Read Quechua Cuzco Bible 1988 SANTIAGO 1 Bible Online

SANTIAGO 1 - Quechua Cuzco Bible 1988 bible

SANTIAGO 1

¹Ñoqa Santiagon Diospapas Señor Jesucristoqpas kamachin kani, kay pachantinpi ch'eqerisqa kashaq chunka iskayniyoq aylluta napaykamuykichis.

²Wawqe-panaykuna, imaymana sasachakuykunapichus rikukunkichis chayqa, anchata kusikuychis,

³iñiyniykichis probasqa kaqtin aswan pacienciayoq kanaykichista yachaspa.

⁴Ichaqa pacienciakushallaychispuni iñiypi wiñay tukusqa, hunt'asqa, tukuy imapaq wakichisqa kanaykichispaq.

⁵Mayqenniykichispas pisi yachayniyoq kashan chayqa, mana k'amiykuspa lliwman askhatapuni qoq Diosmanta chayta mañakuchun, hinan Diosqa payman yachayta qonqa.

⁶Ichaqa iñispapuni mañakuchun, mana imamanta iskayrayaspa, iskayrayaqqa mama qochapi kayman chayman wayraq aytiykachachisqan phoqchiqeymanmi rikch'akun.

⁷Chay hina iskayrayaq runaqa kunanmi hukta munan paqarinqa huktañataq, ahinapin kawsayninqa mana takyasqachu, chayrayku payqa amaña yuyachunchu Señormanta imallatapas chaskiyta.

⁹Wakcha wawqe-panaqa Diospa hatunchasqanmanta kusikuchun,

¹⁰qhapaqtaq Diospa k'umuykachisqanmanta kusikuchun. Qhapaqqa qora t'ika hinan chinkapunqa.

¹¹Inti lloqsimuspa ruphaykuqtinmi qoraqa ch'akipun, t'ikanpas urmapun, sumaq rikch'ayninpas chinkapun. Chay hinan qhapaqpas qolqeq qhepan purishasqanpi chinkapunqa.

¹²Kusisamiyoqmi sasachakuyta muchuq runaqa, chaywan probasqa kaspa mana pisipaqqa wiñay kawsaytan coronata hina chaskinqa, chaytan Diosqa prometerqan munakuqninkunaman.

¹³Pipas sasachakuypi wateqasqa kaspaqa, ama nichunchu: Diosmi wateqashawan, nispaqa. Diosqa manan saqraq wateqananchu, manataqmi pitapas Diosqa wateqanchu.

¹⁴Pipas kikinpa millay munayninwan aysachikuspa sonqontapas suwachikun, chaymi wateqasqa-kayqa.

¹⁵Chay millay munaymi saphirispa huchata paqarichin, huchataq wiñaspa wañuyta paqarichin.

¹⁶Ancha munasqa wawqe-panaykuna, ama pantaychischu.

¹⁷Tukuy allin kaqkunatapas tukuy sumaq kaqkunatapas hanaq pachamantan chaskinchis, hanaq pacha k'anchaykuna kamaq Yayamanta, payqa manan cambiakunchu, manallataqmi llanthunanpaqpas kuyurinchu.

¹⁸Diosqa pay kikinpa munayninmantan cheqaq allin willakuywan nacechiwarqanchis, kamasqankunamanta ñawpaqkaq kananchispaq.

¹⁹Munasqa wawqe-panaykuna, llapaykichis usqhaylla uyariq kaychis, ichaqa allin yuyaywan rimaychis, amataq usqhayllachu phiñakuychis.

²⁰Phiñakuq runaqa manan Diospa chanin munaynintachu ruwan.

²¹Chayrayku, tukuy qhelli-kayta sinchi mana chaninkaqtapas wikch'upuychis, hinaspa sonqoykichispi saphichasqa simita llamp'u sonqowan chaskiychis, chay simiqa atiyniyoqmi qespichinasuykichispaq.

²²Ama uyariylla-uyariqqa kaychischu, qankuna kikiykichista q'otukuspa, aswanpas simiq nisqanta hunt'aqpuni kaychis.

²³Pipas simita uyarishaspa mana hunt'aqqa espejopi uyanta qhawakuq runamanmi rikch'akun.

²⁴Paymi imaynachus kasqanta qhawakun, ripuspataq imaynachus kasqanta qonqarqapun.

²⁵Diospa hunt'asqa kamachikuy siminmi kacharichin, pipas chayta allin-allinta qhawaspa t'aqwin, hinaspa mana qonqaspa chay kamachikuy simita hunt'an chayqa, tukuy ruwasqanpin kusisamiyoq kapun.

²⁶Mayqenniykichispas Diosta cheqaq yupaychaq kasqanta yuyan, manataq hawan-ukhun rimasqanta reparakunchu chayqa, pay kikintan q'otukun, Dios yupaychayninpas yanqapaqmi.

²⁷Dios Yayaq sonqonman chayaq yupaychayqa kay hinan: Mana tayta-mamayoqkunatapas, viudakunatapas, llakikuyninkupi yanapaykuymi, kay pachaq millay ruwayninkunamanpas mana chhaqrukuspa waqaychakuymi.