Read Quechua Cuzco Bible 1988 JUECES 6 Bible Online

JUECES 6 - Quechua Cuzco Bible 1988 bible

JUECES 6

¹Wakmanta Israel runakunaqa manapunin Señor Diospa munayninman hinachu ruwarqanku, chaymantan payqa qanchis watantinpacha Madián runakunaq munaychakuyninman saqerparirqan.

²Paykunataq Israel runakunata aswan-aswanta muchuchirqan, chaymi Israel runakunaqa orqokunapi pakakunata ruwakamurqanku qaqa k'aktukunapi, qaqa wasikunapi, qaqa patakunapi ima.

³Israel runakuna imallatapas tarpukuqtinkun, Madián runakuna, Amalek runakuna, inti lloqsiy lado runakunapiwan phawaykamuqku.

⁴Hinaspataq Israel suyupi tiyaykuqku, chakra llank'asqankutapas ch'usaqyachiqku Gaza llaqtakamaraq, Israel runakunaq mikhunanpaqtaq mana imapas kaqchu, ovejapas, wakapas, asnopas.

⁵Paykunaqa astakamuqku karpakunantin uywakunantin, langosta hina askhallaña, uywankuwanpas suyuntintan q'arachiqku. Paykunapas camellonkupas mana yupay atiyraqmi kaq.

⁶Chayraykun Israel runakunaqa khuyayta ñak'arirqanku, chayraqmi Señor Diosmanta yanapaynintapas mañakurqanku.

⁷Madián runakunaq ñak'arichisqan hawa Israel runakuna Señor Diosta waqyakuqtinmi,

⁸Señor Diosqa huk profetata paykunaman kachamurqan. Hinan profetaqa nirqan: —Israelpa Diosnin Señormi nin: Egipto suyupi kamachi kashaqtiykichismi horqomurqaykichis.

⁹Manataq Egiptollamantachu horqomurqaykichis, kaypi muchuchiqniykichismantapas horqollarqaykichistaqmi, paykunatan haykusqaykichisman hina wikch'urqani, qankunamantaq hallp'ankuta qopurqaykichis.

¹⁰Nirqaykichistaqmi: Ñoqan Apu Señor Diosniykichis kani, tiyasqaykichis hallp'api Amor runakunaq diosninkunataqa aman yupaychankichischu, nispa. Qankunataq ichaqa nisqayta mana kasukurqankichischu, nispan, nirqan.

¹¹Chaymantataq Señor Diospa angelninqa Oframan hamuspa, Abiezerpa miraynin Joaspa encina sach'an chakipi tiyaykurqan. Joaspa churin Gedeontaq pakallapi uvas saruna ukhupi trigota p'anasharqan, Madián runakunaq mana rikunanpaq.

¹²Hinan Señor Diospa angelninqa rikhurispa nirqan: —Kallpasapa allin qhari, qanwanmi Señor Diosqa kashan, nispa.

¹³Gedeontaq kutichirqan: —Amalla mana allinpaq hap'irqowankichu, wiraqocha, Señor Dios ñoqaykuwan kashaqtinri, ¿imanaqtintaq kay hina imaymanakuna kawanku? ¿Maytaq chay machulaykuq rimasqan Señor Diospa musphana ruwasqankunari? Egiptomantan Señor Diosqa horqomuwarqanku, nispan nirqanku. Kunanmi ichaqa Señor Dios wikch'upuwanku, Madián runakunamantaq qaraykuwanku, nispa.

¹⁴Wakmanta Señor Diosqa kutichirqan: —Rillay qanqa, kallpallaykiwanmi Israel llaqtamasiykita Madián runakunaq munaychakuyninmanta qespichinki. Ñoqa kikiymi kachashayki, nispa.

¹⁵Gedeonmi kutichillarqantaq: —Amalla mana allinpaq hap'irqowankichu, wiraqocháy, chayri, ¿imaynatataq Israeltari qespichiyman? Familiayqa Manasés ayllumanta sinchi wakchallan, ñoqapas manan imapaschu kani paykuna ukhupiqa, nispa.

¹⁶Niqtinmi Señor Diosqa nirqan: —Atillankin, ñoqan qanwan kashasaq. Ch'ulla runapas kashanman hinatan Madián runakunataqa ñit'irparinki, nispa.

¹⁷Chaymi Gedeonqa nillarqantaq: —Allinpaq hap'iwanki chayqa, Señor Dios kasqaykita yachanaypaq ima señaltapas rikuchiway.

¹⁸Ama hinachu kay, amaraq kaymanta ripuychu qanman haywarinaypaq ofrendata apamunaykama, nispa. Señor Diostaq nirqan: —Arí, kutimunaykikama kaypin suyashasqayki, nispa.

¹⁹Wasinman haykuspataq Gedeonqa cabrachata t'impuchimurqan, arroba hak'umantataq mana qonchuyoq t'antata ruwarqorqan. Hinaspa aychata canastaman churaykuspa, caldontapas mankaman hich'aykuspa, aparikurqan encina sach'aq kasqankama.

