Read Quechua Cuzco Bible 1988 JUECES 20 Bible Online

JUECES 20 - Quechua Cuzco Bible 1988 bible

JUECES 20

¹Chaymi llapan Israel runakunaqa wichaypi kaq Dan llaqtamanta uraypi kaq Beerseba llaqtakamaraq Galaad hap'iynintin huk qhari hinalla Mizpapi Señor Diospa qayllanpi huñuykukurqanku.

²Chaypin tawa pachak waranqa soldadokuna espadantinkama kasharqan, paykunawanmi llapa Israel ayllukunaq uma runankunapas kasharqan.

³Benjamín ayllu runakunataq Mizpapi Israel runakunaq huñukusqanta yacharqorqanku. Hinan Israel runakunaqa Leví ayllu runata tapuykurqanku: —Willawayku imaynan karqan chay millay ruwasqanku, nispa.

⁴Wañuq warmiq qosantaq nirqan: —Benjamín ayllupi Gabaa llaqtamanmi warmiypiwan qorpachakuq chayaykurqayku.

⁵Hinan chay qorpachakusqayku wasiman hamurqospanku Gabaa qharikunaqa muyupayawarqanku, wañuchiwayta yuyaykuwaspanku, ichaqa tiyaqmasiytan wañunankama violarqanku.

⁶Chaymi warmiypa ayanta kuchurqarispa llapa Israel runakunaq tiyasqankunaman apachimurqaykichis, Israel ukhupi paykunaq millay mana chaninta ruwasqankurayku.

⁷Kunanqa, llapan Israel runakunataq kaypi kashankichis chayqa, ¿ima ninkichistaq kay ruwasqankumanta? nispa.

⁸Chaymi llapallanku huk qhari hinalla hatarispa nirqanku: —Kunanmi ichaqa mana pipas kutisunchu karpanchisman wasinchismanpas,

⁹aswanpas Gabaaman mayqenchus phawaykunanchispaq sorteasunchis.

¹⁰Hinaspataq pachak runamanta chunkata, waranqamanta pachakninta, chunka waranqamantataq waranqanta t'aqasunchis mikhuyta llapankupaq apanankupaq. Wakinnintaq Benjamín ayllu Gabaapi runakunata muchuchiq rinqaku Israel ukhupi millay mana chanin ruwasqankumanta, nispa.

¹¹Chay hinatan Israel runakunaqa ch'ulla qhari hinalla huñuykukuspa, Gabaa llaqtaman phawaykuq rirqanku.

¹²Chaymantataq runakunata kacharqan Benjamín aylluman tapuchiqta: ¿Imanaqtinmi chay hina millayta wakinniykichis ruwarqan?

¹³¿Maymi chay Gabaapi tiyaq millay runakuna? Horqomuwayku wañuchipunaykupaq Israel ayllukuna ukhupi amaña chay hina millaykuna kananpaq, nispa. Benjamín ayllu runataq ichaqa wawqenku Israel runakunata mana uyariq tukurqanku.

¹⁴Aswanraqmi paykunaqa llapa llaqtankumanta Gabaapi huñunakurqanku wakin Israel wawqenkuwan maqanakuq rinankupaq.

¹⁵Benjamín soldadokuna yupanakuqtinkutaq iskay chunka soqtayoq waranqa espadantinkama karqan, Gabaamanta aswan allichachaqnin qanchis pachaknintin qharikunataq mana yupasqa karqanku.

¹⁶Chay llapan runakunamantan karqan qanchis pachak allin warak'ay yachaq lloq'enchukuna, paykunaqa warak'aspa mana hayk'aq pantaqmi karqanku.

¹⁷Wakin Israel runakunañataq huñunakuspa tawa pachak waranqa allin maqanakuq espadantinkama karqanku.

¹⁸Chaymantataq Israel runakunaqa yupaychana wasiman Diosta tapuykukuq seqaykurqanku, hinaspan nirqanku: —¿Ñoqaykumanta mayqenkaq ayllun ñawpaqta risaqku Benjamín aylluwan maqanakuq? nispa. Señor Diostaq nimurqan: —Judá ayllu ñawpachun, nispa.

¹⁹Chay hinatan Israel soldadokunaqa tutallamanta sayarispa Gabaa llaqtaq qayllanman chayaspa qaynarqanku.

²⁰Chaymantataq Benjamín ayllu contra lloqsirqanku, hinaspan maqanakuy qallarinankupaq Gabaa llaqta chimpapi allinta sayaykurqanku.

²¹Chay p'unchaymi Benjamín ayllu soldadokunaqa lloqsirqamuspa iskay chunka iskayniyoq waranqa Israel soldadokunata wañuchirqan.

²²Chayraykun Israel soldadokunaqa Señor Dios yupaychana wasiman seqaykuspanku, tutayanankama waqamurqanku, hinaspan Señor Diosta tapurqanku: —¿Wawqeyku Benjamín aylluwan maqanakuq kutillasaqkupunichu? nispa. Señor Diostaq kutichirqan: —Arí, riychis, nispa. Chaymi Israel soldadokunaqa kallpacharikuspa wakmanta maqanakuy qallarinankupaq allinta sayaykurqanku ñawpaq p'unchay maqanakusqanku cheqaspi.

²³

²⁴Hinaspan chay iskaykaq p'unchayqa aswanta qayllaykurqanku Benjamín aylluwan maqanakunankupaq.

²⁵Kaqllataq chay kutipipas Benjamín runakunaqa Gabaamanta lloqsirqamurqanku paykunawan maqanakunankupaq, hinaspan Israelmanta chunka pusaqniyoq waranqa espadayoq soldadokunata wañuchillarqankutaq.

