Read Quechua Cuzco Bible 1988 1 PEDRO 1 Bible Online

1 PEDRO 1 - Quechua Cuzco Bible 1988 bible

1 PEDRO 1

¹Ñoqa Pedron Jesucristoq apostolnin*f** kani. Kay cartatan qelqamuykichis Ponto provinciapi, Galacia provinciapi, Capadocia provinciapi, Asia provinciapi, Bitinia provinciapiwan ch'eqechisqa kashan Diospa akllasqankunaman.

²Qankunatan Dios Yayaqa ñawpaqmantaña yuyaykusqanman hina akllarqasunkichis, Santo Espiritutaq t'aqarqasunkichis Jesucristota kasunaykichispaq, yawarninwan ch'uyanchasqa kanaykichispaqwan. Diosmi sumaqta qhawarisunkichis thak-kaytapas qosunkichis.

³Señorninchis Jesucristoq Yayan Diosta yupaychasun, paymi hatun khuyapayakuyninman hina wañusqanmanta Jesucristoq kawsarimpusqanwan wakmanta nacechiwarqanchis, mana kuyuriq suyakuyniyoq kananchispaq.

⁴Chay hinapin mana ismuq, mana qhellichakuq, mana tukukuq herenciata chaskinkichis. Chaytan Diosqa qankunapaq hanaq pachapi waqaychashan.

⁵Qankunaqa Diospi iñisqaykichisraykun paypa atiyninpi waqaychasqa kashankichis qespichisqa kanaykichis p'unchaykama, chay qespikuytan Diosqa wakichirqan p'uchukay p'unchaypi rikuchinanpaq.

⁶Chaymi qankunaqa kusisqallapuni kashankichis, huk pisi tiempollapaq imaymana sasachakuyta muchushaspaykichispas.

⁷Imaynan qoritaqa ninapi probanku allin mana allin kasqanta yachanapaq, chay hinan iñiyniykichispas chay sasachakuykunawan probasqa kashan, hinaña iñiyniykichisqa aswan chaniyoq tukukapuqlla qorimanta kashan chaypas. Ahinapin Diosqa Jesucristo rikhurimuqtin hatunchasunkichis, qhapaqchasunkichis, alabasunkichis ima.

⁸Qankunaqa manaña rikushaspapas Jesucristotan munakunkichis, manaña rikushaspapas paypiqa iñinkichismi, hinaspa mana rimay atina hatun q'ochukuywan kusikunkichis

⁹Diospa qespichisqasuykichismanta, chaypaqmi qankunaqa iñirqankichis.

¹⁰Chay qespikuymantan ñawpa tiempo profetakunaqa*f** makilla maskhaspa tapupakurqanku. Paykunan willakurqanku imaynatachus Diosqa khuyapayanasuykichismanta.

¹¹Profetakunapi*f** kashaq Cristoq Espiritunmi ñawpaqmantaña willarqan Cristoq ñak'arinankunata, chay qhepatataq qhapaqchasqa kanantawan. Chaymi paykunaqa pichus chay runa kananta, hayk'aqtaqchus kanantawan t'aqwirqanku.

¹²Diosmi profetakunaman*f** rikuchirqan willasqanku simikunaqa mana paykunapaqchu kasqanta, aswanpas qankunapaq kasqanta. Chay profetakunaq*f** willasqankutan kunan allin willakuykunata willaqkunaqa willarqasunkichis hanaq pachamanta kachamusqa Santo Espirituq atiyninwan. Chaykunatan kikin angelkunapas yachaytapuni munanku.

¹³Chayrayku, allintapuni yuyaykuychis imatachus ruwanaykichista, hinaspa allin yuyaywan kawsaychis. Allin-allintapuni suyakuychis Jesucristo rikhurimuqtin Diospa qonasuykichis saminchata.

¹⁴Kasukuq wawakuna hina kaychis, ama Diosta manaraq reqsishaspa kawsasqaykichis millay munayniykichisman hinaqa kawsaychischu.

¹⁵Aswanpas imaynan waqyaqniykichis Diosqa ch'uya, chay hinallataq qankunapas tukuy kawsayniykichispi ch'uya kaychis.

¹⁶Diosmi nin: Ch'uya kaychis, ñoqa ch'uya kasqayrayku, nispa.

¹⁷Diosqa runakunaq rikch'ayninta mana qhawaspallan sapankata ruwasqanman hina juzgan, paytan “Yayáy” nispa ninkichis, chayrayku kay pachapi tukuy kawsasqaykichis p'unchaykuna Diosta manchakuspa kawsaychis.

¹⁸Qankunaqa yachankichismi ñawpa machulaykichismanta yachaqakusqaykichis yanqa kawsayniykichismanta Diospa kacharichisqanña kasqaykichista. Chay kacharichiyqa manan tukukuq qoriwanchu otaq qolqewanchu pagasqa karqan,

¹⁹aswanpas mana imanasqa mana qhelliyoq borregoq hina Cristoq ancha chaniyoq yawarninwanmi.

²⁰Paymi manaraq kay pacha kamasqa kashaqtin chaypaq nisqaña karqan, ichaqa qankunaraykun kay qhepa tiempokunapi rikuchisqa karqan.

²¹Diosmi wañusqanmanta Cristota kawsarichimpurqan, hinaspan payta hatuncharqan, hinan paypa ruwasqanrayku Diospi iñinkichis, ahinapin iñiyniykichispas suyakuyniykichispas Diospipuni kashan.

²²Kunanqa cheqaq-kay willakuyta kasuspaqa kikiykichistan ch'uyanchakunkichisña, wawqe-panapura ch'uya sonqowan munanakunaykichispaq. Chay hinaqa, tukuy sonqopuni munanakuychis.

²³Qankunaqa wakmantan nacerqankichis manan wañupuqlla taytamantachu, aswanpas Diospa siminwanmi mana wañuq taytamanta nacerqankichis. Chay simiqa wiñay-wiñaypaq kawsaqmi.

²⁴Diospa Simin Qelqan nin: Llapa runapas qora hinallan, runaq tukuy sumaq-kayninpas qora t'ika hinallan. Qoran ch'akipun, t'ikantaq urmapun,

²⁵Señorpa siminmi ichaqa wiñaypaq takyan, nispa. Chay simin qankunaman willasqa allin willakuykunaqa.