Read Quechua Cuzco Bible 1988 1 PEDRO 5 Bible Online

1 PEDRO 5 - Quechua Cuzco Bible 1988 bible

1 PEDRO 5

¹Kunanqa, qankuna ukhupi kaq uma runakunatan valekuykichis. Ñoqapas qankuna hina uma runallataqmi kani, Cristoq ñak'arisqankunamantapas testigo kani. Hatun atiyninpi Cristo rikhurimuqtinmi paywan kuska kasaq. Chaymi valekuykichis,

²qankunaman hap'ichisqa kashaq Diospa ovejankunata allintapuni michiychis, makilla qhawaspa, ama kamachisqa hinachu, aswanpas munayllaykichismanta. Ama qolqeraykullachu, aswanpas tukuy sonqo llank'aychis.

³Ama michisqaykichista munaychakuq hinachu, aswanpas paykunapaq yachaqakuna hina kaychis.

⁴Hinan michiqkunaq Qollanan rikhurimuqtin, sumaq k'anchashaq coronata chaskinkichis, chayqa mana hayk'aq tukukuqmi.

⁵Hinallataq qankunapas, wayna-sipaskuna, kurak runakunata kasuychis, llapaykichistaq k'umuykukuspa yanapanakuychis. Diospa Simin Qelqan nin: Diosqa hatunchakuqkuna contran sayarin, k'umuykukuqkunatataq munakuyninwan yanapaykun, nispa.

⁶Chayrayku k'umuykukuychis yanapananpaq atiyniyoq Diosman, tiempo chayamuqtin pay hatunchanasuykichispaq.

⁷Tukuy llakikuyniykichista Diosman saqeychis, paymi qankunataqa qhawashasunkichis.

⁸Allin yuyayniyoq kaychis, makillapuni cuidakuychis, awqaykichis saqraqa qaparishaq león hinan tukuyneqta purishan pitapas oqoykunanpaq maskhaspa.

⁹Saqra contra qaqata sayaychis, iñiyniykichispipas allintapuni takyaychis, chay kikin llakikunallatataq kay pachantinpi kaq iñiq-masiykichiskunapas muchushasqanta yachaspa.

¹⁰Tukuypi khuyapayakuq Diosmi Jesucristowan hukllachasqa kaqtinchis waqyawarqanchis wiñay k'anchayninpi paywan kananchispaq, payqa huk chhikanta muchusqaykichis qhepatañan hunt'asqata ruwasunkichis, kallpachasunkichis, qaqatataq takyachisunkichispas.

¹¹Paypaq hatun kamachikuypas wiñay-wiñaypaq kachun. Ahinapuni kachun.

¹²Hunt'aq wawqe Silvanowanmi kay pisilla qelqasqa cartata apachimuykichis, qankunata kunaspa, imaynachus Diospa cheqaq munakuynin kasqanta sut'inchaspa. Chay munakuypi allintapuni sayashaychis.

¹³Babilonia[1] llaqtapi kaq akllasqa-masiykichis Diospi iñiq t'aqan napaykamusunkichis, hinallataq iñiypi churiy Marcospas.

¹⁴Munanakuywan abrazaykunakuspa napaykunakuychis. Llapallaykichis Jesucristopi iñiqkunawan thak-kay kachun.