Read Quechua Cuzco Bible 1988 SANTIAGO 5 Bible Online

SANTIAGO 5 - Quechua Cuzco Bible 1988 bible

SANTIAGO 5

¹¡Yaw qhapaqkuna, uyariychis! Ñak'ariypi rikukunaykichismanta waqaychis qapariychistaq.

²Qhapaq-kayniykichisqa ismusqan kashan, p'achaykichispas thutaq thutasqanmi kashan.

³Qoriykichispas qolqeykichispas qhoqasqan kashan, chay qhoqayasqanmi huchachasunkichis, nina hinataq aychaykichistapas ruphanqa. Kay p'unchaykunapin qhapaq-kayta taqeshankichis, ichaqa p'uchukay p'unchaykunañan.

⁴Chakraykichista cosechaqkunamanmi mana pagarqankichischu. ¡Uyariychis qankuna contra waqyakamusqankuta! Chay llank'aqkunaq waqyakusqantan Tukuy-atiyniyoq Señorqa uyarinña.

⁵Kay pachapin kawsarqankichis q'ochukuykunapi aycha kusichiykunapi uywa hina wirayaspaykichis. Ichaqa ñan chayamushanña nak'ana p'unchay.

⁶Qankunaqa chanin runatan huchachaspa wañuchirqankichis, ¿manachu Diosqa qankuna contra sayarinqa?

⁷Chay hinaqa, wawqe-panaykuna, pacienciakuychis Señorpa hamunankama. Qhawariychis chakra llank'aqta, payqa hallp'aq sumaq rurusqanta manaraq hoqarishaspanmi ñawpaq paratapas qhepa paratapas pecienciawan suyakun.

⁸Señorpa hamunanqa qayllaykamushanñan, chayrayku qankunapas pacienciakullaychistaq, amataq pisi kallpayaychischu.

⁹Wawqe-panaykuna, ama hukkuna hukkunawan quejanakuychischu, mana chayqa huchachasqan kankichis. Juzgaqninchis Diosqa punkupiñan kashan.

¹⁰Wawqe-panaykuna, Señorpa sutinpi rimaq profetakunaq*f** ñak'arispa pacienciakusqankumanta yachaqakuychis.

¹¹Ñoqanchisqa ñak'arispa pacienciakuqkunataqa kusisamiyoqpaqmi hap'inchis. Qankunaqa uyarirqankichismi Jobpa pacienciakusqanmanta, yacharqankichismi imaynatachus qhepaman payta Señorpa saminchasqantapas. Señorqa ancha khuyapayakuqmi llakipayakuqtaqmi.

¹²Chaywanpas wawqe-panallaykuna, ama juraychischu hanaq pacha sutipipas, kay pacha sutipipas, ama ima sutipipas, Chayrayku, “arí” nisqaykichisqa “arí” nisqa kachun, “manan” nisqaykichispas “manan” nisqallataq kachun, ahinapin Diosqa mana huchachasunkichischu.

¹³¿Pipas qankuna ukhupi llakisqachu kashan? Diosmanta mañakuchun. ¿Pipas kusisqachu kashan? Yupaychakunata Diosman takichun.

¹⁴¿Pipas qankuna ukhupi onqoshanchu? Iñiq t'aqapi uma runakunata waqyachikamuchun, paypaq Diosmanta mañapunankupaq, Señorpa sutinpi aceitewan payta hawiykunankupaqwan.

¹⁵Iñiywan Diosmanta mañakuyqa onqosqatan qhaliyachinqa, hinan Señorqa payta qhaliyachinqa, huchallikunmanña karqan chaypas pampachasqan kanqa.

¹⁶Huchaykichiskunata willanakuychis, hukkuna hukkunapaqtaq Diosmanta mañapuychis, qhaliyachisqa kanaykichispaq. Chanin runaq tukuy sonqowan Diosmanta mañakusqanqa ancha atiyniyoqmi.

¹⁷Eliaspas ñoqanchis hina runallan karqan, paymi tukuy sonqowan mañakurqan ama paramunanpaq, chaymi mana paramurqanchu kinsa wata soqta killanta.

¹⁸Chaymantataq huktawan mañakurqan, hinan paramurqan, hallp'ataq rurusqanta poqochirqan.

¹⁹Wawqe-panallaykuna, pipas qankuna ukhupi cheqaq-kaymanta t'aqarikapuqtin hukkaqniykichis chay runata kutirichimun chayqa,

²⁰kayta yachaychis: huchasapata pantay ñanninmanta kutirichimuqqa, chay runatan wañuymanta qespichinqa, askha huchakunatataq pampachachinqa.