Read Quechua Cuzco Bible 1988 JUECES 2 Bible Online

JUECES 2 - Quechua Cuzco Bible 1988 bible

JUECES 2

¹Señor Diospa angelninmi Gilgalmanta Bokimman wicharqan, chaypin Israel runakunata nirqan: —Ñoqan Egipto suyumanta horqomurqaykichis, hinaspan pusamurqaykichis machulaykichisman prometesqay kay hallp'aman. Paykunatataq nirqani: Rimanakusqanchistaqa manan hayk'aqpas p'akisaqchu,

²qankunataqmi amapuni kay suyupi tiyaq runakunawan rimanakunkichischu, nispa. Qankunataq ichaqa mana kasuwarqankichischu. ¿Imanaqtintaq chay hinari kankichis?

³Chayraykun ñoqapas kay runakunata ñawpaqeykichismanta mana qarqosaqchu, aswanmi paykunaqa toqlla hina qankunapaq kanqaku, diosninkutaq misk'achiqniykichis kanqa, nispa.

⁴Señor Diospa angelnin rimayta tukuqtintaq, llapa Israel runakunaqa qaparispa waqaykurqanku.

⁵Chaymi chay cheqasta suticharqanku Bokim[2] nispa. Chaypitaq Señor Diosman sacrificiokunata haywarqanku.

⁶Josuetaq Israel runakunata kacharparipurqan, hinan paykunaqa sapankanku ripurqanku sorteopi chaskisqanku hallp'ankuta hap'ikapuq.

⁷Israel runakunataq Josuepa p'unchayninkunapi Señor Diosta allinta servirqanku, hinallataq Josuemanta qhepakamaraq kawsaq kurak taytakunaq p'unchayninkunapipas. Chay taytakunan Señor Diospa Israelrayku hatuchaq ruwasqankunata rikusqaku.

⁸Chaymanta Señor Diospa kamachin Nunpa churin Josueqa wañukapurqan pachak chunkayoq watanpi.

⁹Hinan Efraín orqo-orqopi Gaas orqoq wichaynin Timnat-heres hallp'anpi p'ampapurqanku.

¹⁰Hinallataq Josuepa wiñaymasin llapan kurak taytakunapas wañukapurqanku, qhepa wiñay runakunataqmi ichaqa Señor Diosta mana reqsirqankuchu, manallataq Israelrayku imaymana Señor Diospa ruwasqantapas yacharqankuchu.

¹¹Chaymantataq Israel runakunaqa Señor Diospa mana munasqan millaykunata ruwarqanku, Baal nisqa dioskunata yupaychaspanku.

¹²Egiptomanta machulankuta horqomuq Diosninku Señorta qonqapurqanku, hinaspan muyuriqninkupi tiyaq runakunaq diosninkuta yupaychaspa Señor Diosta phiñachirqanku.

¹³Señor Diosta saqerparispataq Baal nisqa Astarte nisqa dioskunata servirqanku.

¹⁴Chaymantan Señor Diospa phiñakuyninqa Israel runakunapaq rawrarirqan, hinan kaqninkutapas llat'anaqkunawan ch'utichirqan, muyuriqninkupi tiyaq runakunawantaq atipachirqan, churanakuytapas mana atinankukama.

¹⁵Sapa kuti awqa-tinkuyman riqtinkun, Señor Diosqa awqankuwan atipachillarqanpuni, paykunaman juraspa nisqanman hina. Chaymi paykunaqa hatun llakiyllapi kasharqanku.

¹⁶Chaymantañataq Señor Diosqa Israel runakunaman uma qollanakunata churarqan llat'anaqninkumanta qespichinanpaq.

¹⁷Chaywanpas manapunin chay qollanakunatapas kasurqankuchu aswanmi wak dioskunata yupaychaspanku qhellichakurqanku. Machulankuqa Señor Diospa kamachikuyninta kasukuspan kawsasqaku, paykunañataqmi ichaqa manaraq imapi Señor Diosta saqerparipurqanku.

¹⁸Paykunaman sapa kuti uma qollanata churaspan, Señor Diosqa uma qollanata yanapallaqpuni. Chay hinapin qollanakunaq kawsasqan p'unchaykunaqa Señor Diosqa awqankumanta Israel runakunata qespichillaqpuni, paykunaq anchisqanta ñak'arisqantawan khuyapayaspa.

¹⁹Sapa kuti uma qollananku, wañupuqtintaqmi wakmanta huchallikurqanku taytankumantaqa aswan mana allintaraq ruwaspanku. Wak dioskunata servispan yupaycharqanku, millay ruwayninkutapas manapuni qonqaspan k'ulluchaykukurqanku.

²⁰Chaymantan Señor Diospa phiñakuyninqa Israel runakunapaq rawrarirqan, chaymi Señor Diosqa nirqan: Kay runakunan machulankuwan rimanakusqayta p'akinku, kamachikuyniykunata mana kasukuspa.

²¹Chaymi ñoqapas Josué wañukapuqtin kikin suyupiraq kashaq llaqtakunata manapuni qarqosaqchu.

²²Chay llaqtakunawanmi Israel runakunata taripasaq machulanku hina kamachikuyniykunata hunt'anqachus icha manachus chayta yachanaypaq, nispa.

²³Chay yuyaywanmi Señor Diosqa mana wikch'urqanchu Josuepa mana atipasqan llaqtakunata, aswanmi kaqllapiraq qhepachirqan.