Read Quechua Cuzco Bible 1988 1 PEDRO 3 Bible Online

1 PEDRO 3 - Quechua Cuzco Bible 1988 bible

1 PEDRO 3

¹Qankunapas, casarasqa warmikuna, qosaykichista kasuychis. Ahinapin Diospa siminpi mana iñiq mayqen qosapas warminpa allin purisqanta, ch'uya kawsasqanta manchakuyniyoq kasqanta rikuspa iñinqaku, warminpa mana rimapayasqallan.

³Sumaqchakuyniykichisqa ama hawaman rikukuqllachu kachun, ama k'achanchasqa chukchawanchu, ama qoriwan k'achanchasqachu, ama sumaqchasqa p'achawanpaschu,

⁴aswanpas sonqoykichis sumaqchasqa kachun llamp'u sonqo-kaywan, t'anta sonqo-kaywan. Chay hina sumaqchasqa-kaymi mana tukukuqqa, Diospa ñawpaqenpipas ancha chaniyoq.

⁵Diosman hap'ipakuq ñawpa tiempo ch'uya warmikunaq sumaqchakuyninpas chay hinan karqan. Paykunan qosankuta kasurqanku.

⁶Chay hinatan Sarapas Abrahamta kasurqan, chaymi payta nirqan: Wiraqocháy, nispa. qankunapas allinkaqtachus ruwankichis, manataqchus imatapas manchakunkichis chayqa, Saraq ususinkunan kankichis.

⁷Kaqllataq qankunapas qosakuna, warmiykichiswan allin yuyaywan kawsaychis. Qankunaqa paykunamanta aswan kallpayoq kaspa sumaqta paykunata rikuychis, khuyakuyninpi Diospa qosqan wiñay kawsayta chaskiq-masiykichista hina. Ahinapin Diosmanta mañakuyniykichis mana hark'asqachu kanqa.

⁸Kunantaq, llapallaykichis huk sonqolla kawsaychis, llakipayanakuspa, qankuna pura munanakuspa, khuyapayanakuspa, llamp'u sonqo kaspaykichis ima.

⁹Ama mana allinmanqa mana allinllawantaq kutichiychischu, k'amisuqtiykichisqa ama k'amillaychistaqchu, aswanpas saminchaychis, Diosqa waqyarqasunkichis hukkunata saminchanaykichispaqmi.

¹⁰Diospa Simin Qelqan nin: Pipas kawsayta munakun, sumaq p'unchaykunatataq rikuytapas munan chayqa, ama qallunqa mana allinkaqta rimachunchu, ama siminpas llullakuyta rimachunchu.

¹¹Mana allinkaqmanta t'aqakuchun, hinaspa allinkaqta ruwachun, hukkunawan sumaq kawsayta maskhachun, hinaspa chaypi purichun.

¹²Señorqa chanin runakunatan qhawashan, mañakusqankutapas makillan uyarishan. Ichaqa mana allin ruwaqkunaq contranpin kashan, nispa.

¹³¿Pitaq mana allinta ruwasunkichisman, allinkaqtapuni ruwashaqtiykichisqa?

¹⁴Chaninkaqta ruwasqaykichisraykuchus muchuchisunkichis chayqa, ¡kusisamiyoqmi kankichis! Chayrayku, ama paykunataqa manchapakuychischu, amataq llakipakuychispaschu.

¹⁵Aswanpas Cristota sonqoykichispi yupaychaychis, Señorninchis kasqanta reqsispa. Suyakuyniykichismanta pipas tapuqniykichisman kutichinaykichispaqqa wakichisqallapuni kashaychis,

¹⁶hinaspa kutichiychis llamp'u sonqowan respetowan. Allintapuni kawsaychis concienciaykichis allin kananpaq, ahinapin Cristopi iñiqkuna hinapuni allin kawsasqaykichismanta k'amiqniykichiskunaqa mana allin rimasqankumanta p'enqachisqa kanqaku.

¹⁷Dios munaqtinqa, aswan allinmi allinkaqta ruwaspa ñak'arinaykichisqa, mana allinkaqta ruwaspa ñak'arishanaykichismantaqa.

¹⁸Cristopas huk kutillatan huchanchiskunarayku wañurqan. Payqa chanin kashaspanmi mana chaninkunarayku wañurqan, Diosman pusanasuykichispaq. Cuerpopin wañuchisqa karqan, espiritupitaq kawsarichimpusqa karqan.

¹⁹Chay kikin espiritullapitaqmi rispan preso kashaq espiritukunamanpas willamurqan.

²⁰Paykunan ñawpa tiempopi mana kasukurqankuchu, Noepa tiemponpi tuyuq wasita wakichishaqtin, pacienciawan Dios suyashaqtin. Chay tuyuq wasipin pusaq runakunalla unumanta qespichisqa karqanku.

²¹Chay unuqa bautismo unumanmi rikch'akun, kunanmi Jesucristoq kawsarimpusqanwan bautismoqa qespichiwanchis. Bautismoqa manan cuerpoq qhellinta maylliychu, aswanpas Diosman ch'uya concienciawan prometekuymi.

²²Jesucriston hanaq pachaman wicharipuspa Diospa pañaneqenpi kashan, paytan angelkunapas, kamachikuqkunapas, atiyniyoqkunapas kasunku.