Read Quechua Cuzco Bible 1988 1 JUAN 2 Bible Online

1 JUAN 2 - Quechua Cuzco Bible 1988 bible

1 JUAN 2

¹Wawallaykuna, chaykunatan qelqamuykichis ama huchallikunaykichispaq. Pipas huchallikun chayqa, kanmi Yayaq ñawpaqenpi abogadonchis, paymi chanin Jesucristo.

²Paymi huchanchiskunata pampachachinanpaq wañurqan, manataqmi ñoqanchispa huchallanchismantachu, aswanpas lliw runakunaq huchankumantawanmi wañurqan.

³Diospa kamachikuy siminkunatachus kasukunchis chayqa, yachanchismi payta reqsisqanchista.

⁴Pipas nin: Ñoqaqa Diosta reqsinin, nispa, ichaqa manataq kamachikusqankunata kasukunchu chayqa, llullan, manataqmi Diospa cheqaq-kayninqa sonqonpi kanchu.

⁵Aswanpas Diospa siminta kasukuqmi cheqaqtapuni tukuy sonqowan Diosta munakun. Chaypin yachanchis paywan hukllachasqa kashasqanchista.

⁶“Dioswan hukllachasqan kashani” niqqa, imaynatan Jesucristo kawsarqan, ahinata kawsachun.

⁷Munasqay wawqe-panaykuna, manan mosoq kamachikuytachu qelqamuykichis, aswanpas qallariymantapacha yachasqaykichis ñawpa kamachikuytan. Chay ñawpa kamachikuyqa uyarisqaykichis willakuymi.

⁸Chaywanpas chay kamachikuyqa mosoqllan kashan, laqhayaqqa ñan chinkapushanña, cheqaq k'anchaytaq kanchashanña, chaymi Cristoq kawsayninpipas qankunaq kawsayniykichispipas chay kamachikuyqa cheqaq kasqan rikhurin.

⁹Pipas “k'anchaypin kashani” nishaspa iñiq-masinta cheqnikuqqa laqhayaqpiraqmi kashan.

¹⁰Pipas iñiq-masinta munakuqmi ichaqa k'anchaypi kawsan, manataqmi paypiqa huchaman urmaypas kanchu.

¹¹Iñiq-masinta cheqnikuqmi ichaqa laqhayaqpi kawsanpas purinpas, manataqmi yachanchu maymanchus rishasqanta, ñawinta tutayaq ñawsayachisqanrayku.

¹²Wawallaykuna, qankunamanmi qelqamuykichis, Jesucristorayku huchaykichiskunata Dios pampachaqtin.

¹³Tayta-mamakuna, qankunamanmi qelqamuykichis, qallariypipas kasqapuniña chay Cristota reqsisqaykichisrayku. Wayna-sipaskuna, qankunamanmi qelqamuykichis, saqrata atipasqaykichisrayku. Wawakuna, qankunamanmi qelqamuykichis, Yayata reqsisqaykichisrayku.

¹⁴Tayta-mamakuna, qankunamanmi qelqamuykichis, qallariypipas kasqapuniña chay Cristota reqsisqaykichisrayku. Wayna-sipaskuna, qankunamanmi qelqamuykichis, kallpayoq kasqaykichisrayku, Diospa Simin sonqoykichispi kasqanrayku, saqratapas atipasqaykichisrayku.

¹⁵Ama kay pachata munakuychischu, amallataq chaypi kaqkunatapas munakuychischu. Pipas chaykunata munakuqqa manan Yayata munakunchu.

¹⁶Kay pachaq kaqninkunaqa manan Dios Yayamantachu paqarimun, aswanpas kikin kay pachamantan. Chaykunaqa runaq millay munayninmi, ñawiq rikusqan millaykuna munapayaymi, kay pacha kawsaypi kaqkunawan hatunchakuymi.

¹⁷Kay pachaqa tukukapushanmi, tukuy imaymana mana chanin munayninkunapiwan. Diospa munayninta ruwaqmi ichaqa wiñaypaq kawsanqa.

¹⁸Wawallaykuna, p'uchukay tiempoqa ñan chayamushanña, uyarirqankichismi Cristo contra sayariqpa hamunanta, kunanpas askhañan Cristo contra sayariqkuna rikhurimunku, chayraykun yachanchis p'uchukay tiempo chayamushasqanta.

¹⁹Paykunan ñoqanchis ukhumanta lloqsipurqanku, ichaqa manan iñiq-masinchiskunapunichu karqanku, iñiq-masinchis kankuman karqan chayqa, ñoqanchiswanchá kashankuman karqan. Paykunaqa lloqsipurqanku mana mayqenninkupas iñiq-masinchis kasqankuta yachanapaqmi.

²⁰Qankunamanqa Criston Santo Espirituta qorqasunkichis, chaymi llapaykichis cheqaq-kayta reqsinkichis.

²¹Cheqaq-kayta reqsiqman hinan qelqamuykichis, qankunaqa allintapunin chayta reqsinkichis, cheqaq-kaymantaqa manataqmi ima llullakuypas paqarimunmanchu.

²²¿Pitaq llullari? Pichus Jesusta “manan Diospa Akllasqan Cristochu” niqmi llullaqa. Chay runan Cristo contra sayariqqa, paymi Yayatapas Churitapas negaqqa.

²³Pipas Churita negaqqa manan Yayawan hukllachasqachu kashan. Pipas Churita reqsiqmi ichaqa Yayawan hukllachasqa kashan.

²⁴Chayrayku qallariymantapacha uyarisqaykichis Diospa siminta sonqoykichispi waqaychaychis, chay hina kaqtinqa qankunapas Yayawan Churiwan hukllachasqan kashankichis.

²⁵Chaymi wiñaykawsayqa, chaytan Jesucristoqa prometewarqanchis.

²⁶Chaykunatan qelqamuykichis qankunata pantachiyta munaqkuna hawa.

²⁷Ichaqa, Jesucristomanta chaskisqaykichis Santo Espiritun qankunapi kashan, chaymi mana hukpa yachachinanraqchu kankichis, aswanpas kikin Santo Espiritun lliwta yachachisunkichis, yachachikuyninqa manataqmi llullachu, aswanpas cheqaqpunin. Chhaynaqa, imaynan Santo Espíritu yachachirqasunkichis chayman hina Cristowan hukllachasqa kawsaychis.

²⁸Kunanqa wawallaykuna, Cristowan hukllachasqa kaychis, pay rikhurimuqtin ñawpaqenpi ama manchapakuspa p'enqakunanchispaq.

²⁹Qankunaqa yachankichismi Jesucristoq chanin kasqanta, chayrayku yachallaychistaq pikunachus chaninkaqta ruwaqkunaqa Diospa wawankuna kasqankuta.