Read Quechua Cuzco Bible 1988 HEBREOS 2 Bible Online

HEBREOS 2 - Quechua Cuzco Bible 1988 bible

HEBREOS 2

¹Chayraykun, lliw uyarisqanchista makillapuni kasunanchis, paqtan chaykunamanta karunchakushasunman.

²Angelkunawan Diospa willachisqan simikunaqa atiyniyoqmi karqan, chaymi chay simita mana kasukuqkunapas huchallikuqkunapas chaskinankuman hinapuni muchuchisqa karqanku.

³Chhaynaqa, ¿imaynatataq ñoqanchisqa ayqekusunchis kay hatun qespikuyta pisipaq hap'isunchis chayqa? Kay qespikuy simitaqa kikin Señor Jesusmi ñawpaqta willasqa, chaymantataq payta uyariqkuna ñoqanchisman cheqaq kasqanta sut'inchawarqanchis.

⁴Diospas chay willawasqanchistaqa cheqaqcharqanmi señalkunata, milagrokunata, imaymana atiyniyoq ruwaykunata ruwaspa, munayninman hina Santo Espirituq qokuyninkunata rakiwaspanchis.

⁵Diosqa manan angelkunatachu churarqan rimashanchis chay mosoqyachisqa hamuq pachata kamachinanpaq.

⁶Aswanpas huk cheqaspin Diospa Simin Qelqa nin: Diosnilláy, ¿imataq runari payta yuyarinaykipaq? ¿Imataq wañuq runari paymanta llakikunaykipaq?

⁷Runataqa angelkunamanta sullk'amanmi tukuchirqanki, qollanata hinan payta hatunchaykurqanki, [ruwasqaykikunapin payta munaychachirqanki.]

⁸Llapanta kamachinanpaqmi payta churarqanki, nispa. Chhaynaqa, lliwta kamachinanpaq runata churaspan, Diosqa tukuy imaymanawan payta kasuchirqan. Ichaqa manaraqmi rikunchischu runata tukuy imaymanaq kasusqantaqa.

⁹Chaywanpas Jesustaqa rikunchismi, paymi angelkunamanta sullk'aman tukuchisqa karqan, Diospa khuyapayakuyninpi llapa runarayku wañunanpaq. Paymi wañurqan, chayraykun qollana hina hatunchasqaña kashan.

¹⁰Tukuy imapas Diospa kamasqanmi, paypaqtaq lliw chaykunapas. Diosqa munanmi llapan wawankunata hanaq pachaman pusayta, chaymi payqa Jesusta ñak'arisqanwan hunt'asqata ruwarqan. Jesusmi qespikuy ñanninta paykunata pusaqqa.

¹¹Huchamanta ch'uyanchaqpas ch'uyayachisqa kaqkunapas llapankun ch'ulla Yayallayoq kanku, chaymi Jesusqa mana p'enqakunchu paykunata “wawqeykuna” niyta.

¹²Paymi nin: wawqeykunamanmi sutiykita willasaq, huñunakuypin takispa yupaychasqayki, nispa.

¹³Nillantaq: Ñoqan Diosman hap'ipakusaq, nispa. Hukneqpipas nillantaq: Kaypin kashani Diospa qowasqan wawakunapiwan, nispa.

¹⁴Chay hinaqa, imaynan wawakuna aychayoq yawarniyoq karqan, chay hinallataqmi Jesuspas aychayoq yawarniyoq kapurqan, ahinapi wañuchiq atiyniyoq saqrata wañuyninwan atipananpaq,

¹⁵hinaspa tukuy kawsasqanku p'unchaykunapi wañuyta manchakuspa kamachi hina kawsaqkunata qespichinanpaqwan.

¹⁶Jesusqa manan angelkunata yanapaqchu hamurqan, aswanpas Abrahampa mirayninta yanapaqmi hamurqan.

¹⁷Chaypaqtaq tukuy imapipas wawqenkuna hinapuni kanan karqan. Ahinapi Diospa ñawpaqenpi khuyapayakuq hunt'aq uma sacerdote karqan, runakunaq huchankunata wañusqan sacrificiowan pampachachinanpaq.

¹⁸Pay kikinmi ñak'arirqanpas wateqasqapas karqan, chayraykun payqa wateqasqakunatapas yanapayta atin.