Read Quechua Cuzco Bible 1988 JUECES 1 Bible Online

JUECES 1 - Quechua Cuzco Bible 1988 bible

JUECES 1

¹Josuepa wañukapusqan qhepatan Israel runakunaqa Señor Diosta tapukurqan: —¿Ñoqaykumanta mayqenkaq ayllun risaqku Canaán runakunawan maqanakuq? nispa.

²Hinan Señor Diosqa nirqan: —Judá ayllu ñawpaqta richun, paykunamanmi chay hallp'ata qoni, nispa.

³Chaymi Judá ayllu runakunaqa wawqenku Simeón ayllu runakunata mink'akurqanku: —Riysiwaychis chaskisqayku hallp'aman chaypi tiyaq Canaán runakunawan aynilla maqanakuq, chaymantaqa ñoqaykupas qankunaman qosqa hallp'aman riysillasqaykichistaqmi, nispa. Hinan Simeón ayllu runakunaqa riysirqan.

⁴Judá ayllu runakuna awqa-tinkuyman riqtinmi, Señor Diosqa Canaán runakunata Fares runakunatawan atipachirqan, chaymi Bezek llaqtapi chunka waranqa runakunata wañuchirqanku.

⁵Chaypin Bezek llaqta rey Adoni-Bezekwan tuparqanku, paywan maqanakuspataq Canaán runakunata Fares runakunatawan atiparqanku.

⁶Reyña ayqerikurqan chaypas, qatipaspan Israel runakunaqa hap'irqamurqanku, hinaspan chaki mama dedonkunata maki mama dedonkunatawan wit'urqarirqanku.

⁷Chaymi Adoni-Bezekqa nirqan: —Qanchis chunka reykunaq chaki mama dedonkunata maki mama dedonkunatawan wit'urqarispa, mesaymanta ususqakunallata pallapachirqani, chay ruwasqaymantan ñoqamanpas Diosqa kaqllawantaq kutichipuwan, nispa. Chaymantataq Jerusalenman apapurqanku, chaypitaq wañukapurqan.

⁸Judá ayllu runakunataq Jerusalenman maqanakuq phawaykurqanku, haykuspankutaq runakunata wañurachirqanku, hinaspan llaqtantinta ninawan kanaykurqanku.

⁹Chaymantataq Canaán runakunawan maqanakuq rirqanku, orqo-orqopi tiyaqkunaman, Neguev ch'inneqpi tiyaqkunaman, Shefela nisqa moqo-moqopi tiyaqkunamanwan.

¹⁰Maqanakullarqankutaq Hebronpi tiyaq Canaán runakunawanpas, chaypitaq wañuchirqanku Sesaita, Ahimanta, Talmaitawan. (Hebrón llaqtaq ñawpaq sutinmi Kiriat-arba kasqa).

¹¹Chaymantataq Judá runakunaqa Debir llaqtapi tiyaqkunawan maqanakuq rirqanku. (Debir llaqtaq ñawpaq sutinmi Kiriat-sefer kasqa).

¹²Chaypin Calebqa nirqan: —Kay llaqtata maqanakuspa atipaqmanmi ususiy Aksata warminpaq qopusaq, nispa.

¹³Hinan Calebpa wawqen Kenazpa churin Otonielqa chay llaqtata atiparqapurqan, chaymi Calebqa ususin Aksata warminpaq qopurqan.

¹⁴Casarakusqanku p'unchaytaq Aksaqa Otonielta tanqarqan Calebmanta chakrapaq hallp'ata mañakunanta. Chaymantataq warmiqa asnomanta uraykurqan, hinan Calebqa payta tapuykurqan: —¿Imatan munashanki? nispa.

¹⁵Paytaq nirqan: —Ama hinachu kay, huk qokuytawanpuni qoykuway. Ña qowankiña Neguevpi ch'aki pampata chayqa, qollawaytaq pukyukunatapas, nispa. Chaymi Calebqa altonpi uranpi pukyukunata ususinman qorqan.

¹⁶Moisespa suegron Kayin runaq mirayninkunaqa Judá ayllu runakunapiwanmi Palmerakunayoq Llaqta nisqamanta lloqsirqanku, hinaspan rirqanku Judá aylluq hallp'anpi Arad llaqta uray ch'inneqman. Chaypin Kayin runaq mirayninkunaqa Amalek runakunawan tiyarqanku.

¹⁷Chaymantataq Judá ayllu runakunaqa Simeón ayllupiwan rispanku Sefat llaqtapi tiyaq Canaán runakunata atiparqanku, hinaspan Señor Diospa sutinpi chay llaqtata thunirqanku. Chaymi chay llaqtata suticharqanku Horma[1] nispa.