²⁶Chaymi Israel soldadokunaqa llapa llaqta runakunantin Betelman rirqanku, Señor Diospa qayllanpitaq waqarqanku. Chaypitaq tutayanankama ayunarqanku, hinallataq Señor Diosman haywarqanku ruphachina sacrificiokunata sumaq kawsay sacrificiotawan.

²⁷Chay p'unchaykunapitaqmi Diospa rimanakuy cajanqa Betelpi kasharqan, Aaronpa churin Eleazarpa churin Fineestaq sacerdote kasharqan. Hinan Israel runakunaqa Señor Diosta tapullarqankutaq: —¿Wakmanta wawqeyku Benjamín aylluwan maqanakuq kutillasaqkutaqchu? Icha, ¿amañachu risaqku? nispa. Señor Diostaq kutichimurqan: —Rillaychis, paqarinqa atipamunkichismi, nispa.

²⁸

²⁹Hinan wakin Israel soldadokunaqa Gabaa llaqtaq muyuriqninpi qonqaylla phawaykunankupaq pakarqarikurqanku.

³⁰Wakinkaq soldadoñataq chay kinsakaq p'unchaypi wakin kutikuna hina Gabaa llaqta chimpapi allinta sayaykurqanku Benjamín aylluwan maqanakunankupaq.

³¹Soldadokuna llaqtamanta maqanakuq lloqsimuqtintaq, Israel soldadokuna qhepaman rispa paykunata llaqtanmanta karunchachirqan. Ñawpaq kutipi hinataq Benjamín soldadokunaqa wañuchiyta qallarirqanku, Betelman rina ñanpi Gabaaman rina ñanpiwan kinsa chunka Israel soldadokunatataq wañuchirqanku.

³²Benjamín soldadokunan yuyarqanku: —Ñawpaq kuti hinan atipashanchis, nispa. Israel soldadokunataq ichaqa ninakurqanku: —Astawan karuman ayqesunchis, llaqtamanta hatun ñankama paykunata karunchachisunchis, nispa.

³³Hinaspan paykunaqa ayqerikuspa Baal-tamarpi wakmanta maqanakunankupaq sayaykurqanku. Chaykunata ruwashanankukamataq Gabaa llaqtaq muyuriqninpi qaqa-qaqapi pakakuqkunaqa Gabaaman usqhaylla phawaykurqanku,

³⁴paykunaqa chunka waranqa allichachaq qharikunan karqanku. Maqanakuytaq sinchi manchakuy karqan. Benjamín ayllu soldadokunaqa manan yachakurqanchu chay kutipi urmaykapunankuta.

³⁵Chay hinatan Señor Diosqa Benjamín aylluta Israelwan atipachirqan, hinan Israel runakunaqa iskay chunka phisqayoq waranqa pachakniyoq Benjaminmanta espadayoq soldadokunata wañuchirqanku.

³⁶Chaymi Benjamín ayllu runakunaqa atipasqaña kasqankuta reparakurqanku. Israel soldadokunan maqanakuspa Benjaminmanta qhepaman kutisqaku, Gabaa llaqtaq muyuriqninpi pakakuq runakunapi suyakusqankurayku.

³⁷Chay runakunataqmi Gabaaman qonqaylla phawaykuspa llaqtantin runakunata espadawan wañuchirqanku.

³⁸Paykunan rimanakusqaku wakin Israel soldadokunawan llaqtaman phawaykuspaqa nina q'osñiwan willanankupaq.

³⁹Chay hinapin waktasqanta ayqekuq soldadokunaqa nina q'osñiqta rikumuspanku, Benjamín soldadokunaman kutirimusqaku. Benjamín soldadokunataq kinsa chunka Israel soldadokunata wañurqachispa nisqaku: —Ñawpaq kuti hinan atipashanchis, nispanku.

⁴⁰Chay ratopachataq llaqtamanta q'osñiqa sayarimusqa, Benjamín soldadokunaq qhawarimunankupaq nina rawray q'osñiqa llaqtantintaña tutayashasqa.

⁴¹Hinan Israel soldadokunaqa kutirimusqaku, Benjamín soldadokunataq atipasqa kasqankuta reparakuspanku pasaqta llaksakusqaku.

⁴²Chaymi Israel soldadokunamanta ch'inneq ladoman ayqerikuyta yuyaykusqaku, ichaqa manan atisqakuchu llaqtamanta lloqsimuq soldadokunaqpas ñawpankupi kaq soldadokunaqpas chawpinasqan kasqankurayku, chaypitaq wañupusqaku.

⁴³Israel soldadokunataq awqanta muyuykuspa pasaqta qatiykachaspa t'ustusqaku Nohah llaqtamanta Geba llaqta inti lloqsiy ladokamaraq.

⁴⁴Chay hinapin wañurasqaku chunka pusaqniyoq waranqa Benjamín ayllu allichachaq soldadokuna.

⁴⁵Wakintaq kutipuspa ayqekapusqaku Rimón Salla nisqaman, chay ñanpitaqmi ichaqa phisqa waranqa soldado wañusqaku. Israel soldadokunataq astawanraq qatisqaku Gidom llaqtakama, chaypipas iskay waranqatawanraq wañuchimusqaku.

⁴⁶Hinan Benjamín ayllu allichachaq soldadokunaqa chay p'unchay iskay chunka phisqayoq waranqa wañusqaku.

⁴⁷Soqta pachak runataq ayqekurqanpuni ch'inneqninta Rimón Salla nisqaman, chaypitaq tawa killantin pakakamurqanku.

⁴⁸Chaymi Israel soldadokunaqa wakin Benjamín runakunaman kutirirqanku, sapanka llaqtapitaq espadawan wañurachirqan llapa runakunatapas uywakunatapas, llaqtakunatapas kanaykurqanku.