Read Quechua Cuzco Bible 1988 SANTIAGO 3 Bible Online

SANTIAGO 3 - Quechua Cuzco Bible 1988 bible

SANTIAGO 3

¹Wawqe-panallaykuna, ama askhachu yachachikuqkunaqa kaychis, yachankichismi yachachiqkunataqa Diospa hukkunamanta aswantaraq juzgananta.

²Llapanchismi imaymanapi pantanchis. Pipas rimaspa mana pantanchu chaymi allin takyasqa runaqa, atintaqmi lliw cuerponwanpas kasuchikuyta.

³Kasuwananchispaq caballokunaq siminman frenota churanchis chayqa, tukuy cuerpontapas kutirichiyta atinchismi.

⁴Qhawarillaychistaq barcokunatapas, ancha hatunña kashaqtinpas sinchi wayraq apaykachasqan kaqtinmi, huk huch'uy timonllawan barco purichiqqa kutirichin may munasqan ladoman.

⁵Chay hinallataqmi qallupas cuerpoykichispi huch'uychalla, ichaqa hatuchachaqkunatan riman. Qhawariychis, huch'uy ninallan may chhikan sach'a-sach'atapas ruphaykun.

⁶Qallupas nina hinan, supay wasi hina cuerponchispi churasqa, chaymi llapa cuerponchista qhellichan, infierno ninaq hap'irichisqantaq tukuy kawsayninchista rawrarichin.

⁷Runaqa atinmi tukuy imaymana phiña animalkunata, mach'aqwaykunata, mama qochapi kaq animalkunatapas samp'ayachispa mansoyachiyta,

⁸qalluntan ichaqa mana pi runapas samp'ayachiyta atinchu. Qalluqa mana samp'ayachikuq sinchi mana allinmi, wañuchiq venenowan hunt'akusqa hinan.

⁹Chay qalluwanmi Dios Yayata saminchanchis, chayllawantaqmi Diospa rikch'ayninman hina kamasqa runakunatapas ñakanchis.

¹⁰Huk simillamantan saminchaypas ñakaypas lloqsimun. Wawqe-panallaykuna, chayqa manan chay hinachu kanan.

¹¹Manan huk pukyullamantaqa phullpumunchu misk'i unupas p'osqo unupas.

¹²Wawqe-panallaykuna, higos sach'aqa manan aceitunasta ruruyta atinmanchu, otaq uvas yurapas higostaqa rurumunmanchu. Chay hinallataqmi p'osqo unuta phullpuchimuq pukyuqa mana misk'i unuta phullpuchimunmanchu.

¹³¿Pipas qankuna ukhupi yachaysapa yuyaysapa kanchu? Kan chayqa rikuchikuchun allinta kawsasqanpi yachaywan huch'uyyaykukuspa ruwasqankunapi.

¹⁴Ichaqa sonqoykichispi llakichiq envidiakuypas hillukuypas kan chayqa, ama hatunchakuychischu, amallataq llullakuychispaschu cheqaq-kay contraqa.

¹⁵Chay yachayqa manan Diosmantachu hamun, aswanpas kay pachamantan, runamantan, kikin saqramantawanmi hamun.

¹⁶Maypichus envidiakuypas churanakuypas kan, chaypin ch'aqwaypas tukuy mana allin ruwaypas kallantaq.

¹⁷Diosmanta hamuq yachayniyoq runakunan ichaqa ch'uya kawsayniyoq kanku, hinallataq sumaqpi kawsaqkuna, llamp'u sonqokuna, allin yuyaywan kawsaqkuna, tukuy imapi khuyapayakuqkuna, tukuy imapi allinkaqta ruwaqkuna, mana pimanpas sayapakuqkuna, mana iskay uyakuna ima.

¹⁸Thak-kaypi kawsanapaq allipunachiq runakunaqa sumaqpi kawsaspan allinta ruwanku chanin kawsayta ruruta hina cosechanankupaq.