Read Quechua Cuzco Bible 1988 JUECES 10 Bible Online

JUECES 10 - Quechua Cuzco Bible 1988 bible

JUECES 10

¹Abimelekpa qhepanmantataq Efraín orqo-orqopi Samir llaqtapi tiyaq Tola sayarirqan Israel llaqtata qespichinanpaq. Paypa taytanmi karqan Púa, machulantaq Isakar ayllumanta Dodo.

²Tolataq Israelpa uma qollanan karqan iskay chunka kinsayoq watantin wañukapunankama, hinan Samir llaqtapi p'ampapurqanku.

³Paypa qhepanmantaq sayarirqan Galaadmanta Jair, paymi Israelpi uma qollana karqan iskay chunka iskayniyoq watantin.

⁴Jairpa churinkunataq kinsa chunka karqan, sapankan silla asnoyoqkama karqanku. Galaad suyupin kinsa chunka llaqtanku karqan, hinan chay kinsa chunkantin llaqtakuna Jairpa llaqtankuna nisqa kapurqan.

⁵Chaymantataq Jairqa wañukapurqan, Kamón llaqtapitaq p'ampapurqanku.

⁶Israel runakunataq ichaqa wakmanta manapuni Señor Diospa munayninman hinachu ruwarqanku, paykunan yupaycharqanku Baal nisqa Astarte nisqa dioskunata, Siria runakunaq diosninkunata, Sidón runakunaq diosninkunata, Moab runakunaq diosninkunata, Amón runakunaq diosninkunata, Filistea runakunaq diosninkunatapas. Señor Diostataq qonqarparipuspa manaña yupaychapurqankuchu.

⁷Chaymantan Señor Diosqa phiñakuspa paykunata qaraykurqan Filistea runakunaman Amón runakunamanwan.

⁸Chaymantapachan chunka pusaqniyoq watantin Filistea runakuna Amón runakunapiwan Jordán mayu inti lloqsiy lado Amor runakunaq suyun Galaadpi tiyaq Israel runakunata pasaqta alqochakuspa saruncharqanku.

⁹Amón runakunaqa Jordán mayutapas chimpamurqankun Judá aylluwan, Benjamín aylluwan, Efraín ayllupiwan maqanakuq. Chaymi Israel runakunaqa sonqo nanay llakichisqa karqanku.

¹⁰Chayraqmi Israel runakunaqa Señor Diosmanta waqyakurqanku: Diosnillayku, ñoqaykun qan contra huchallikuyku, Baal nisqa dioskunata yupaychaspan qanta saqerparipuykiku, nispa.

¹¹Chaymi Señor Diosqa kutichirqan: —Egipto runakunan, Amor runakunan, Filistea runakunan, Sidón runakunan, Amalek runakunan, Maón runakunapiwanmi qankunata saruncharqasunkichis, qankuna waqyakamuwaqtiykichismi ñoqa qespichirqaykichis.

¹³Chaypiwanpas qankunaqa wak dioskunata yupaychaspan qonqapuwarqankichis, chayrayku kunantawanqa manan qespichiykichismanñachu.

¹⁴Phawaychisyá, akllakusqaykichis dioskunata waqapayamuychis, paykunayá llakikuyniykichismanta qespichisunkichis, nispa.

¹⁵Hinan Israel runakunaqa Señor Diosta nirqanku: —Arí, huchallikuykupunin. Ñoqaykuwan ima munasqaykita ruway, ichaqa ama hinachu kay, kunan ratoyá qespichiwayku, nispa.

¹⁶Hinaspan paykunaqa yupaychasqanku wak dioskunata q'alata wikch'upurqanku, wakmanta Señor Diosta yupaychapunankupaq. Hinan Señor Diosqa Israel runakunaq muchusqanta rikuspa pasaqtapuni llakikurqan.

¹⁷Chaymantataq Amón runakunaqa Galaadpi huñuykukuspa qaynarqanku, Israel runakunapas Mizpapi huñuykukuspa qaynashallarqankutaq.

¹⁸Hinan Galaadpi tiyaq Israel runakuna uma runakunapiwan ninakurqanku: —¿Mayqenninchistaq Amón runakunawan maqanakuq ñawpaqta rinqa? Chaychá Galaad llaqtantinpa qollanan kapunqa, nispa.