay pachaq kaqninkunata sinchita munaytapas wikch'upuyta, hinaspa allin yuyaywan purispa, chaninta kawsaspa, Diosta manchakuspa kay pachapi kawsananchispaq.

¹³Chay hinata kawsashaspaqa kusisamiyoq suyakuyninchis hunt'akunantan suyashanchis. Chay suyakuyninchisqa Jesucristoq lliphlli-kayninpi hamuyninmi. Paymi hatun Diosninchispas Qespichiqninchispas,

¹⁴paymi ñoqanchisrayku wañuyman entregaykukurqan tukuy mana allin ruwaykunamanta kacharichinawanchispaq, hinaspa huchamanta ch'uyanchasqan kaspa paypaq kananchispaq, allin kaqkunata tukuy sonqo ruwananchispaq.

¹⁵Chaykunatan yachachinayki, tukuy atiywan anyaspa kallpachaspa ima. Amataq qantaqa pipas pisichachunchu.