Read Quechua Cuzco Bible 1988 HEBREOS 8 Bible Online

HEBREOS 8 - Quechua Cuzco Bible 1988 bible

HEBREOS 8

¹Chay hinaqa, tukuy nisqaykumanta aswan allinqa kaymi: Uma sacerdoten kapuwanchis, paymi hanaq pachapi Diospa kamachikuy tiyananpa pañaneqenpi tiyaykurqan,

²hinaspa cheqaq karpapi kaq Ch'uyay-ch'uya Cheqaspi servin, chay karpaqa manan runaq ruwasqanchu karqan, aswanpas Señor Diosmi ruwarqan.

³Llapa uma sacerdoteqa ofrendakunata sacrificiokunata haywananpaq churasqan, chaymi uma sacerdotenchispas imallatapas haywananpuni karqan.

⁴Kay pachapichus pay kashanman karqan chayqa, manan sacerdotepas payqa kanmanchu karqan, kamachikuy simiman hina ofrendakunata haywananpaq churasqa sacerdotekuna kashaqtinqa.

⁵Ichaqa, chay sacerdotekunaq servisqanqa hanaq pachapi kaqkunamanmi llanthu hina rikch'akun. Moisestapas Dioswan Tupana Karpata ruwanan kashaqtinqa, Diosqa nirqanmi: Qhawariy, imaynatachus Sinaí orqopi rikuchirqayki chayman rikch'akuqtan tukuy imaymanatapas ruwanki, nispa.

⁶Uma sacerdotenchis Jesucriston ichaqa aswan allin llank'anata chaskirqan, hinallataq payqa aswan allin rimanakuypi allipunachiq, chay rimanakuymi aswan allin prometesqakunapi churasqa karqan.

⁷Chay ñawpaqkaq rimanakuychus tukuypi hunt'asqa kanman karqan chayqa, manan qhepakaq rimanakuyqa kanmanchu karqan.

⁸Ichaqa Diosmi chay tiempo Israel runakunata phiñarikuspa nirqan: P'unchaykunan chayamushan, chaypachan Israel runakunawanpas Judá runakunawanpas mosoqmanta rimanakusaq.

⁹Manan Egipto suyumanta horqomuspa makinkumanta hap'ispa pusamusqay p'unchaypi machulankuwan rimanakusqayta hinachu rimanakusaq. Paykunaqa manan rimanakusqayta hunt'arqankuchu, chaymi ñoqapas paykunataqa wikch'urqani.

¹⁰Qhepa p'unchaykunapiqa Israel runakunawan kay hinatan rimanakusaq: Paykunaq yuyayninkupin kamachikuy simiykunata churasaq, sonqonkupitaq chaykunata qelqasaq. Ñoqan paykunaq Diosninku kasaq, paykunataq ñoqaq llaqtay kanqaku.

¹¹Huch'uypas hatunpas llapankun reqsiwanqaku, chaymi manaña pipas runamasintapas wawqentapas yachachinqachu: Señorta reqsiy, nispaqa.

¹²Mana chanin ruwasqankutapas pampachasaqmi, huchankutapas manañan astawanpas yuyarisaqñachu, ninmi Señor Diosqa, nispa.

¹³Mosoq rimanakuymanta Dios rimaspaqa, mawk'ayachipunmi ñawpaqkaq rimanakuytaqa. Unayniyoqña kaqpas mawk'ayapushaqpas kunallanmi tukukapunqa.