Read Quechua Cuzco Bible 1988 JUECES 17 Bible Online

JUECES 17 - Quechua Cuzco Bible 1988 bible

JUECES 17

¹Huk runan karqan Mika sutiyoq Efraín orqo-orqopi tiyaq.

²Paymi mamanta nirqan: —Waranqa pachakniyoq qolqeykita suwarqan riki, hinan chay suwaqniykita ñakarqanki, chay qolqeykitaqa ñoqan suwakurqani, makiypin kashan, nispa. Mamantaq payta nirqan: —Wawalláy, Señor Diosmi saminchasunki, nispa.

³Churintaq chay waranqa pachaknin qolqeta mamanman kutichipurqan, hinan payqa churinta nirqan: —Ñoqaqa Señor Diosmanmi kay qolqeta qopusaq amaña qanman ñakayniy chayananpaq, chay hinaqa kay qolqeta pagaspa qolqewan llunch'isqa idolota ruwachimusaq. Kayqa qolqeta qosqayki, nispa.

⁴Mamanman qolqenta kutichipuqtintaq, mamanqa iskay pachak qolqeta apaspa qolqe unuyachiqman qorqan. Hinan qolqe unuyachiqqa qolqewan llunch'isqa idolota ruwarqan, chaytataq Mikaq wasinpi churarqan.

⁵Mikaq wasinpin yupaychana wasi kasqa. Paytaq ruwarqan sacerdoteq churakunan Diospa munaynin tapuna unkuta, wasipi kaq dioskunatapas. Hinaspan hukkaq churinta sacerdote kananpaq churaykurqan.

⁶Chay p'unchaykunapi Israel runakunaqa mana reyniyoqmi kasharqan, sapanka runan ima munasqanta ruwasharqan.

⁷Chaypachan Judá aylluq Belén llaqtanpi Leví ayllu wayna tiyasharqan.

⁸Paymi Belenmanta puririmurqan wak tiyanata maskhaspa. Efraín orqo-orqopi purishaspataq Mikaq wasinman chayarqan.

⁹Hinan Mikaqa tapuykurqan: —¿Maymantan hamushanki? nispa. Waynataq kutichirqan: —Ñoqaqa Leví ayllu runan kani, Judá aylluq Belén llaqtanpi tiyaq, kunantaq wak tiyanata maskhakushani, nispa.

¹⁰Hinan Mikaqa nirqan: —Wasiypi tiyakushasun, taytay hina kapuwanki, sacerdoteraqtaq kankipas. Sapa watan chunka qolqeta pagasqayki, mikhuchisqayki p'achachisqayki ima, nispa.

¹¹Leví ayllu waynataq Mikata nirqan: —Arí, tiyakusunmi, nispa. Churin hinataq kapurqan.

¹²Hinan Mikaqa chay Leví ayllu waynata sacerdotenpaq churakurqan, waynapas chaypi tiyananpaq qhepakapurqan.

¹³Mikataq nirqan: —Leví runa sacerdoteyoq kaqtiyqa, Señor Diosmi allintapuni saminchawanqa, nispa.