Read Quechua Cuzco Bible 1988 JUECES 5 Bible Online

JUECES 5 - Quechua Cuzco Bible 1988 bible

JUECES 5

¹Chay p'unchaymi Deborawan Abinoampa churin Barakpiwan kay hinata takirqanku:

²—Israel uma runakunan awqa-tinkuyman phawarirqanku, Israel runakunan kikinkumanta maqanakuyman rirqanku, chaykunamanta Señor Diosta yupaychaychis.

³¡Uyariwaychis, reykuna! ¡Uyariwaychis, apukuna! Señor Diosmanmi takipusaq, Israelpa Diosninmanmi takipusaq.

⁴Señor Diosníy, Seirmanta lloqsimuqtiykin, Edommanta puririmuqtiykin, kay pacharaq kuyurirqan, hanaq pacharaq phaqcharirqan, phuyukunaraq paramurqan.

⁵Qanmi Sinaí orqopi Dios kanki, qanmi Israelpa Diosnin kanki, orqokunaraqmi ñawpaqeykipi chhaphchikurqan,

⁶Anatpa churin Samgarpa p'unchayninpipas Heberpa warmin Jaelpa p'unchayninpipas suyuntinta puriq qhatuqkunapas wanapurqanku puriyta, astakuqkunapas qonqasqa ñanninta qallarirqanku puriyta.

⁷Campopi tiyaq Israel runakunapas llapanmi ch'usaqyapurqan, qanpa sayarinayki p'unchaykama, Débora, qanpa sayarinayki p'unchaykama, Israelpi mama.

⁸Mosoq dioskunata akllakuqtinkun, llaqta punkukunapi maqanakuykuna karqan, ichaqa tawa chunka waranqa Israel runakuna ukhupi mana rikuypas karqanchu lanzapas escudopas.

⁹Israelpi uma runakunawanmi sonqoyqa kashan, paykunamantakama awqa-tinkuyman riq runakunawanpas. ¡Señor Diosta yupaychaychis!

¹⁰Yuraq asnopi puriqkuna, qompi chusi patapi tiyaqkuna, ñanta puriqkuna, Señor Diospa ruwasqanmanta willariychis.

¹¹Haqay uywaman unu ukyachina patapin platillokunata tocaspa takishanku Señor Diospa hatun atipasqanmanta, Israel ayllu runawan atipachisqanmanta. Señor Diospa runankunan puririrqanku llaqta punkuman.

¹²¡Rikch'ariy, hatariy, Débora! ¡Rikch'ariy, hatariy, takiy! Qanpas Abinoampa churin Barak, sayariy, presoykikunata apay.

¹³Hinan umallikunaq kasqanman uraykamurqanku manaraq wañuq runakuna, ñoqarayku uraykamurqanku Señor Diospa runankuna atiyniyoq awqankuwan churanakunanpaq.

¹⁴Efraín ayllu runakunan wayq'oman usqhaylla uraykamurqanku, Benjamín ayllu soldadokunan qhepankuta uraykamurqanku, Makirmantapas umakunan uraykullarqankutaq, Zabulonmantapas kamachikuqkunan uraykullarqankutaq.

¹⁵Isakar ayllu uma runakunapas Deborata puriysirqanku, Isakar ayllu runakunapas Barakta yanaparqanku, chaymi wayq'omanpas qhepanta phawaykurqanku. Rubén aylluq hallp'anpiqa askhan wakcha-kusichi qhapaq-llakichikuna.

¹⁶¿Imanaqtintaq qhepakurqanki uywa kanchallaykipi, michiqkunaq oveja waqyasqanta uyarispa? Rubén aylluq hallp'anpiqa askhan kanku allichachaq manchali runakuna.

¹⁷Jordán chimpapin qhepakurqanku Galaad runakunaqa, barconkuq qayllanpin qhepakurqanku Dan runakunaqa, kasqan qocha patapin llakhiraq karqanku Aser runakunaqa.

¹⁸Zabulón aylluwan Neftalí aylluwantaq wañuytapas mana manchasparaq hatun awqa-tinkuypi tupaykusharqanku.

¹⁹Reykunan hamuspa maqanakurqanku, Canaán reykunan maqanakurqanku, Meguido mayu pata Taanakpi qolqekuna llat'anaytapas mana atirqankuchu.

²⁰Hanaq pachamantan qoyllurkuna maqanakamurqan, tiyasqankumantan Sísara contra sayarimurqan.

²¹Kisón mayuqa llapantaña apapurqan, ñawpa Kisón mayuqa lliwta qhochupurqan. ¡Sonqolláy, kallpachakuspa puririy!

²²Sinchi phawaq caballokunan phawaylla phawarqan, chakinkuq k'urururusqanpas uyarikurqan.

²³Señor Diospa angelnintaq rimarirqan: Meroz llaqtata ñakaychis, runankunatapas ñakallaychistaq, Señor Diosta mana yanapasqankumanta Señor Dioswan atiyniyoq contra mana maqanakusqankumanta, nispa.

²⁴Llapan warmikunamanta aswan saminchasqa Jaelqa kachun, Kayin runa Heberpa warminqa saminchasqa kachun, karpa-karpapi tiyaq warmikunamantapas aswan saminchasqa kachun.

²⁵Unuta Sísara mañakuqtinpas, lecheta Jaelqa haywarirqan, sumaq ch'illatupi leche lluklluta haywarirqan.

²⁶Lloq'e makinwanmi takarputa hoqarirqan, paña makinwantaq q'asunata hoqarirqan, Sisaraq umantan q'asuspa p'akirqan, ch'ipuntapas takarpuwanmi t'oqorqan.

²⁷Sisaraqa hukpaqkamallañan ñoqhorparikurqan, Jaelpa chakinpi payqa ñoqhorparikurqan, ñoqhorparikusqanpin wañusqa chutarparikurqan.

²⁸Sisaraq mamantaq wasi ventanamanta qhawapakamusharqan, qhawapakamusqanpi llakikuymanta mana paypiñachu karqan: ¿Imanaqtintaq mana usqhaychu carretanqa chayamun? ¿Imanaqtintaq mana usqhaychu rikhurimunri? nispa.

²⁹Yachaysapa sipasninkunaqa mamanta nirqanku, paypas chay kasqanta nillarqantaq:

³⁰Awqa-tinkuypi llat'anamusqankutachá rakinakushanku, sapanka qharimanchá hukta iskaytapas sipaskunata rakishanku, Sisarapaqtaqchá ima sumaq awasqakunata akllashanku, ima sumaq puytuchasqa awasqakunatachá akllashanku, atipaqkaqpaqchá iskay puytuchasqa awasqa kashan, nispa.

³¹Señor Diosníy, chay hina wañuchisqapuni kachun llapan awqaykikunaqa. Qan munakuqtaq k'ancharichun, inti hinaraq wach'irichun, nispan, nirqanku. Chaykuna qhepatataq thak-kawsay suyuntinpi karqan tawa chunka watantin.