Read Quechua Cuzco Bible 1988 HEBREOS 6 Bible Online

HEBREOS 6 - Quechua Cuzco Bible 1988 bible

HEBREOS 6

¹Chayrayku, Cristomanta qallariy yachachikuykunata saqespa, astawan kallpachakusun allin wiñasqa-kayman chayanapaq. Amaña qallariypi yachachikuykunataqa rimasunchu, chaykunaqa kaykunan: mana valeq ruwaykunata saqepuspa Diosman kutirikuy, Diospi iñiy,

²bautizanapaq yachachikuy, uma pataman maki churaykuy, wañuqkunaq kawsarimpunan, wiñaypaq huchachaypiwan.

³Dios munaqtinqa kallpachakusun allin wiñasqa-kayman chayananchispaq.

⁴Wakinkunan huk kutita Diospa k'anchaykusqan karqanku, hanaq pacha qokuytapas mallirqanku, Santo Espiritutapas chaskirqanku,

⁵Diospa sumaq simintapas mallirqanku, hamuq tiempo atiykunatapas yacharqanku,

⁶ichaqa qhepaman kutirispan t'aqakapurqanku. Chaykunataqa manañan Diosman wakmanta kutirichiyta atikunñachu, paykunaq mana allinninkupaq Diospa Churinta huktawan chakatashasqankurayku, lliw runa qayllapipas p'enqaman churashasqankurayku.

⁷Chakraqa sapa kuti paramusqantan ch'onqan, hinaspa rurusqanta allinta poqochin, ahinapin llank'aqkunapaq allin cosecha kan. Chay chakraqa Diospa saminchasqanmi.

⁸Khiskakunata, qorakunata ruruq chakran ichaqa mana imapaqpas servinchu, ñakanapaqñataq kashanpas, p'uchukaypitaq ruphachisqa kanqa.

⁹Munasqa wawqe-panaykuna, chay hinataña rimayku chaypas, allintan yachayku qankunaqa aswan allinta kawsashasqaykichista, Diospa qespichisqan runakuna hinapuni purishasqaykichistapas.

¹⁰Diosqa chaninpunin, payqa manan qonqanchu ruwasqaykichiskunata iñiq wawqe-panakunata yanapaykuspa payta munakusqaykichistapas. Kunanpas paykunataqa yanapashallankichismi.

¹¹Ichaqa munaykupunin sapankaykichispas chay hina ruwayta p'uchukaykama rikuchinaykichista, suyakusqaykichis lliw hunt'asqa kananpaq.

¹²Manan qella kanaykichistaqa munaykuchu, aswanpas Diospa prometesqan herenciata iñiywan pacienciawan chaskiqkuna hina kanaykichistan munayku.

¹³Diosqa Abrahamman prometeshaspanmi, mana wak suti aswan hatun jurananpaq kaqtin, pay kikinpa sutinpi jurarqan:

¹⁴Anchatapunin saminchasqayki, mirayniykitapas anchatataqmi askhayachisaq, nispa.

¹⁵Chaymi Abrahamqa unayta pacienciawan suyakuspa chay prometesqata chaskirqan.

¹⁶Runakunaqa sutinkumanta aswan hatun sutipipunin juranku, hinan juramentoqa rimarisqanku cheqaqpuni kasqanta sut'inchaspa llapa ch'aqwayta ch'inyachipun.

¹⁷Chaymi Diosqa prometekusqanta juramentowan cheqaqcharqan, ahinapi chay prometesqanta chaskiqkunaman sut'incharqan paypa yuyaykusqanqa manapuni cambiakuq kasqanta.

¹⁸Chay hinaqa, iskaymi manapuni cambiakuqqa: Diospa prometekusqanwan jurasqanpiwan, chaykunamantaqa manan Diosqa llullakunchu. Ahinapin ñoqanchis Diosman pakakuq riqkuna kallpachasqapuni kanchis ñawpaqenchispi churasqa suyakuyman hap'ipaykukunanchispaq.

¹⁹Chay suyakuymi allin churasqata allin takyasqata almanchista hap'in, imaynan anclapas barcota allinta sayachin hinata. Chay suyakusqanchisqa hanaq pachapi kaq Ch'uyay-ch'uya cheqaspa cortinan ukhumanraqmi haykunpas,

²⁰chaymanmi Jesusqa ñoqanchisrayku haykurqan ñanta kichapuwananchispaq. Jesusqa Melkisedekpa t'aqanman hina wiñaypaq uma sacerdote churasqan kapun.