¹⁸Chaymantapas atipallarqankutaqmi Gaza llaqtata, Askalón llaqtata, Ekrón llaqtatawan, muyuriqninpi hallp'ankunantintakama.

¹⁹Señor Diosmi Judá ayllutaqa yanaparqan, chaymi orqo-orqota hap'ikapurqanku. Mama Qocha qaylla pampakunapi tiyaqkunaqa fierro carretakunayoqmi karqanku, chaymi mana qarqoyta atirqankuchu.

²⁰Moisespa kamachikusqanman hinan Hebrón llaqtaqa Calebman qosqa karqan. Calebtaq chay llaqtamanta wikch'umurqan Anakpa kinsantin churinkunata.

²¹Chaywanpas Benjamín ayllu runakunaqa Jerusalenpi tiyaq Jebus runakunata manan qarqoyta atirqankuchu, chayraykun Jebus runakunaqa paykunawan hinalla tiyapurqanku.

²²Josepa miraynin ayllukunataq yuyaykurqanku Betel llaqtaman maqanakuq riyta, hinan Señor Diosqa paykunata yanaparqan. Paykunataq chay llaqtaman qhamiyaqkunata kacharqanku. (Chay llaqtaq ñawpaq sutinqa Luz nisqan kasqa).

²⁴Qhamiyaq kachasqakunataq rikurqanku llaqtamanta lloqsimushaq runata, paytan nirqanku: —Ama hinachu kay, llaqtaman haykunata rikuykachiwayku, qantaqa manan imanasqaykikupaschu, nispa.

²⁵Chay runataq llaqtaman haykunata rikuykachirqan, hinan Josepa miraynin ayllukunaqa llaqtaman haykuspa wañurachirqanku, willaqnin runatataq ichaqa familiantinta kacharparirqanku.

²⁶Hinan chay runaqa Het runakunaq suyunman ripurqan, chaypitaq mosoq llaqtata sayarichirqan Luz sutiyoqta, chay sutiwan reqsisqataq kapurqan.

²⁷Manasés ayllu runakunaqa manan qarqoyta atirqankuchu Bet-seán llaqtapi, Taanak llaqtapi, Dor llaqtapi, Ibleam llaqtapi, Meguido llaqtapiwan tiyaqkunata, manallataq muyuriqninkupi tiyaq ayllukunatapas. Chay hinapin Canaán runakunaqa kikillanpi tiyapurqanku.

²⁸Israel runakunaqa qhepaman kallpachakuspan Canaán runakunata mit'anipi llank'achirqanku, ichaqa manan qarqoyta atirqankuchu.

²⁹Efraín ayllu runakunapas manallataq qarqoyta atirqankuchu Gezer llaqtapi tiyaqkunata chaymi Canaán runakunaqa paykuna ukhupi tiyapurqanku.

³⁰Zabulón ayllu runakunapas manan qarqoyta atillarqankutaqchu. Kitrón llaqtapi Nahalal llaqtapiwan tiyaqkunata, chaymi Canaán runakunaqa paykuna ukhupi tiyarqanku mit'anipi llank'aspanku.

³¹Aser ayllu runakunapas manan qarqoyta atillarqankutaqchu Ako llaqtapi, Sidón llaqtapi, Ahlab llaqtapi, Akzib llaqtapi, Helba llaqtapi, Afek llaqtapi, Rehob llaqtapiwan tiyaq Canaán runakunata.

³²Hinaspan Aser ayllu runakunaqa chay llaqtakunata mana qarqoyta atispa paykuna ukhupi tiyarqanku.

³³Kaqllataq Neftalí ayllu runakunapas mana qarqoyta atirqankuchu Bet-semes llaqtapi, Bet-anat llaqtapiwan tiyaqkunata, aswanmi paykunata mit'anipi llank'achispanku Canaán runakuna ukhupi tiyarqanku.

³⁴Amor runakunataqmi Dan aylluta Mama Qocha pata pampa cheqasman mana kachaykuspa, orqo-orqollaman hark'arqan.

³⁵Chay hinapin Amor runakunaqa tiyakushallarqankupuni Heres llaqtapi, Ajalón llaqtapi, Saalbim llaqtapiwan. Josepa miraynin ayllukunataq ichaqa qhepaman kallpachakuspa Amor runakunata mit'anipi llank'achirqanku.

³⁶Amor runakunaq hallp'anpa qorpantaq karqan Nina Q'ara nispa Q'asamanta Selamantawan wichaykama.