Read Quechua Cuzco Bible 1988 1 JUAN 4 Bible Online

1 JUAN 4 - Quechua Cuzco Bible 1988 bible

1 JUAN 4

¹Munasqay wawqe-panaykuna, askha llulla profetakunan*f** kay pachantinman puririshan, chayrayku ama “Diospa yuyaychasqanmi rimashani” niqkunataqa llapantachu creeychis, aswanpas allinta tapuykuychis paykunapiqa Diospa Espiritun kanchus icha manachus chayta yachanaykichispaq.

²Diospa Espiritunwan kashaqtaqa kaypin reqsinkichis: Pipas Jesucristoq runa-kaypi cheqaqtapuni hamusqanta sut'ita rimariqqa, Diospa Espiritunwanmi kashan.

³Jesucristoq runa-kaypipuni hamusqanta mana sut'itachu rimaqpin ichaqa, Diospa Espiritun mana kanchu, aswanpas Cristo contra sayariqpa espiritunmi paypi kashan. Qankunaqa uyarirqankichismi Cristo contra sayariqpa rikhurimunanta, chaymi kunan kay pachapiña kashan.

⁴Wawallaykuna, qankunaqa Diospan kankichis, chaymi chay llullakunata atiparqankichis, qankunapi kashaq Diosqa kay pachapi munaychakuq saqramanta aswan atiyniyoq kasqanrayku.

⁵Paykunaqa kay pachaqmi kanku, chayraykun kay pachallamanta rimanku, Diospi mana iñiq runakunataq chaytaqa kusata uyarinku.

⁶Ñoqanchismi ichaqa Diospa kanchis. Pipas Diosta reqsiqqa uyariwanchismi, pichus Diosta mana reqsiqmi ichaqa mana uyariwanchischu. Chaypin reqsinchis pichus Diospa cheqaq-kayninta yachachiq Espirituyoq kasqanta, pitaqchus pantachiq saqra espirituyoq kasqantapas.

⁷Munasqay wawqe-panaykuna, hukkuna hukkunawan munanakusun, munakuyqa Diosmantan paqarimun. Pipas munakuqqa Diospa wawanmi, reqsintaqmi Diostapas.

⁸Mana munakuqqa manan Diosta reqsinchu, Diosqa munakuqllaña kasqanrayku.

⁹Diosqa munakuyninta rikuchiwarqanchis sapan Churinta kay pachaman kachamuspan, paypi iñispa wiñay kawsayniyoq kananchispaq.

¹⁰Kaymi munakuyqa: Manan ñoqanchischu Diostaqa munakurqanchis, aswanpas Diosmi ñoqanchista munakuwarqanchis, chayraykun Churinta kachamurqan wañusqanwan huchanchista pampachananpaq.

¹¹Munasqay wawqe-panaykuna, chay hinata Dios munakuwaqtinchismi ñoqanchispas hukkuna hukkunawan munanakunanchis.

¹²Manan pipas Diostaqa hayk'aqpas rikurqanchu. Hukkuna hukkunawanchus munanakunchis chayqa, ñoqanchisqa Dioswanmi hukllachasqa kashanchis, chaymi ñoqanchispas Dios hina munakuyniyoq kanchis.

¹³Santo Espiritunta qowasqanchispin yachanchis Diosqa ñoqanchiswan hukllachasqa kashasqanta, ñoqanchispas Dioswan hukllachasqa kashasqanchista.

¹⁴Ñoqayku kikiykun rikurqayku, hinaspan willayku: Dios Yayan Churinta kachamurqan runakunata qespichinanpaq, nispa.

¹⁵Pipas sut'ita rimarinman Jesusqa Diospa Churin kasqanta chayqa, Diosmi paywan hukllachasqa kashan, paypas Dioswantaq hukllachasqa kashan.

¹⁶Chhaynaqa, yachanchismi creenchispunitaqmi kanpas Diospa munakushawasqanchista. Diosqa munakuqllañan, munakuypi kawsaqqa Dioswanmi hukllachasqa kashan, Diospas paywantaq hukllachasqa kashan.

¹⁷Imaynachus Jesucristo kashan, chay hinallataqmi ñoqanchispas kay pachapi kashanchis, ahinapin Diospa munakuyninwan hunt'a kashanchis, hatun taripay p'unchaypi mana manchasqa kashananchispaq.

¹⁸Munakuypiqa manan manchapakuy kanchu, aswanmi cheqaq munakuyqa manchapakuyta wikch'un. Manchapakuqqa muchuchinatan manchakun, chaymi payqa Diospa munakuyninwan mana hunt'achu kashan.

¹⁹Ñoqanchisqa Diostan munakunchis, ñawpaqtaraq pay munakuwasqanchisrayku.

²⁰Pipas iñiq-masinta cheqnikushaspa: Ñoqaqa munakunin Diosta niqqa llullan. Rikushasqan iñiq-masinta mana munakunchu chayqa, ¿imaynatan munakunman mana rikusqan Diostaqa?

²¹Paymi kay kamachikuyta unanchapuwarqanchis: Diosta munakuqqa iñiq-masintapas munakullachuntaq, nispa.