Read Quechua Cuzco Bible 1988 HEBREOS 9 Bible Online

HEBREOS 9 - Quechua Cuzco Bible 1988 bible

HEBREOS 9

¹Ñawpa rimanakuypiqa Diosta yupaychanapaqmi kamachikuykuna karqan, kallarqantaqmi kay pachapi yupaychana karpapas.

²Chay karpaqa kay hina ruwasqan karqan: Ñawpaq cheqasninmi Ch'uya Cheqas nisqa karqan, chaypin karqan candelero, mesa, Diospa ñawpaqenpi churana t'antapiwan.

³Ch'uya Cheqaspa qhepanpitaq cortinawan t'aqasqa Ch'uyay-ch'uya Cheqas karqan,

⁴chaypin karqan qorimanta ruwasqa altar incienso q'osñichinapaq, qori llaphllawan qatasqa rimanakuy caja, chay cajapin karqan manna nisqa t'antayoq huk qori p'uyñucha, Aaronpa ch'ikchiq varan, p'alta rumikunapi qelqasqa rimanakuy simipiwan.

⁵Chay caja patapin karqan Diospa kashasqanta rikuchiq raphrayoqkuna, chaykunan huchamanta khuyapayachiq cheqasta raphrankuwan pakaykurqan. Manaraqmi kunanqa chaykunamanta lliwta rimasunmanchu.

⁶Chaykuna lliw wakichisqa kaqtintaq, yupaychana karpaq Ch'uya Cheqasninman sacerdotekuna sapa kuti haykullaqkupuni, Dios serviy llank'ana hunt'anankupaq.

⁷Cortinawan t'aqasqa Ch'uyay-ch'uya Cheqasmantaq ichaqa watapi huk kutillata sapan uma sacerdotella haykuq, haykuspaqa yawar apantillanpunin haykuq, chay yawartan haywaq paypa huchanmanta runakunaq mana yachaspa huchallikusqanmantawan.

⁸Chaywanmi Santo Espíritu yachachiwanchis kay pachapi yupaychana karpa kashaqtin, hanaq pachapi Ch'uyay-ch'uya Cheqasman haykunapaq ñan manaraq rikuchisqachu kasqanta.

⁹Tukuy chaykunan huk rikch'anachiy hina kunan tiempopaq. Diosman chaypi ofrendakunatapas sacrificiokunatapas haywaspaqa manan haywaqpa conciencianta ch'uyanchayta atirqanchu.

¹⁰Chay ruwasqakunaqa mikhunamanta, ukyanamanta, ch'uyanchakunapaq ruwaykunamanta, cuerpopaq kamachikuykunallan karqan. Chaykunaqa Diospa mosoqyachinan tiempokamallan churasqa karqan.

¹¹Ichaqa ñan Cristo hamunña, payqa allin kaqkunawan saminchaq uma sacerdoten. Paypa servisqan karpaqa aswan chaniyoqmi, aswan sumaqmi, manan runakunaq ruwasqanchu, manallataqmi kay pachamantapaschu.

¹²Cristoqa manan Ch'uyay-ch'uya Cheqasmanqa orqo cabrakunaq torillokunaq yawarninwanchu haykurqan, aswanpas pay kikinpa yawarninwanmi huk kutillata wiñaypaq haykurqan, hinaspa wiñaypaq qespikuyta taripuwarqanchis.

¹³Torokunaq orqo cabrakunaq yawarninchus, malta waka ruphachisqa usphachus qhelli kashaq runakunata ch'aqchusqa kaqtin hawallanta ch'uyayachin chayqa,

¹⁴¿may hina aswan atiyniyoqraqtaq Cristoq yawarninqa? Pay kikinmi wiñay Espirituq yanapasqan ch'uya sacrificio hina Diosman entregakurqan, chaymi yawarninqa mana valeq ruwaykunamanta yuyayninchista ch'uyanchan, kawsaq Diosta servinanchispaq.

¹⁵Cristoqa mosoq rimanakuypi allipunachiqmi, chaymi Diospa waqyasqan kaqkunaqa prometesqa wiñay herenciata chaskinku. Paymi ñawpaqkaq rimanakuypi lliw huchallikusqankutapas wañuyninwan kacharichin.

¹⁶Pipas testamentota ruwakun chayqa, chay testamento ruwakuq runa wañukapuqtinraqmi valorniyoq kanqa.

¹⁷Testamento ruwakuq kawsashaqtinqa manan imapaqpas chay testamentoqa valenchu, aswanpas wañukapuqtillanpunin valorniyoqqa.

¹⁸Chaymi ñawpaqkaq rimanakuypas yawar hich'asqawanpuni qallarirqan.

¹⁹Moisesqa llapa runamanmi kamachikuy simipi qelqasqa lliw kamachikuykunata willarqan. Chaymantataq puka q'aytuwan muña k'allmata wataykuspa torillokunaq orqo cabrakunaq yawarninman unumanwan challpuykuspa, kamachikuy qelqata ch'aqchuykurqan, hinallataq llapa runakunatapas ch'aqchuykurqan.

²⁰Hinaspa nirqan: Kaymi Dioswan rimanakuy cheqaqchaq yawarqa, kay rimanakuytan hunt'anaykichispaq kamachirqasunkichis, nispa.

²¹Chay hinallataq karpatapas yawarwan ch'aqchuykurqan, Dios yupaychanapaq llapa serviciokunatawan.

²²Kamachikuy simiman hinaqa, yaqa llapallanmi yawarwan ch'uyanchasqa kanan karqan. Yawar hich'akuqtillanmi huchaqa pampachasqa.

²³Chay hinaqa, hanaq pacha kaqkunaq rikch'ayninkunaqa chay sacrificiokunawan ch'uyanchasqapunin kanan karqan. Hanaq pacha kikin kaqkunan ichaqa chaykunamanta aswan allichachaq sacrificiokunawan ch'uyanchasqa kanan karqan.

²⁴Cristoqa manan runakunaq ruwasqan Ch'uya Cheqasmanchu haykurqan, chay Cheqasqa hanaq pachapi yupaychana wasiq rikch'aynillanmi karqan. Aswanpas Cristoqa kikin hanaq pachamanmi haykurqan, ñoqanchisrayku Diospa qayllanpi kunan rikhurinanpaq.

²⁵Uma sacerdoten animalkunaq yawarnin apaykusqa sapa watapi ch'ulla kutillata Ch'uyay-ch'uya Cheqasman haykurqan, Cristoqa hanaq pachaman haykuspa manan askha kutitachu sacrificiopi entregakurqan.

²⁶Mana chayqa sapa kutichá kay pacha qallariymantapacha ñak'arinan kanman karqan, kunanmi ichaqa huk kutillata tiempokuna hunt'akuqtin rikhurimurqan, pay kikinta sacrificiopi entregakuspa huchata qechunanpaq.

²⁷Imaynan runakunapaqpas ch'ulla kutillata wañunankupaq unanchasqa kashan, chay qhepatataq hatun taripay,

²⁸chay hinan Cristopas ch'ulla kutillata sacrificasqa karqan askha runaq huchankunata qechunanpaq. Chaymantataq huktawan rikhurimunqa, manan huchata pampachachiqñachu, aswanpas payta suyakuqkunata qespichinallanpaqñan.