Read Quechua Cuzco Bible 1988 JUECES 16 Bible Online

JUECES 16 - Quechua Cuzco Bible 1988 bible

JUECES 16

¹Huk p'unchaymi Sansonqa Gaza llaqtata rirqan, chaypin rabona warmita rikuspa paywan puñuykurqan.

²Gaza llaqta runakunataq willanakurqanku: —Sansonmi hamurqosqa, nispa. Chaymi paykunaqa llapanku huñurqonakuspa tuta illariqta llaqta punkupi ch'inlla suyasharqanku: —Pacha illarimuyta sipirqosun, nispa.

³Sansontaq ichaqa kuska tutakamalla puñurqan, chay ratopacha rikch'arqospataq pasarqan, llaqta punkuta llapanta khakarqospataq q'epirikurqan Hebrón llaqta chimpa orqo patakama.

⁴Chaykuna qhepatataq Sansonqa Sorek wayq'opi tiyaq Dalilata wayllukurqan.

⁵Hinan Filistea uma runakunaqa Dalilaman rispa nimurqanku: —Sansontaqa q'otullawan wateqarqonki maymantapunis chay hina kallpan kasqanta, imaynatas atipasunman chaytawan. Atipaspaqa paytayá kamachisunman riki, qanmantaq sapankayku waranqa pachaknin qolqeta qosqaykiku, nispa.

⁶Chaymi Dalilaqa Sansonta nirqan: —Ama hinachu kay, willaykuway imaynapipunin chay hina niraq kallpayoq kanki, imaynatataqmi atipasqa kawaq, nispa.

⁷Sansontaq nirqan: —Ch'unchulmanta qanchis ch'aran q'ewikunawan t'eqerqowankuman chayqa, wakin runakuna hinan pisi kallpayoq karqapuyman, nispa.

⁸Filistea runakunataq ch'unchulmanta qanchis ch'aran q'ewikunata apamurqanku, chaywantaq Dalilaqa Sansonta t'eqerqorqan.

⁹Payqa ñawpaqtaña puñunan wasipi wakin Filistea runakunata pakarqan, hinaspan Sansonta qapariykurqan: —¡Sansón! ¡Filistea runakunaqa kunallanmi hap'irqosunki! nispa. Sansontaq rikch'arirqospa, pay t'eqesqa q'ewikunata ninaq ruphasqanta hina p'itirqorqan. Chaymi Filistea runakunaqa mana yacharqankuchu maymantas kallpan kasqanta.

¹⁰Dalilaqa Sansonta nillarqantaq: —¿Imanaqtintaq chhaynata llullakuspari yanqa q'otuwanki? Sut'intayá willaway imaynatapunin watasqa kawaq chayta, nispa.

¹¹Niqtinmi Sansonqa nillarqantaq: —Mosoq waskhawan t'eqerqowankuman chayqa, wakin runakuna hinan pisi kallpayoq karqapuyman, nispa.

¹²Dalilataq mosoq waskhakunawan t'eqellarqantaq, chaymantataq qapariykurqan: —¡Sansón! ¡Filistea runakunaqa kunallanmi hap'irqosunki! nispa. Qhamiyaq runakunataq puñunan wasipi kasharqanku, Sansontaq ichaqa ch'ullanpa q'aytuta hina watasqanta p'itirqorqan.

¹³Hinan Dalilaqa Sansonta nirqan: —¡Kunanpas qanqa chanzakushallawankin llullakuspa! Willaway imaynatapunin t'eqesqa kawaq chayta, nispa. Chaymi Sansonqa nirqan: —Chukchayta qanchisman t'aqarqospa telar awaman minirqowaq, allintapunitaq khallwawanpas mat'iykuwaq chayqa wakin runakuna hinan pisi kallpayoq karqapuyman, nispa.

¹⁴Puñushanankamataq Dalilaqa chukchanta qanchisman t'aqarqospa, telar awaman minirqorqan khallwawan allinta mat'i-mat'iykuspa. Chaymantataq qapariykurqan: —¡Sansón! ¡Filistea runakunaqa kunallanmi hap'irqosunki! nispa. Sansontaq hatarirqorqan telar awata khallwata umanpi aysarikuspa.

¹⁵Chaymi Dalilaqa nillarqantaq: —Yaw llulla, ¿imanaqtinmi: Munakuykin, nispa q'otuwanki? Kinsa kutitañan ñoqata chanzakuwanki, manataq willawankichu maymantas hatun kallpayki kasqanta, nispa.

