Read Quechua Cuzco Bible 1988 2 PEDRO 1 Bible Online

2 PEDRO 1 - Quechua Cuzco Bible 1988 bible

2 PEDRO 1

¹Ñoqa Simón Pedron Jesucristoq kamachin, paypa apostolnin*f** kani. Kay cartatan qelqamuykichis ñoqayku hina chanin iñiyniyoqkunaman. Chay hinataqa iñinkichis Diosninchis Qespichiqninchis Jesucristo chanin kasqanraykullan.

²Diostapas Señorninchis Jesucristotapas reqsisqaykichisrayku, Diosqa anchatapuni saminchasunkichis thak-kaytapas qosunkichis.

³Criston waqyawarqanchis pay hina sumaq sonqo kananchispaq sumaq k'anchayninpi paywan kuska kananchispaqwan, chay hinaqa payta reqsiqtinchismi hatun atiyninwan tukuy necisitasqanchista qowarqanchis Dios sonqo kawsananchispaq.

⁴Chaymi ancha chaniyoq ancha hatun prometewasqanchis qokuykunata qowarqanchis, Dios-kayninmanta chaskiq-masi kananchispaq, hinaspa kay pachapi kashaq millay munapakuykunamanta ayqenanchispaq.

⁵Chayrayku qankunapas allintapuni kallpachakuspa yapaykukuychis iñiyniykichisman allin kawsayta, allin kawsaymantaq yachayta,

⁶yachaymantaq cuerpowan kasuchikuyta, cuerpowan kasuchikuymantaq pacienciata, pacienciamantaq Dios sonqo-kayta,

⁷Dios sonqo-kaymantaq wawqe-pana munanakuyta, wawqe-pana munanakuymantaq llapa runa munakuyta.

⁸Lliw chaykunachus qankunapi kashan, askhayashantaqchus kanpas chayqa, Señorninchis Jesucristota reqsispan allinta llank'ankichis, hinan llank'asqaykichisqa mana yanqanpaqchu kanqa.

⁹Pipas mana chaykunayoq kaqmi ichaqa ñawsa hina, pisilla rikuq hina, ñawpa huchankunamanta pampachasqa kasqantapas qonqarqapun.

¹⁰Chayrayku, wawqe-panaykuna, astawanraq kallpachakuychis, Diospa waqyasqan kasqaykichispipas paypa akllasqan kasqaykichispipas allin takyasqa kanaykichispaq. Chaykunatachus ruwankichis chayqa, manan hayk'aqpas urmankichischu.

¹¹Chay hinapin, Señorninchis Qespichiqninchis Jesucristoq wiñay kamachikushasqanman sumaq chaskiykusqa haykuykapunkichis.

¹²Chayraykun, chaykunataqa yuyarichishallasqaykichispuni, yachashankichisña chaypas, cheqaq-kaypi kunan allintaña sayashankichis chaypas. Señorninchis Jesucriston willawanña pisillataña kay pachapi kawsanayta.

¹³Ñoqamanqa allinpuni rikch'akuwan, kawsanaykamaqa kay yuyaychaykunawan qankunata anyaykuyniy.

¹⁵Ñoqapas tukuy sonqon kallpachakusaq, wañukapusqay qhepata chaykunata yuyariqllapuni kanaykichispaq.

¹⁶Señorninchis Jesucristoq atiywan hamunanmanta qankunaman willasqaykuqa, manan yachaywan rimasqa cuentokuna hinachu karqan, aswanpas ñoqayku kikiykun ñawiykuwan Señorta hatun atiyninpi rikurqayku.

¹⁷Paytan rikurqayku Dios Yayamanta yupaychayta hatunchaytawan chaskisqanta. Hatun k'anchaymantan Diosqa nimurqan: Kaymi munasqa Churiy, paymi kusichiwan, nispa.

¹⁸Ñoqayku kikiykun chay kunkataqa hanaq pachamanta rimamuqta uyarirqayku, Diospa akllasqan orqopi Cristowan kuska kashaspayku.

¹⁹Ñoqanchisqa hap'illanchistaqmi aswan cheqaqkaq simitapas, chay simikunatan profetakuna*f** qelqarqan. Chay simikunata makilla uyarispaykichisqa allintan ruwankichis, laqhayaqpi k'anchashaq lamparata hina, pacha illarimunankama, pacha paqariy ch'askapas lloqsimuspa sonqoykichista k'anchaykunankama.

²⁰Ichaqa kaytan ñawpaqtaqa entiendenaykichis: Diospa Simin Qelqapi profetakunaq*f** lliw willakuyninkunaqa manan sapankanchispa munasqanchisman hina sut'inchanapaqchu.

²¹Manan hayk'aqpas profetakunaqa*f** runakunaq munayninman hinachu rimarqanku, aswanpas paykunan Santo Espirituq yuyaychasqan kaspa Diosmanta rimarqanku.