Read Quechua Cuzco Bible 1988 HEBREOS 12 Bible Online

HEBREOS 12 - Quechua Cuzco Bible 1988 bible

HEBREOS 12

¹Chay hinaqa, iñiyninkumanta willakuq ancha askha runakunan muyuriqninchispi kashan, chayrayku tukuy llasaykuwaqninchistapas huchaq nit'iykuwasqanchistapas wikch'uspa, phawananchispaq kaq phawanata tukuy sonqo phawasun.

²Jesusllatapuni qhawasun, paymi iñiyninchista paqarichiqqa, hinaspa hunt'asqata wiñachiqqa. Paymi qhepaman q'ochukunanta yachaspa, cruzpi p'enqay wañunata pisicharparispa muchurqan, hinaspan Diospa kamachikuy tiyananpa pañaneqenpi tiyaykurqan.

³Jesusmi huchasapakunaq cheqnipakusqan kaspa sinchita muchurqan, chayrayku paypi allintapuni yuyaykuychis, ahinapin mana sayk'unkichischu, manallataq pisi kallpayankichispaschu.

⁴Qankunaqa hucha contra maqanakuspa manaraqmi huchasapakunaq wañuchisqanchu karqankichis.

⁵Qankunaqa qonqapunkichisñan wawankunata hina Diospa kunasqasuykichista. Diospa Simin Qelqan nin: Wawáy, Señorpa wanachisqantaqa ama pisichaychu, pay k'amiykusuqtiykiqa ama pisi kallpayaychu.

⁶Señorqa pitachus munakun chaytan wanachin, pitachus churinpaq chaskisqantataqmi hasut'inpas, nispa.

⁷Diospa wanachisqantaqa allinniykichispaq muchuychis, wawankunata hinan payqa rikusunkichis. ¿Pi taytataq wawantaqa mana wanachinchu?

⁸Llapa wawakunan wanachisqata chaskikun, manachus qankunata Dios wanachisunkichis chayqa, manan cheqaq wawankunachu kankichis, aswanpas q'aqa wawankunallan kankichis.

⁹Ñoqanchistapas tayta-mamanchismi erqe kashaqtinchis wanachiwaq kanchis, ñoqanchistaq paykunata manchakuq kanchis. Chhaynaqa, ¿manachu hanaq pacha Yayanchistaqa astawanraq kasukusunman kawsananchispaq?

¹⁰Tayta-mamanchisqa pisi p'unchaykunallapaqmi wanachiwarqanchis, paykunaq allin yuyaykusqankuman hina, Diosmi ichaqa aswan allinninchispaq wanachiwanchis, pay hina ch'uya kawsayniyoq kananchispaq.

¹¹Arí, manapunin mayqen wanachikuypas kaq ratoqa kusikunapaq hinachu, aswanpas nanaykuchiwanchismi, chaymantañan ichaqa wanachisqawan yachaqaspa chaninta sumaqta purinchis.

¹²Chay hinaqa, makhurkisqa makiykichista kallpachaychis, liwi-liwi chakiykichista kallpachaychis.

¹³Hinaspa purinaykichispaq cheqan ñanta ruwaychis, chaymi wist'u chakipas qhaliyapunqa, manataq astawan q'ewikunqañachu.

¹⁴Tukuy runawan sumaq kawsayta munaychis. Ch'uyatapuni kawsaychis, mana ch'uya kawsaywanqa manan pipas Señorta rikunqachu.

¹⁵Allinta qhawakuychis, paqtan mayqenniykichispas Diospa khuyapayakuyninmanta karunchakapuwaqchis, paqtataq mayqenniykichispas haya qora phutumuq hina rikhurispa hukkunata misk'achiwaqchis, hinaspa qhellichawaqchis.

¹⁶Ama pipas qankunamantaqa qhellipi purichunchu, amataq ch'uya kaqtapas pisichachunchu Esaú hinaqa, paymi huk p'uku mikhunarayku phiwi-kayninman tupaqninta venderqan.

¹⁷Yachankichismi, Esauqa chay qhepatañan taytanmanta saminchata chaskiyta munarqan, ichaqa wikch'uchikurqanmi. Khuyaytaña waqarqan chaypas, manañan imachus ruwasqantañaqa hukman cambiayta atirqanñachu.

¹⁸Manan qankunaqa Israel runakuna hinachu llamiykuy atina Sinaí orqoman asuykurqankichis, chay orqopin nina rawrasharqan, laqhayaqtaq, tutayaqtaq, sinchi wayrataq kasharqanpas.

¹⁹Manallataqmi Israel runakuna hinachu uyarirqankichis trompeta waqaqtapas, Diospa kunkantapas. Chay uyariqkunan rogakurqanku amaña astawan paykunaman rimananpaq.

²⁰Chaytan nirqanku kay kamachikusqanta mana aguantayta atispanku: Manan ima animal-llapas orqota tupaykunqachu, tupaykuqtinqa rumiwan ch'aqesqan wañunqa, nispa.

²¹Chay rikusqaqa sinchi manchakuymi karqan, kikin Moisespas nirqanmi: Sinchi manchasqan khatatatashani, nispa.

²²Qankunan ichaqa Sión orqoman asuykurqankichis kawsaq Diospa llaqtanman, hanaq pacha Jerusalenman, waranqa-waranqa angelkunaq Dios yupaychay huñukuyninman.

²³Asuykullarqankichistaqmi hanaq pachapi qelqasqa kaq phiwikunaq huñukuyninman, lliwpa Jueznin Diosman, hunt'asqaman tukuchisqa chanin runakunaman,

²⁴mosoq rimanakuypi allipunachiq Jesusman, Cristoq yawarnin ch'aqchusqamanwan. Chay yawarmi Abelpa yawarninmantapas aswan allinkunataraq prometen.

²⁵Makilla kaychis, paqtataq rimapayaqniykichista mana kasuwaqchischu. Kay pachapi anyakuq Diosta mana kasukuqkunaqa manapunin ayqerqankuchu, ¿chaychu ñoqanchis ayqesunman hanaq pachamanta anyakamuq Diosta mana kasuspanchis?

²⁶Diospa kunkanmi chaypachaqa kay pachata kuyurichirqan, kunantaq ichaqa nin: huk kutitawanraqmi kuyurichisaq manan kay pachallatachu, aswanpas hanaq pachatawanraqmi, nispa.

²⁷Kay “huk kutitawanraqmi” nisqanqa sut'inchanmi kamasqakuna kuyuchispa cambiasqa kananta, mana kuyuqkuna sayananpaq.

²⁸Chay hinaqa, Diosmanta mana kuyuriq kamachikuyta chaskishaspanchisqa, payta agradecekuspa manchakuywanpuni sonqonman chayaqta hina yupaychasun.

²⁹Diosninchisqa lliwta q'olaq nina hinan.