Read Quechua Cuzco Bible 1988 SANTIAGO 2 Bible Online

SANTIAGO 2 - Quechua Cuzco Bible 1988 bible

SANTIAGO 2

¹Wawqe-panallaykuna, musphana atiyniyoq Señorninchis Jesucristopi iñiyniyoq kaspaykichisqa, ama rikch'akuyninta qhawaspachu runakunata allinpaq hap'iychis.

²Qankunaq huñukuyniykichisman huk runa qori sortijayoq, sumaq p'achayoq haykumunman, huk wakcha runapas haykumullanmantaq thanta p'achayoq chayqa,

³sumaq p'achayoqkaq runata allinpaq qhawarispaykichismi niwaqchis: Qanqa kay allinkaqpi tiyaykuy, nispa, wakcha runatataq ichaqa niwaqchis: Qanqa chaypi sayay, nispa, otaq: Kay pampapi tiyay, nispa.

⁴Chayta ruwaspaykichisqa, ¿manachu qankuna kikiykichis runakunata t'aqanachinkichis? ¿Manachu millay yuyayniyoq juezkunaña kankichis?

⁵Munakusqay wawqe-panaykuna, kayta uyariychis: Diosqa kay pachapi wakchakunatan akllakurqan iñiypi qhapaq kanankupaq, munakuqninkunaman prometesqanman hina kamachikushasqanpi kanankupaqwan.

⁶Qankunan ichaqa wakchakunata p'enqachirqankichis. ¿Manachu qhapaqkunaqa muchuchisunkichis? ¿Manachu paykuna kikinku juezkunamanpas aysasunkichis?

⁷¿Manachu paykunaqa Jesucristoq ancha chaniyoq sutinta ñakanku? Chay sutitan qankunaqa sut'ita rimarirqankichis.

⁸Diospa Simin Qelqan nin: Runa-masiykita munakunki qan kikiykita hina, nispa. Chay hinaqa, cheqaqtapunichus chay allinnin kamachikuy simita hunt'ankichis chayqa, allintan ruwankichis.

⁹Runata imaynachus kasqanta qhawaspaykichismi ichaqa, huchallikunkichis, kamachikuy simiq huchachasqantaq kankichis, chay kamachikuyta p'akisqaykichis hawa.

¹⁰Pipas kamachikuy simita lliwta hunt'an ichaqa huk chhikallanta pantarqon chayqa, llapallanmantan huchachasqa rikukun.

¹¹Kikin Diosmi nirqan: Aman wasanchankichu, nispa. Nillarqantaq: Aman pitapas wañuchinkichu, nispa. Chay hinaqa, wasanchay huchata mana ruwawaqchu, ichaqa wañuchiwaqtaq karqan chayqa, kamachikuy simita p'akiqñan kanki.

¹²Qankunaqa rimaychispas ruwaychispas kacharichiwaqninchis kamachikuy simiwan juzganapaq kaqkuna hinapuni.

¹³Mana khuyapayakuqpaqqa mana khuyapayakuyniyoq huchachaymi kanqa, khuyapayakuqkunataq ichaqa taripay p'unchaypi sumaq rikusqa kanqaku.

¹⁴Wawqe-panallaykuna, pipas: Iñiyniyoqmi kani, ninman, manataq allinkaqkunata ruwanmanchu chayqa, ¿ima allintaq kanman? ¿Chay iñiyqa atinmanchu payta qespichiyta?

¹⁵Huk wawqepas otaq huk panapas q'alallataq mana mikhunayoqtaq sapa p'unchay kashaqtin,

¹⁶mayqennillaykichispas paykunata niwaqchis: Allillanña ripuychis, allinta p'istukuychis, saksaykuychis ima, nispa, ichaqa manataq kawsananpaq imakunachus pisisqanta paykunaman qowaqchischu chayqa, ¿ima allintaq kanman?

¹⁷Chay hinallataqmi chay iñiyninpas allinkunata mana ruwaqtinqa mana imapaqpas valenchu.

¹⁸Icha pipas ninqapaschá: Qanqa iñiyniyoqmi kanki, ñoqataq allinkunata ruwani, nispa. Chay hinaqa ninin: Rikuchiway iñiyniykita allinkaqta mana ruwaspalla, ñoqataq allinkaqta ruwaspa iñiyniyta rikuchisqayki, nispa.

¹⁹Qanqa iñinkin Diosqa ch'ullalla kasqanta, allinmi chayqa. Ichaqa supaykunapas creenkun, manchakuymantataq khatatatanku.

²⁰Mana yuyayniyoq runa, ¿manachu yachanki mana ruwayniyoq iñiyqa mana valeq kasqanta?

²¹Machulanchis Abrahampas iñiywan ruwasqanraykun Diospa chaninpaq qhawarisqan karqan, maypachachus altar patapi churin Isaacta sacrificiopi haywasharqan chaypacha.

²²Qhawariy, Abrahampa iñiyninqa ruwasqankunawanmi rikuchikurqan, ruwasqankunawanmi iñiyninpas hunt'asqa-kayman ayparqan.

²³Ahinapin Diospa Simin Qelqa hunt'akurqan. Chaymi nin: Abrahammi Diospi iñirqan, chaymi Diosqa payta chaninpaq qhawarirqan, nispa. Chaymi Abrahamqa Diospa amigon nisqa kapurqan, nispa.

²⁴Chay hinaqa yachankichismi, runaqa ruwasqankunapiwan chaninpaq qhawarisqa kasqanta, manataq iñiyllawanchu.

²⁵Chhaynallataqmi rabona warmi Rahabpas ruwasqankunawan chaninpaq qhawarisqa karqan. Paymi qhamiyaq kachasqakunata qorpacharqan, hinaspan wak ñanninta paykunata kachapurqan.

²⁶Imaynan mana espirituyoq cuerpoqa wañusqa kashan, chay hinallataqmi allinkunata mana ruwaqtinchisqa iñiyninchispas wañusqa kashan.