Read Quechua Cuzco Bible 1988 TITO 3 Bible Online

TITO 3 - Quechua Cuzco Bible 1988 bible

TITO 3

¹Wawqe-panakunata yuyarichiy suyu kamachiqkunatapas llaqta kamachiqkunatapas kasukunankupaq. Paykunaqa kasukuq kachunku, tukuy ima allinkaqkunatapas usqhaylla ruwayta munachunku.

²Ama pimantapas mana allinta rimachunkuchu, amataq churanakuchunkupaschu, aswanpas lliw runakunaman tukuy llamp'u-kayta rikuchispa sumaq sonqo kachunku.

³Ñoqanchispas manaraq iñishaspaqa mana yuyayniyoqmi karqanchis, mana kasukuq, pantachisqa, imaymana niraq munapayaykunapi aycha kusichiykunapi watasqa. Kawsarqanchispas mana allinpi, envidiakuspa, cheqnichikuspa, hukkuna-hukkunawan cheqninakuspa.

⁴Qespichiqninchis Diospa sumaq sonqo-kaynin, runakunapaq munakuyninpas rikhurimuqtinmi ichaqa

⁵qespichiwarqanchis, manan allin ruwaykunata ruwasqanchisraykuchu, aswanpas paypa khuyapayakuyninraykun. Paymi Santo Espirituwan mosoqmanta nacechiwaspanchis, mosoq kawsayta qowaspanchis maylliwarqanchis.

⁶Qespichiqninchis Jesucristowanmi payqa Santo Espirituta llimp'arishaqtapuni qowarqanchis.

⁷Ahinapin Diosqa khuyapayawaspanchis chaninpaq qhawariwanchis, chaymi suyakusqanchis wiñay kawsayta chaskisunchis.

⁸Chaykunaqa cheqaqpunin. Chayraykun chaykunataqa allintapuni yachachinaykita munani, Diospi iñiq runakunapas allin ruwaykunata makilla ruwashanankupaq. Chaykunaqa kusapunin, runakunaq allinninpaqtaq kanpas.

⁹Ichaqa mana yuyayniyoq yanqa tapunakuykunamantapas, machulakunaq suti qelqankumantapas, churanakuykunamantapas, kamachikuy simi hawa ch'aqwaykunamantapas t'aqakuy, chaykunaqa yanqan, manataqmi imapaqpas valenchu.

¹⁰Pipas iñiq t'aqata t'aqanachin chayqa, anyay iskay kutikama, manapuni kasukuqtin ichaqa ama paywan parlaychu.

¹¹Yachankiñan chay runaqa waqllisqa kasqanta, kikin huchallantaq huchachasqantapas.

¹²Artemasta otaq Tiquicota kachamuqtiyqa usqhayllan Nicópolis llaqtaman watukuqniy hamunki. Chaypin para tiempota qhepakusaq.

¹³Zenas sutiyoq abogadota, Apolostawan yanapaykuy puriyninkupi, ama imapas paykunata pisinanpaq.

¹⁴Iñiq-masinchiskunapas allin ruwaykunata ruwaytapuni yachachunku, imapipas pisichikuqta yanapaykunankupaq, ahinapin kawsayninkuqa hukkunapaq allin kanqa.

¹⁵Llapa ñoqawan kashaqkunan napaykamusunki. Munakuwaqninchis iñiq-masinchiskunata napaykapuwaychis. Diosninchismi llapaykichista sumaqta qhawarisunkichis.