Read Quechua Cuzco Bible 1988 2 PEDRO 2 Bible Online

2 PEDRO 2 - Quechua Cuzco Bible 1988 bible

2 PEDRO 2

¹Israel llaqta ukhupipas karqanmi llulla profetakuna*f**, chay hinallataqmi qankuna ukhupipas llulla yachachiqkuna kanqa. Paykunan pantachiq q'ewisqa yuyaykuyninkuta pakallapi yachachinqaku, ahinapin huchamanta kacharichiqninku Señortapas neganqaku. Chaykuna ruwasqankuwanmi paykunallataq qonqaylla ch'usaqyachisqa kapunqaku.

²Askhataqmi paykuna hina imaymana huchakunapi kawsanqaku, chaymi paykuna hawa cheqaq-kay ñanmanta runakuna millayta rimanqaku.

³Chay yachachiqkunan qolqeta sinchita munaspanku llulla yachachikuykunata yachachispa qankunamanta qolqeta sik'isunkichis, ichaqa unay tiempomantañan paykunaqa huchachasqa karqanku, chaymi muchuchisqa kanankuqa makillaña suyashan.

⁴Diosqa manan pampacharqanchu huchallikuq angelkunatapas, aswanmi tutayaq Ukhu-pachaman wikch'uykurqan, hinaspa laqhayaq ukhuman watasqata wisq'aykurqan taripay p'unchaypaq waqaychasqa kanankupaq.

⁵Manallataqmi Diosqa ñawpa runakunatapas pampacharqanchu, aswanmi unuwan millp'uchirqan waqllisqa millay runakunata, ichaqa chanin kawsayta willaq Noellatan qespichirqan, wakin qanchis runakunatawan kuska.

⁶Hinallataq Sodoma Gomorra llaqtakunatapas thunisqa kanankupaq huchachaspa usphaman tukunankukama ruphachirqan, ahinapi chay qhepata kawsaq millay runakuna wananankupaq.

⁷Ichaqa chanin runa Lot-tan qespichirqan, chay waqllisqa runakunaq millay kawsayninkuwan llakichisqa kashaqtin.

⁸Chay chanin runaqa paykunawan tiyaspanmi millay mana chanin ruwasqankuta rikuspa uyarispa maytapuni sapa p'unchay sonqonpi llakikurqan.

⁹Chay hinaqa Señorqa yachanmi payta manchakuqkunata sasachakuymanta qespichiyta, mana chanin runakunatataq taripay p'unchaypi ñak'arichisqa kanankupaq waqaychayta.

¹⁰Astawanqa muchuchinqa aychaq millay munaynin qhelli-kaypi kawsaqkunata, Diospa kamachikuq-kayninta pisichaqkunatapas. Chaykunaqa k'ankaykachaq k'ullukunan kanku, manataqmi manchakunkuchu hanaq pachapi atiyniyoqkuna k'amiytapas.

¹¹Ichaqa kikin angelkunapas aswan kallpayoq atiyniyoq kashaspankupas manan chay atiyniyoqkunataqa Señorpa ñawpaqenpi k'amispa huchachankuchu.

¹²Chay runakunaqa uywa hina mana yuyayniyoqmi kanku, cuerponkuq munasqanman hinallan kawsanku, nacenkupas hap'ispa wañuchisqa kanankupaqmi, mana entiendesqankuta ñakaspankutaq waqllisqankupi wañunqaku.

¹³Hukkunata ñak'arichisqankuman hinan ñak'arinqaku. Paykunaqa p'unchaypacha mana chanin chinkay kawsaypi purisqankutan allinpaq yuyanku. Qankunawanraqtaqmi paykunaqa mikhunankupaq huñukunku, ichaqa sinchi p'enqaymi millaymi kanku, qankunata q'otuspataq kusikunku.

¹⁴Warmita rikuspaqa wasanchay huchatan ruwayllataña munanku, manataqmi huchallikuywan amikunkuchu. Iñiypi mana takyasqa runakunaq sonqontan suwanku. ¡Imaymanata munapayanapaqmi allin yachachisqa kanku! ¡Diospa ñakasqan runakunan kanku!

¹⁵Cheqaq ñanmanta waqllispan chinkapunku, Beorpa churin profeta*f** Balaampa kawsasqanta hinan kawsanku, paymi mana chaninta ruwaspa qolqe tariyta munarqan,

¹⁶chaymi mana rimaq china asno runa hina rimaspa mana chanin ruwasqanmanta k'amirqan, ahinapin profetaq*f** mana yuyayniyoq kayninta hark'arqan.

¹⁷Chay runakunaqa mana unuyoq pukyukuna hinan kanku, sinchi wayraq apamusqan phuyu hinan kanku, paykunaqa laqha tutayaqpi wiñay kanankupaq huchachasqañan kanku.

¹⁸Anchaykachaq yanqa simikunatan rimanku, hinaspa aychaq millay munayninwan chinkaypi kawsanankuta yuyaychaspa pantaypi kawsaqkuna ukhumanta ayqekapushaq runakunaq sonqonta suwanku.

¹⁹Kacharichisqa-kaytan paykunaman prometenku, ichaqa paykuna kikinkun qhelli kawsaypa watasqan kanku. Pipas atipachikun chayqa, chay atipaqninpa kamachinmi kapun.

²⁰Qespichiq Señor Jesucristota reqsispaña kay pachaq qhelli-kayninmantapas ayqeshaspaña, wakmanta chaykunapi waqllispa atipachikunqaku chayqa, aswan mana allinraqmi kanqaku ñawpaq kasqankumantaqa.

²¹Aswan allinmi kanman karqan paykunapaqqa chanin-kay ñanta mana reqsiyninku, chayta reqsispaña paykunaman qosqa ch'uya kamachikuymanta t'aqarikapunankumantaqa.

²²Kay rikch'anachiy simin paykunapi hunt'akun: Alqon mikhuykakapun kutichimusqanta, chayllaraq mayllisqa khuchipas t'urumanmi qhospaykapun, nispa.