Read Quechua Cuzco Bible 1988 HEBREOS 13 Bible Online

HEBREOS 13 - Quechua Cuzco Bible 1988 bible

HEBREOS 13

¹Wawqe-pana puraqa munanakullaychispuni.

²Wasiykichisman chayamuqkunataqa qorpachallaychispuni, chay hinata ruwaspan wakinqa mana yachaspa angelkunata qorpacharqanku.

³Presokunamanta yuyarikuychis, paykunawan kuskapas preso kashawaqchis hinata. Muchuchisqakunamantapas yuyarikullaychistaq, qankunaq cuerpoykichispas muchushanman hinata.

⁴Casarakuytaqa lliwlla allinpaq hap'ichunku, casarasqakunapas ama wasanchanakuchunkuchu. Ichaqa qhellipi puriqkunatan wasanchaqkunatawanmi Dios huchachanqa.

⁵Ama qolqe sonqo kaychischu, kunan imachus kapusunkichis chayllawan kusisqa kawsaychis, Diosmi nirqan: Manan saqerparisqaykichischu, manataqmi wikch'urparisqaykichispaschu, nispa.

⁶Chay hinaqa, mana manchakuspan niyta atinchis: Señormi yanapaykuwaqniyqa, manan manchakusaqchu. Runari, ¿imanawanqataq? nispa.

⁷Diospa siminta willaqniykichis umallikunamanta yuyarikuychis. Imaynatachus kawsasqankuta yachaqakuychis, iñiyninkutapas qatichikuychis.

⁸Jesucristoqa iman kaqllapunin qaynapas, kunanpas, wiñay-wiñaypaqpas.

⁹Ama imaymana rikch'aq yachachikuykunawan kayman chayman apaykachachikuychischu. Mikhunapaq kamachikuykunaqa manan sonqonchista kallpachanchu, chay kamachikuykuna hunt'ayqa manan hayk'aqpas runata yanapanchu. Aswanpas sonqonchista Diospa munakuyninwan kallpachaymi allinpuniqa.

¹⁰Ñoqanchispaqqa huk hina sacrificion altarpi kapuwanchis, chaytaqa manan ñawpa yupaychana karpapi kaq sacerdotekunaqa mikhuyta atinkumanchu.

¹¹Uma sacerdoten Ch'uyay-ch'uya Cheqasman animalkunaq yawarninta apaykuq huchata pampachananpaq, chaykunaq aychantataq ichaqa karpa-karpa hawapi ruphachiqku.

¹²Chay hinan Jesuspas llaqta punku hawapi wañurqan runakunata kikin yawarninwan ch'uyayachinanpaq.

¹³Chhaynaqa, haku Jesusman, karpa-karpa hawaman, imaynan pay p'enqayta muchurqan hinata muchuspa.

¹⁴Kay pachapiqa manan wiñaypaq takyaq llaqtanchis kanchu, aswanpas chayraq rikhurimunqa chay llaqtatan suyakushanchis.

¹⁵Chayrayku, Jesucristonta Diosman yupaychay sacrificiota qollasunpuni, chay sacrificioqa Diospa sutinta sut'ita siminchiswan rimariyninchismi.

¹⁶Amataq allinkaqta ruwaytapas yanapakuytapas qonqaychischu, chay hina sacrificiokunawanmi Diosqa kusikun.

¹⁷Umalliykichiskunata uyariychis, paykunata kasuychis, paykunaqa qankunatan michishallasunkichispuni, qankunamanta Diospa watusqan kanankuta yachaspa. Paykunata kasuychis kusisqa llank'anankupaq, mana chayqa llakisqan kankuman, chayqa manan allinniykichispaqchu kanman.

¹⁸Ñoqaykupaq Diosmanta mañapuwayku, allintan yachayku allin concienciayoq kasqaykuta, tukuy imaymanapitaq allintapuni puriyta munayku.

¹⁹Astawanqa valekuykichis, qankunaman usqhaylla kutichimuwananpaq Diosmanta mañapuwanaykichispaqmi.

²⁰Diosmi Señor Jesucristota wañusqanmanta kawsarichimpurqan. Paymi yawarninwan wiñaypaq rimanakuyta cheqaqchaspa ovejakunaq qollana michiqnin kapurqan. Thak-kayta qoq Dios qankunata tukuy imaymana allin ruwaypi yachachisunkichis paypa munayninta ruwanaykichispaq, Jesucristowantaq tukuy ima munasqanta ñoqanchispi pay ruwachun. ¡Wiñay-wiñaypaq yupaychasqa Jesucristoqa kachun! Ahinapuni kachun.

²²Valekuykichismi, wawqe-panaykuna, kay kunaykuy simikunata kasunaykichispaq, kay pisi simillapin qelqamuykichis.

²³Yachaychis wawqenchis Timoteoqa preso kasqanmanta kacharisqañan kapun. Usqhaytachus chayamunqa chayqa, paywan kuskan watukuqniykichis hamusaq.

²⁴Llapa umalliykichiskunatapas iñiq wawqe-panakunatapas napaykapuwaychis. Italia suyupi kaq wawqe-panakunan napaykamusunkichis.

²⁵Llapallaykichistan Diosqa sumaqta qhawarisunkichis.