Read Quechua Cuzco Bible 1988 JUECES 13 Bible Online

JUECES 13 - Quechua Cuzco Bible 1988 bible

JUECES 13

¹Israel runakunaqa wakmanta manapunin Señor Diospa munayninman hinachu ruwarqanku, chayraykun payqa Filistea runakunaq kamachinman churaykurqan tawa chunka watantin.

²Dan ayllumantan huk runa karqan Zora llaqtapi tiyaq Manoa sutiyoq, paypa warmintaq mana hayk'aq wachakuq karqan.

³Chay warmimanmi Señor Diospa angelnin rikhurirqan, hinaspan nirqan: —Qanqa manan hayk'aqpas wachakurqankichu, kunanmi ichaqa wiksallikunki, hinaspan qhari wawata wachakunki.

⁴Kunanmantaqa aman ukyankichu vinotapas cervezatapas, amallataq Diospa hark'asqan mikhunatapas mikhunkichu.

⁵Wachakusqayki wawaqa nacesqanmantapachan Diospaq t'aqasqa Nazir nisqa runa kanqa, chaymi chukchantapas mana rutuchikunqachu, paymi Israel llaqtata Filistea runakunamanta qespichiyta qallarinqa, nispa.

⁶Hinan warmiqa qosanman rispa chay nisqanta willamurqan: —Huk runaraqsi Diospa angelninman rikch'akuq hamuwasqa, payqa sinchi mancharikuymi kasqa, manan sutintaqa willawanchu, may llaqtamanta hamusqantapas manataqmi tapuykusqanichu.

⁷Paytaqmi niwan: Kunanmi qan wachakunki huk qhari wawata, kunanmantaqa aman vinotapas cervezatapas ukyankichu, amallataq Diospa hark'asqan mikhunatapas mikhunkichu, chay wawaqa nacesqanmanta wañukapunankama Diospaq t'aqasqa Nazir nisqa runa kanqa, nispa, niwarqan.

⁸Hinan Manoaqa Señor Diosmanta mañakurqan: —Señorníy, warmiyman kachamusqayki runata wakmanta kachamuwayku, hinaspa willaykuwayku nacemuq wawawan imatachus ruwanaykuta, nispa.

⁹Chaymi Diosqa Manoaq mañakusqanta uyarispa, wakmanta angelta kachamurqan, hinan chakrapi sapallan warmi kashaqtin angelqa rikhurillarqantaq. Manoataq mana chaypichu kasharqan.

¹⁰Chaymi payqa phawaylla qosanman willaq rirqan: —¡Qosáy! Qayna rikhuriwaqniy runaraqsi kunan wakmanta rikhurirqowan, nispa.

¹¹Manoataq warminpa qhepanta phawarispa chay runawan tuparqan, hinaspan nirqan: —Wiraqocháy, ¿qanchu warmiyman qayna rimapayarqanki? nispa. Paytaq kutichirqan: —Arí, ñoqan, nispa.

¹²Manoaqa nillarqantaq: —Chay nisqayki hunt'akuqtinri, ¿imaynatataq uywasaqku wawatari? Paypari, ¿imakunataq ruwanan kanqa? nispa.

¹³Señor Diospa angelnintaq Manoata nirqan: —Warmiykin lliw nisqaykunata llapantapuni hunt'anqa.

¹⁴Aman ukyanqachu vinotapas cervezatapas, amallataq mikhunqachu ima rikch'aq uvastapas, Diospa hark'asqan mikhunatapas. Chay nisqaykunatan llapantapuni hunt'anqa, nispa.

¹⁵Chaymi Manoaqa Señor Diospa angelninta nirqan: —Ama hinachu kay, tiyaykuyraq, huk cabrachallatapas q'asparqapusqaykiraq, nispa.

¹⁶Manoaqa Señor Diospa angelnin kasqanta manan yacharqanchu. Hinan Señor Diospa angelninqa payta nirqan: —Qhepachiwankiña chaypas, manan mikhunaykitaqa mikhusaqchu. Señor Diosman ruphachina sacrificiota haywayta munaspaqa, haywallay, nispa.

¹⁷Chaymantapas Manoaqa nillarqantaq: —¿Imataq sutiykiri? Niwasqaykiku hunt'akuqtin yupaychamunaykupaqmi munayku, nispa.

¹⁸Señor Diospa angelnintaq nirqan: —¿Imanaqtintaq tapuwanki sutiytari? Sutiyqa sinchi musphanan, nispa.

¹⁹Manoataq usqhaylla cabrachata ruru ofrendatawan qaqa patapi sinchi musphana ruwaq Señor Diosman haywarqan.

²⁰Altarmanta nina rawrariqtintaq, paykunaq rikushasqan angelqa chay nina sonqopi hanaq pachaman wicharipurqan. Chayta rikuspataq paykunaqa warmi-qhari qonqoriykukurqanku uyankuq pampaman tupanankama.

²¹Señor Diospa angelninqa manañan astawan paykunaman kutimuqchu, chayraqmi Manoaqa repararqan Señor Diospa angelninpuni kasqanta.

²²Hinaspataq payqa warminta nirqan: —Kunanqa Diosta rikurqonchis chayqa, wañurqapusunchá, nispa.

²³Warmitaq payta nirqan: —Wañunanchista Señor Dios munanman chayqa, manachá ruphachisqa sacrificiotapas ruru ofrenda haywasqanchistapas chaskiwasunmanchu, imachus kanantapas manachá willawasunmanchu, manallataq chaykunatapas rikuchiwasunmanchu karqan riki, nispa.

²⁴Killan hunt'akuqtintaq qhari wawata wachakurqan, suticharqantaq Sansonta. Wawan wiñarqan, Señor Diostaq payta samincharqan.

²⁵Señor Diospa Espirituntaq Sansonta kallpachasharqanña Zora llaqtawan Estaol llaqtawan tupay Dan aylluq karpankunapi.