¹⁶Sapa p'unchay tapupayaspataq Dalilaqa payta sinchita mat'iykurqan, kallpantapas wañuchirqan.

¹⁷Chaymi sut'inta tukuy sonqonmanta willapurqan: —Ñoqaqa Diospaq t'aqasqa Nazir nisqa runan kani, manataqmi chukchayqa hayk'aqpas rutunachu, ruturqapuwankuman chayqa, wakin runakuna hina pisi kallpayoqmi kapuyman, nispa.

¹⁸Tukuy sonqonmanta willakusqanta repararqospataq, Dalilaqa Filistea uma runakunaman willarqachimurqan: —Hamuychis, kunanqa sut'intan willarqapuwan, nispa. Hinan paykunaqa qolqe apaykusqallaña phawarimurqanku Dalilaman qonankupaq.

¹⁹Dalilataq Sansonta moqon pataman umanta siriykuchispa puñurqachirqan, hinaspan huk runata waqyarirqan qanchisnintin simp'anta kuchurqonanpaq. Warmitaq Sansonta tanqaykacharqan, kallpantaq manaña kapusqañachu.

²⁰¡Sansón! ¡Filistea runakunaqa kunallanmi hap'irqosunki! nispa, niqtinmi Sansonqa rikch'arispa yuyarqan: —Kunanpas wakin kutikuna hina atipallasaqpunin, nispa, ichaqa payqa manan yachakurqanchu paymanta Dios t'aqarikapusqanta.

²¹Hinan Filistea runakunaqa payta hap'irqanku, ñawinta horqospataq Gaza llaqtaman aparqanku. Bronce cadenawan wataykuspataq carcelman churaykurqanku, chaypitaq tanqaspa molinota muyuchirqan.

²²Wakmantataq rutusqa chukchanqa wiñamurqan.

²³Filistea uma runakunataq huñukurqanku diosninku Dagonman hatun sacrificiota haywanankupaq fiestata ruwanankupaqwan. Hinaspan takirqanku: —Diosninchismi Sansonta hap'ichiwanchis, diosninchismi awqanchista hap'ichiwanchis, nispa.

²⁴Kaqllataq runakunapas Sansonta rikuspanku diosninkuta yupaychaspa takirqanku: —Diosninchismi awqanchista hap'iykachiwanchis, chakranchiskuna q'aruqta qowanchis, askha runanchis wañuchiqta qowanchis, nispa.

²⁵Anchatapuniña kusikuspankutaq nirqanku: —Sansonta aysamuychis asichiwananchispaq, nispa. Chaymi Sansonta carcelmanta waqyamurqanku, hinaspan paywan pukllakurqanku. Chaymantataq wasiq iskaynin tusaq chawpinman sayaykuchirqanku.

²⁶Sansontaq makinmanta aysaqnin waynachata nirqan: —Asuykamuway, hinaspataq makiykunawan llamiykuchiway wasiq tusankunaman hap'ipaykukunaypaq, nispa.

²⁷Chay wasipiqa warmikunapas qharikunapas hunt'an kasharqan, chaypin llapan Filistea uma runakuna kashallarqantaq, wasi patapipas kinsa waranqa hina runakuna kasharqanku Sansonta qhawaspanku asipayaspanku.

²⁸Sansontaq Señor Diosta waqyakurqan: —Qollana Señor Diosníy, yuyariykuway, kay kutitawan kallpachaykuway iskaynin ñawiymanta Filistea runakunata vengakunaypaq, nispa.

²⁹Chaymantataq iskaynin makinwan wasiq tusankunata oqllaykukurqan, paña makinwan hukkaq tusata lloq'e makinwantaq hukkaqta, hinaspan ukhumanta hawaman tanqarparirqan.

³⁰Qaparirqantaq: —¡Hina Filistea runakunawan wañukapusaq! nispa. Chaymantataq tukuy kallpanwan wasita tanqarparispa Filistea uma runakuna pataman, chaypi kashaq runakunamanpas thuniykurqan. Chay hinapin Filistea runakunaqa aswan askharaq Sansonwan kuska wañupurqanku kawsashaspa Sansonpa wañuchisqanmantaqa.

³¹Chaymantataq uraykamurqanku Sansonpa wawqenkuna ayllunkunapiwan, ayanta wantuspataq wichaykapurqanku. Hinaspan p'ampapurqanku Zorawan Estaolwan tupaypi taytan Manoa p'ampasqankupi. Sansonqa iskay chunka watantinmi Israel runakunaq uma qollanan karqan.