Read Quechua Cuzco Bible 1988 HEBREOS 5 Bible Online

HEBREOS 5 - Quechua Cuzco Bible 1988 bible

HEBREOS 5

¹Llapa uma sacerdotetaqa Diosmi runakuna ukhumanta akllaspa runakunaq rantinpi churan qayllanpi servinanpaq, ofrendakunatapas sacrificiokunatapas huchakunamanta haywananpaq.

²Uma sacerdoteqa mana yachaqkunatapas, pantaqkunatapas khuyapayayta atinmi, pay kikin runa kaspa pisi kallpayoq-kayta muchusqanrayku.

³Pisi kallpayoq kasqanraykun, pay kikinpa huchankunamantapas llaqtaq huchankunamantapas sacrificiokunata haywanan.

⁴Manan pipas pay kikinmantaqa hatunchasqa uma sacerdote kayta atinmanchu, aswanpas Diospa waqyasqan kaqkunallan, imaynan Aaronpas karqan hina.

⁵Chay hinallataqmi Cristopas mana pay kikinchu akllakurqan hatunchasqa uma sacerdote kananpaq, aswanpas Diosmi payta nirqan: Qanmi Churiyqa kanki, kunanmi qanta churiyayki, nispa.

⁶Nillarqantaqmi: Qanmi wiñay-wiñaypaq sacerdoteqa kanki, Melkisedekpa t'aqanman hina, nispa.

⁷Jesusqa kay pachapi kashaspanmi qaparispa waqaspa wañuymanta payta qespichiy atiq Diosmanta mañakuspa rogakurqan, hinan Diosqa uyarirqan manchakuywan kasukuq kasqanrayku.

⁸Chay hinapin Churi kashaspapas muchusqanwan kasukuyta yacharqan.

⁹Hinaspan lliwpi hunt'asqa kaspaña, payqa kasukuqninkunapaq wiñaypaq qespichiqninku kapurqan.

¹⁰Hinallataq Diosqa Melkisedekpa t'aqanman hina payta uma sacerdotepaq churarqan.

¹¹Chaykunamantaqa askhan rimanayku kashan, ichaqa sasa sut'inchaymi mana usqhay entiendeq kasqaykichisrayku.

¹²Qankunaqa unay iñiqkunañan kankichis, yachachiqkunañan kanaykichis. Ichaqa Diospa Siminmanta qallariy yachachikuykunata huktawan yachachinaraqmi kashankichis. Qankunaqa ñuñuq wawa hinallaraqmi kashankichis, manan mikhunata khamuq hinaraqchu.

¹³Pipas ñuñuq wawa hinallaraq kashaqqa, manan chanin kawsaymanta entiendenchu wawa kasqanrayku.

¹⁴Khamuna mikhuymi ichaqa wiñasqakunapaqña, yuyayninkupi allinkaqta mana allinkaqta reparayta yachaqkunapaqña.