Read Quechua Cuzco Bible 1988 HEBREOS 4 Bible Online

HEBREOS 4 - Quechua Cuzco Bible 1988 bible

HEBREOS 4

¹Chay hinaqa, Diospa samakuy qosqanman haykunapaq prometesqa kashanraqtaq chayqa, makillapuni cuidakusunchis, paqtan mayqenninchispas chay samakuy qosqanman mana haykusunmanchu.

²Ñoqanchismanpas Egiptomanta lloqsimuqkunaman hinallataqmi allin willakuykunataqa willawarqanchis, ichaqa mana iñiywanmi uyarirqanku, chaymi chay uyarisqanku simiqa paykunapaqqa yanqapaq karqan.

³Ñoqanchis iñiqkunan ichaqa Diospa qosqan samakuyman haykunchis paypa nisqanman hina. Paymi nirqan: Phiñakuyniypin jurarqani: Samakuy qosqaymanqa manan hayk'aqpas haykunqakuchu, nispay, nispa. Chaywanpas Diosqa kay pachata kamasqanmantapachan llank'ananta tukurqan.

⁴Diospa Simin Qelqapin qanchiskaq p'unchaymanta kay hinata nin: Qanchiskaq p'unchaypin Diosqa tukuy ruwasqankunamanta samarqan, nispa.

⁵Nillantaqmi: Samakuy qosqaymanqa manan hayk'aqpas haykunqakuchu, nispa.

⁶Chaymi ñawpaqtaña allin willakuykunata uyariqkunaqa mana kasukusqankurayku mana haykurqankuchu. Chaywanpas Diospa samakuy qosqanman haykuqkunaqa kashanraqmi.

⁷Chayraykun Diosqa huktawan huk p'unchayta churan “Kunan P'unchay” nisqata. Chaytan payqa ñawpaqmantaña Davidwan willachiwarqanchis. Paymi nirqan: Kunan p'unchaychus Diospa kunkanta uyarinkichis chayqa, ama sonqoykichista rumiyachiychischu, nispa.

⁸Josuechus Israel runakunata samachinman karqan chayqa, manan Diosqa qhepata huk p'unchaymanta rimanmanchu karqan.

⁹Chay hinaqa, Diospa llaqtanpaqqa kanraqmi samakuna tiempo.

¹⁰Diospa samakuy qosqanman haykuqqa llank'asqankunamantan samakunña, imaynan Diospas ruwasqanmanta samakurqan hinata.

¹¹Chhaynaqa, chay samakuyman haykunanchispaq kallpachaykukusunchis, paqtan pipas chay wakin mana kasukuqkuna hina urmanman.

¹²Diospa siminqa kawsaqmi, atiyniyoqmi, llapa iskay ñawch'iyoq espadamantapas aswan ñawch'isapallañan. Almatapas, espiritutapas, moqo-moqotapas, chilinatapas taripanankaman haykun, sonqopi yuyaykusqakunatapas lliwtapunin sut'inchan.

¹³Diosmanmi cuentata qosunchis. Diospa ima kamasqanpas qayllanpiqa manan pakasqachu, aswanpas lliwmi rikhurin, sut'itaq kashanpas.

¹⁴Diospa Churin Jesusmi hatun uma sacerdotenchis, paymi hanaq pachaman Diospa qayllanman haykurqan, chayrayku iñiyninchispi qaqata sayasunchis.

¹⁵Uma sacerdotenchisqa pisi kallpa kashaqtinchismi khuyapayawanchispuni, payqa ñoqanchis hinan imaymanapi wateqasqa karqan, ichaqa manan huchallikurqanchu.

¹⁶Chay hinaqa, ama manchakuspa khuyapayakuq Diospa kamachikuy tiyananman chimpaykusunchis khuyapayawananchispaq, yanapaykuna kashaqtinchispas yanapaykuwananchispaq.