Read Quechua Cuzco Bible 1988 1 JUAN 5 Bible Online

1 JUAN 5 - Quechua Cuzco Bible 1988 bible

1 JUAN 5

¹Pipas Jesusqa Diospa Akllasqan Cristo kasqanta iñiqqa Diospa wawanmi. Taytata munakuqqa chay taytaq churintapas munakullantaqmi.

²Diosta munakuspanchis kamachikusqankunatapas hunt'aspanchismi Diospa wawankunata munakusqanchistaqa yachanchis.

³Diosta munakuspanchisqa kamachikusqankunatan kasukunchis, kamachikuyninkunaqa manataqmi sinchi sasachu.

⁴Pipas Diospa wawan kaqqa kay pachatan atipan, kay pachata atipachiqninchisqa iñiyninchismi.

⁵¿Pitaq kay pachata atipaqqa? Pipas Jesusqa Diospa churin kasqanta iñiqmi.

⁶Jesucristoqa kay pachaman hamuspa unuwanmi bautizachikurqan, wañuspataq yawarninta hich'arqan. Payqa manan unullawanchu hamurqan, aswanpas yawarpiwanmi. Kikin Santo Espiritun chaykunataqa sut'ita willakun, payqa manataqmi llullakunchu.

⁷Willaqkunaqa kinsan[1]:

⁸Espíritu, unu, yawarpiwan, chay kinsantinqa huk sonqollan kanku.

⁹Runakunaq willawasqanchistaqa creenchismi, Diospa willawasqanchistaqa aswantaraqmi creenanchis. Kikin Diosmi pichus Churin kasqanta willawarqanchis.

¹⁰Diospa Churinpi iñiqqa Diospa willakusqanta chaskispan sonqonpi waqaychan, Diospi mana iñiqmi ichaqa Churinmanta willasqan willakuyninta mana chaskispa Diosta llullapaq hap'in.

¹¹Chay willakusqanman hinan Diosqa qowarqanchis wiñay kawsayta, chay kawsaytaqmi Churinpi kashan.

¹²Pipas Diospa Churinwan hukllachasqa kashaqqa wiñay kawsayniyoqmi, pipas Diospa Churinwan mana hukllachasqa kaqmi ichaqa mana wiñay kawsayniyoqchu.

¹³Chaykunatan qankunaman qelqamuykichis Diospa Churin Jesucristopi iñiqkunaman, wiñay kawsayniyoq kasqaykichista yachanaykichispaq.

¹⁴Ñoqanchisqa Diosman asuykuspan allintapuni yachanchis munayninman hina imatapas Diosmanta mañakuqtinchisqa pay uyariwananchista.

¹⁵Ima mañakusqanchistapas Diospa uyariwasqanchistaqa yachanchismi, tukuy mañakusqanchiskunata chaskinanchistapas yachallanchistaqmi.

¹⁶Pipas iñiq-masinta rikunqa wañuyman mana aysaykuq hucha ruwashaqta chayqa, mañapunanmi, hinan Diosqa payman kawsayta qonqa wañuyman mana aysaykuq hucha kasqanrayku. Ichaqa kanmi wañuyman aysaykuq hucha, chay huchapaqqa manan “Diosmanta mañapunan” ninichu.

¹⁷Tukuy mana chanin ruwayqa huchan, ichaqa kanmi wañuyman mana aysaykuq hucha.

¹⁸Yachanchismi Diospa wawanqa mana huchallikushallasqanta. Paytaqa Diospa Churinmi waqaychan, chaymi saqrapas mana imananpaschu.

¹⁹Yachanchismi Diospa kasqanchista, lliw kay pachataq saqraq munaychakusqan kashasqantapas.

²⁰Yachallanchistaqmi Diospa Churin hamusqanta, hinaspan payqa yuyayta qowanchis cheqaq Diosta reqsinanchispaq. Cheqaq Dioswan hukllachasqan kashanchis Churin Jesucristowan hukllachasqa kashasqanchisrayku. Jesucriston cheqaq Diospas, wiñay kawsaypas.

²¹Wawallaykuna, idolokunataqa amapuni yupaychaychischu.