Read Quechua Cuzco Bible 1988 HEBREOS 7 Bible Online

HEBREOS 7 - Quechua Cuzco Bible 1988 bible

HEBREOS 7

¹Chay Melkisedekqa karqan Salem llaqta reymi, hinallataq Qollana Diospa sacerdoten. Reykunata maqanakuypi atipasqanmanta Abraham kutimushaqtintaq Melkisedekqa Abrahamwan tupaq lloqsimurqan, hinaspan payta samincharqan.

²Chaymi Abrahamqa Melkisedekman diezmota qorqan maqanakuypi lliw qechumusqankunamanta. Melkisedek sutiqa “Chanin Rey” ninantan nin. Salem Rey sutiqa “Thak-kay Rey” ninantan nin.

³Payqa rikhurin mana taytayoq, mana mamayoq, mana machulakunayoq. Manallataqmi nacesqanpas wañusqanpas yachakunchu, aswanpas Diospa Churinman rikch'akuspan wiñaypaq sacerdote kapun.

⁴Chay hinaqa, yuyaykuychis may hina chaniyoqchus Melkisedekqa kasqanta. Paymanmi ñawpa machulanchis Abrahampas maqanakuypi lliw qechumusqanmanta aswan allinninkaqmanta diezmota qorqan.

⁵Diospa kamachikuy siminman hinaqa Leví aylluq mirayninmanta kaq sacerdotekunan runakunamanta diezmota chaskinanku karqan, chaytan chaskirqanku llaqta-masinkumanta, paykunaqa llapankupas Abrahampa mirayninmi karqanku.

⁶Melkisedektaq ichaqa mana Leví ayllu miraymanta kashaspapas, Abrahammanta diezmota chaskirqan, hinaspan prometesqata chaskiq Abrahamta samincharqan.

⁷Cheqaqtapunin saminchaqqa aswan kurak saminchasqamantaqa.

⁸Leví runakunaq ruwasqanman hinaqa wañuq runakunan diezmota chaskirqanku, Melkisedekpa ruwasqanman hinataq mana wañuq nisqa runa diezmota chaskirqan.

⁹Abrahamwan tupaq Melkisedek lloqsimushaqtinqa manaraqmi Leviqa machulan Abrahammanta nacerqanchu, chaymi kay hinata nisunman: Diezmota chaskiq Levipas Abrahampin diezmota qorqan, nispa.

¹¹Israel runakunaqa Aaronpa miraynin Leví sacerdotekunawanmi Diospa kamachikuy siminta chaskirqanku. Chay sacerdotekunaq ruwasqanchus hunt'asqa kanman karqan chayqa, manañachá necesitakunmanchu huk t'aqa sacerdote hatarichiyqa. Chay sacerdoteqa manan Aaronpa t'aqanmantañachu hamun, aswanpas Melkisedekpa t'aqanmantan.

¹²Sacerdotechus cambiasqa kaqtinqa kamachikuy simipas cambiasqallataqmi kanan.

¹³Diospa Simin Qelqan Señorninchismanta riman. Payqa manan Leví ayllumantachu karqan, paypa ayllunmantaqa manan pipas sacerdote karqanchu.

¹⁴Señorninchispa Judá ayllumanta nacesqantaqa yachanchismi, Moisespas sacerdotemanta rimashaspaqa manan imatapas chay ayllumanta nirqanchu.

¹⁵Chay nisqaykunaqa aswan sut'iraqmi, Melkisedek hina wak sacerdote hatarimun chayqa.

¹⁶Payqa manan runaq kamachikusqanman hina churasqachu karqan, manallataq mirayninman hinapaschu, aswanpas mana tukukuq kawsaypa atiyninman hinan churasqa karqan.

¹⁷Paymantan kay hinata Diosqa nin: Qanmi wiñaypaq sacerdote kanki, Melkisedekpa t'aqanman hina, nispa.

¹⁸Chay hinaqa, ñawpaqkaq kamachikuyqa tukukapunmi, mana atiyniyoq mana imapaq serviq kasqanrayku.

¹⁹Kamachikuy simiqa manan imatapas hunt'asqaman tukuchiyta atirqanchu. Chaymi kamachikuy simiq rantinpi aswan allin suyakuyta Diosqa qowanchis, chay suyakuywan payman asuykunanchispaq.

²⁰Chay sacerdotetan Diosqa juramentowan churarqan. Wakin sacerdotekunaqa manan juramentowan churasqachu karqanku,

²¹chay sacerdotetan ichaqa juramentowan churaspa Diosqa nirqan: Ñoqa Señor Diosmi jurarqani: Qanmi wiñaypaq sacerdoteqa kanki, nispa. Manataqmi “imapaqmi jurarqani” nisaqchu, nispa.

²²Chayraykun Jesusqa aswan allin rimanakuyta ñoqanchispaq allinta sayachin.

²³Chay wakin sacerdotekunaqa wañuq kaspankun mana unaytachu servirqanku, chaymi askha karqanku.

²⁴Jesusmi ichaqa wiñay kawsaq kaspa, sacerdote-kayninta mana pimanpas saqenchu.

²⁵Ahinapin payqa Diosman asuykachisqankunata wiñaypaq qespichiyta atin, paykunapaq Diosmanta mañapunanpaq wiñayta kawsasqanrayku.

²⁶Chay hinaqa, chay uma sacerdotetapunin ñoqanchisqa necesitasharqanchis. Payqa ch'uyan, mana huchayoq, chanin, llapa huchasapakunamanta t'aqasqa, hanaq pachapi Diospa hatunchasqanpuni.

²⁷Wakin uma sacerdotekunaqa sapa p'unchaymi paykuna kikinkuq huchankumanta sacrificiota haywarqanku, chaymantataq llapa llaqtaq huchankunamanta. Jesusmi ichaqa runakunaq huchanmanta pay kikinta sacrificiopi ch'ulla kutillata wiñaypaq haywakurqan.

²⁸Kamachikuy simiqa pisi kallpayoq runakunatan uma sacerdote kananpaq churarqan. Diospa juramento siminmi ichaqa kamachikuy simi qhepataña karqan, chay juramenton Churita uma sacerdote kananpaq churan, paymi wiñaypaq hunt'asqapuni kapun.