²⁰Chaypitaq Diospa angelninqa kamachirqan: —Chay aychata mana qonchuyoq t'antatawan kay qaqa pataman churaykuspa caldowan ch'aqchuykuy, nispa. Hinan Gedeonqa kamachisqanta hina ruwarqan.

²¹Señor Diospa angelnintaq chay aychata t'antatawan tawnanwan tupaykurqan, hinan qaqamanta ninaqa rawrarimuspa t'antata aychatawan ruphapurqan. Chay ratopachataq Señor Diospa angelninqa chinkapurqan.

²²Señor Diospa angelnin kasqanta reparaspataq, Gedeonqa nirqan: —¡Waw! ¡Qollana Señor Diosníy! ¡Uya-uyapuran angelniykiwan tupaykuni! nispa.

²³Señor Diostaq ichaqa nirqan: —Ama mancharikuychu, manan wañunkichu, allillanpunin kanki, nispa.

²⁴Hinan Gedeonqa Señor Diospa sutinpi huk altarta chaypi perqarqan, suticharqantaq: Thak-kaymi Señor Diosqa, nispa. Chay altarqa Abiezerpa mirayninpa Ofra llaqtanpi kashallanpuni.

²⁵Chay tutapachataq Señor Diosqa Gedeonta nirqan: —Taytaykiq hukkaq qanchis watayoq toronta aysay, hinaspataq taytaykiq ruwasqan Baalpa altarninta kumpay, kumpallaytaq altarnin qayllapi k'ullumanta Asera nisqa diosatapas.

²⁶Hinaspataq kay qaqa patapi ñoqa Apu Señor Diosniykiq sutiypi huk altarta allin ruwasqata perqanki. Chaymantataq chay hukkaq torota ñoqapaq sacrificiota ruphachimunki, Asera nisqa k'ullu diosa ch'eqtasqa patapi, nispa.

²⁷Hinan Gedeonqa pusarikurqan chunka runakunata Señor Diospa kamachisqankunata ruwamunanpaq, ichaqa manan p'unchaychu ruwarqan aswanpas tutalla, llaqta runata taytanpa ayllunkunatawan manchakuspa.

²⁸Qhepantin paqartaq llaqta runakuna rispa Baalpa altarnin kumpasqata Asera nisqa k'ullu diosatapas wit'usqata tarimurqanku, chaymantapas mosoq altar patapi huk toro ruphachisqatawan rikurqanku.

²⁹Hinan paykunapura tapunakurqanku: —¿Pitaq kaytari ruwarqon? nispa. Tapupakuspankutaq yacharqorqanku Joaspa churin Gedeón chaytaqa ruwasqanta.

³⁰Hinan Joasman phawaspanku nirqanku: —Churiykita horqomuy sipinaykupaq, Baal nisqa diospa altarnintan thunirqamusqa, qayllanpi k'ullumanta Asera nisqa diosatawan, nispa.

³¹Hinan Joasqa chay runakunata nirqan: —¿Qankunachu Baalmanta hark'akuspa sayarinkichis? ¡Chay hark'apakuspa sayariq runakuna wañuchun manaraq pacha illarimushaqtin! Diospunitaqchus Baal chayqa, sapanyá maqapakushachun altarninta thunisqamanta, nispa.

³²Chaymi nirqanku: —Baalyá Gedeonta maqashachun paypa altarninta thunisqanmanta, nispa. Gedeontataq suticharqanku Jerobaal[3] nispa.

³³Chaymantataq llapan Madián runakuna, Amalek runakuna, inti lloqsiy lado runakunapas huñuykukuspa Jordán mayuta chimparqanku, hinaspan Jezreel pampapi qaynarqanku.

³⁴Hinan Señor Diospa espiritunqa Gedeonman hunt'aykurqan, paytaq oveja waqrata tocarqan Abiezerpa miraynin huñukamunanpaq.

³⁵Chaymantapas willaqkunata kacharqan llapan Manasés aylluman Aser aylluman, Zabulón aylluman, Neftalí ayllumanwan huñukamunankupaq, hinan paykunapas rillarqankutaq.

³⁶Chaymi Gedeonqa Diosta nirqan: —Qanmi niwarqanki Israelta qespichinayta.

³⁷Chay niwasqaykita yachanaypaqmi oveja qarata era pataman churasaq. Tutamanta hamunaypaqtaq oveja qaralla sullaq ch'aranchasqan kanqa pampataq ch'aki kanqa chayqa, chaypin yachasaq cheqaqtapuni: Israelta qespichinki, niwasqaykita, nispa.

³⁸Tutamanta rinanpaqtaq munasqan hinapuni qaralla hallch'ullaña kashasqa, qarata ch'irwarqoqtintaq hatun p'uku hunt'a sulla unuqa kasqa.

³⁹Chaywanpas Gedeonqa Diosta nirqan: —Ama phiñakuychu, hukllatawan nisqayki, kay kutillatawanñan yachayta munani. Kay kutipiqa qarañataq ch'aki kachun, hallp'ataq sullaq ch'aranchasqan, nispa.

⁴⁰Hinan chay tutaqa munasqanta hinapuni Diosqa ruwallarqantaq. Tutamanta rinanpaqmi kashasqa hallp'aqa sullaq ch'aranchasqan, qarañataq ch'aki.