Read Quechua Cuzco Bible 1988 1 PEDRO 2 Bible Online

1 PEDRO 2 - Quechua Cuzco Bible 1988 bible

1 PEDRO 2

¹Chayrayku, tukuy mana allin ruwaytapas, tukuy llullakuytapas, iskay uya kaytapas, envidiakuytapas, tukuy imaymana mana allin rimaytapas wikch'upuychis,

²hinaspa chayllaraq nacesqa wawakuna hina Santo Espirituq qosqan mana chhaqrusqa lecheta anchatapuni munaychis, chaywan wiñaspa qespichisqa kanaykichispaq.

³Qankunaqa yachankichisñan Señorpa sumaq sonqo kasqantaqa.

⁴Señormi kawsaq rumiqa, paytan runakunaqa wikch'urqanku, Diospaqmi ichaqa akllasqa ancha chaniyoq kawsaq rumi.

⁵Payman asuykuqtiykichismi, qankunawan kawsaq rumikunawan hina Santo Espirituqa yupaychana wasita perqashan Diospaq t'aqasqa sacerdotekuna kanaykichispaq, Santo Espirituq yanapasqan kaspa Jesucristowan Diospa sonqonman chayaqtapuni sacrificiokunata haywanaykichispaq.

⁶Chayraykun Diospa Simin Qelqapas nin: Ñoqan Sión llaqtapi esquina hap'iq rumita churani, akllasqa ancha chaniyoq rumita churani, paypi iñiqqa manan p'enqapichu kanqa, nispa.

⁷Chayrayku, qankuna iñiqkunapaqqa ancha chaniyoqmi chay rumiqa, mana iñiqkunapaqmi ichaqa, Diospa Simin Qelqa hunt'akun. Chaypin nin: Wasi sayarichiqkunaq wikch'usqan rumin esquina hap'iq kapun, nispa.

⁸Nillantaqmi: Paymi misk'ana rumi, paymi urmachiq qaqa, nispa. Paykunaqa Diospa siminta mana kasuspankun misk'anku, chaypaq unanchasqapunitaq karqankupas.

⁹Qankunan ichaqa Diospa akllakusqan ayllu kankichis, reyta serviq sacerdotekuna, Diospaq t'aqasqa runakuna, Diospa llaqtanpunitaq kankichispas. Diosmi laqhayaqmanta sumaq k'anchayninman waqyaspa akllakurqasunkichis paypa musphay ruwasqankunata willanaykichispaq.

¹⁰Ñawpaqqa manan llaqtanchu karqankichis, kunanmi ichaqa Diospa llaqtan kapunkichis. Ñawpaqqa manan Diosqa khuyapayarqasunkichischu, kunantaq Diospa khuyapayasqaña kashankichis.

¹¹Munasqa wawqe-panaykuna, valekuykichismi wak llaqtayoqkunata, purikuqkunata hina, amapuni runaq millay munasqankunataqa ruwaychischu, chaykunaqa almaq contranpin maqanakushan.

¹²Diospi mana iñiqkuna ukhupi allintapuni kawsaychis. Ahinapin paykunaqa contraykichispi mana allin ruwaqkunamanta hina rimashaspapas allin ruwasqaykichista rikuspanku Diosta yupaychanqaku, cuenta mañaq pay kutimuqtin.

¹³Señor-rayku kasukuychis runaq churasqan llapa kamachikuqkunata, Roma suyu hatun reytapas qollana kamachikuq kasqanrayku.

¹⁴Kasukullaychistaq kamachikuqkunatapas, paykunatan hatun reyqa churan mana allin ruwaqkunata muchuchinanpaq, allin ruwaqkunatataq sumaqta rikunanpaq.

¹⁵Diosqa munanmi allinkaqta ruwaspaykichis, mana yuyayniyoq runakunaq thawtisqanta ch'inyachinaykichista.

¹⁶Kamachi-kaymanta kacharichisqa runakuna hina puriychis, ichaqa paqtataq kacharichisqa kaspaykichis mana allinkaqta ruwawaqchis, aswanpas Diospa kamachinkuna hina puriychis.

¹⁷Respetaychis lliwta. Munakuychis iñiq-masiykichiskunata. Manchakuychis Diosta. Respetaychis hatun reyta.

¹⁸Kamachikuna, patronniykichiskunata tukuy manchakuywan kasuychis, ama sumaq khuyapayakuq kaqkunallatachu, aswanpas phiña kaqkunatapas kasuychis.

¹⁹Pipas Diospa munayninta yachaspa, mana ima huchanmanta muchuchisqa rikukuspa pacienciakun chayqa, Diosmi allinpaq hap'inqa.

²⁰Huchaykichis hawachus muchuchisqa kawaqchis chayqa, ¿ima allintaq kanman, pacienciawanña muchuwaqchis chaypas? Ichaqa allinkaqta ruwaspaykichischus pacienciawan muchunkichis chayqa, Diosmi allinpaq hap'isunkichis.

²¹Chaypaqpunin Diosqa waqyarqasunkichis, Cristopas ñoqanchisraykun muchurqan, muchusqanta qhawarispanchis yupinta qatikunanchispaq.

²²Payqa manan huchallikurqanchu, manataqmi pitapas q'oturqanchu.

²³Payqa k'amishaqtinkupas manan k'amipakullarqantaqchu, ñak'arichishaqtinkupas manan amenazarqanchu, aswanmi chaninninpi juzgaq Diosman hap'iykachikurqan.

²⁴Kikin Criston huchanchiskunatapas cruzpi chakatasqa kaspa cuerponpi aparqan, huchakunapaq wañuspanchis chanintapuni kawsananchispaq. Paypa k'irinkunawanmi qhaliyachisqapas karqankichis.

²⁵Ñawpaqqa chinkasqa oveja hinan purisharqankichis, kunanmi ichaqa kutimpunkichisña cuidaqniykichis michiqniykichis Cristoman.