Read Quechua Cuzco Bible 1988 JUECES 9 Bible Online

JUECES 9 - Quechua Cuzco Bible 1988 bible

JUECES 9

¹Jerobaalpa churin Abimelektaq Shehem llaqtaman rirqan mamanpa ayllunkunawan parlaq, hinaspan llapanta nimurqan:

²—Llapan Shehem runakunata tapuychis: ¿Jerobaalpa qanchis chunkantin churinkunaq kamachisqan kaytachu munankichis, icha ch'ulla runallaq kamachisqan kaytachu? nispa. Qankunapas reparaychisyá ñoqaqa yawarniykichismi kani riki, nispa.

³Chaymi mamanpa ayllunkunaqa sumaqta parlapayarqanku Shehem runakunata, hinan Shehem runakunaqa llapallanku Abimelekta rey kananta munarqanku: Payqa ayllunchismi, nispanku.

⁴Hinan Abimelekman qorqanku Baal-berit nisqa diospa yupaychana wasinmanta qanchis chunka qolqeta. Chay qolqewanmi payqa millay tumaqaya runakunata mink'arqan paywan rinanpaq.

⁵Hinan paykunaqa rirqanku taytan Jerobaalpa Ofrapi wasinta, chaypitaq huk qaqa patapi Abimelekqa wawqenkunata qanchis chunkantinta sipirarqan, Jerobaalpa sullk'akaq churin Jotamtaq pakakuspa mana wañurqanchu.

⁶Chaymantataq Shehem runakuna llapan Bet-milo cheqas runakunapiwan huñuykukurqanku Shehempi yupaychana saywa rumiq kasqan encina mallki chakipi, chaypitaq Abimelekta reyta churakurqanku.

⁷Chayta willaqtinkutaq Jotamqa Gerizim orqo pataman seqarqan, hinaspan chay patamanta alto kunkawan waqyakamurqan llapankuq uyarinanpaq hina: —¡Uyariwaychis Shehem runakuna! ¡Diospas qankunata uyarillachuntaq!

⁸Llapan mallkikunas puririsqaku reyninkuta akllakunankupaq. Olivo sach'atas nisqaku: Reyniyku kapuwayku, nispanku.

⁹Olivo sach'ataqsi nisqa: Aceiteywanmi yupaychakun runakunatapas dioskunatapas. ¿Chaytachu ñoqari saqeyman qankunaq reyniykichis kanaypaq? nispa.

¹⁰Higos sach'atataqsi nisqaku: Qanyá reyniyku kapuwayku, nispanku.

¹¹Higos sach'ataqsi nisqa: Misk'illañan kani sumaq ruruyoqtaq. ¿Chaytachu ñoqari saqeyman qankunaq reyniykichis kanaypaq? nispa.

¹²Uvas sach'atañataqsi nisqaku: Qanyá reyniyku kapuwayku, nispanku.

¹³Uvas sach'ataqsi nisqa: Vinoywanmi kusikun runakunapas dioskunapas. ¿Chaytachu ñoqari saqeyman qankunaq reyniykichis kanaypaq? nispa.

¹⁴Llapan mallkikunas t'ankartañataq nisqaku: ¡Qanyá reyniyku kapuwayku! nispanku.

¹⁵T'ankar ch'aphrataqsi nisqa: Cheqaqtapuni akllakuwaspaykichisqa, hamuychis llanthuypi k'ustuykuq. Mana chaytaq ñoqamanta nina rawrarichun Líbano cedro mallkikunata ruphananpaq, nispa.

¹⁶Kunantaq niwaychis: ¿Cheqaq allin yuyaywanpunichu Abimelekta reypaq akllarqankichis? ¿Qankunari Jerobaalta aylluntawan sumaqtachu rikurqankichis imaynan paypas qankunata rikurqasunkichis hinata?

¹⁷Taytayqa wañuytapas mana manchaspan qankunarayku maqanakurqan Madián runakunamanta qechunasuykichispaq.

¹⁸Qankunataq aswanraq taytaypa ayllunkuna contra sayarirqankichis, churinkunatapas huk qaqa patallapi qanchis chunkantinta sipirarqankichis. Chaymantataq uywasqan warmiq churin Abimelektaraqtaq yawarniykichis kasqanrayku Shehem reyta churakunkichis.

¹⁹Kunan cheqaq allin yuyaywanchus ruwarqankichis Jerobaalta ayllunkunatawan chayqa, Abimelekwan kusikuychis paypas qankunawan kusikullachuntaq.

²⁰Mana chay hina kaqtintaq, Abimelekmanta nina rawrarispa llapan Shehemta Bet-milotawan ruphachun, hinallataq Shehem-manta Bet-milomantawan nina rawrarimuspa Abimelekta ruphachun, nispa.

²¹Chayta niykuspataq Jotamqa wawqen Abimelekta manchakuspa Beer llaqtaman tiyakapuq ayqekapurqan.

²²Abimelektaq kinsa wataña Israel runakunata kamachirqan.

²³Hinan Diosqa Abimelekman Shehem runakunamanwan mana allin yuyayta churaykurqan paykunapura cheqninakunankupaq, chaymi Shehem runakunaqa Abimelek contra hatarirqanku,

²⁴Diosmi chayta ruwarqan Jerobaalpa qanchis chunkantin churinkuna sipisqanku aynimanta Abimelekwan yanapaqnin Shehem runakunapiwan ñak'arichisqa kanankupaq.

²⁵Shehem runakunataq orqo patakunaman runakunata churamurqanku Abimelekman phawaykunankupaq, chaykunataqmi ñan puriqkunata lliwta qonqay llat'anasharqanku. Chaytataq hukkuna Abimelekman willakamurqanku.

²⁶Huk p'unchaytaq Ebedpa churin Gaalqa wawqenkunantin Shehemman hamurqan, Shehem runakunataq payta hap'ipakurqanku.

²⁷Hinaspan llapanku uvas chakraman pallaq rirqanku, chaypitaq uvasta saruspa q'ochukurqanku. Chaymantataq kutirqanku diosninkuq wasinman, chaypin mikhuspanku ukyaspanku Abimelek contra millayta rimarqanku.

²⁸Hinan Gaalqa nirqan: —Jerobaalpa churillan kashaspa, ¿imamanraqmi chay Abimelekqa tukushan? ¡Chay Zebultaq kamachin hina! Ñoqanchis Shehem runakunari, ¿imataq kashanchis paykunaq kamachinpi kananchispaqri? Aswanpas Shehem llaqta sayarichiq Hamorpa kamachinta ruwasun, ama Abimelektaqa kasusunchu.

²⁹¡Ay! Ñoqalla qankunaq umaykichis karqoymanqa, Abimelektaqa hukpaqkaman wikch'urqoyman. Niymanraqtaq: Soldadoykikunata huñumuy maqanakunanchispaq, nispay, nispa.

³⁰Ebedpa churin Gaalpa rimasqanta uyarispataq, llaqta kamachiq Zebulqa phiñakurqan.

³¹Hinaspan Abimelekman pakaylla willachimurqan: Ebedpa churin Gaalmi wawqenkunantin Shehemman hamusqaku, hinaspan llaqta runata yachachispa qan contra tanqashan.

³²Chayrayku soldadoykikunapiwan tutalla hamuychis, hinaspa campopi pakarqarikamuychis.

³³Tutamantataq llaqtaman phawaykamunkichis inti lloqsimuqtin hina. Gaal runankunantin qanwan maqanakuq lloqsimuqtinkutaq, ima munasqaykita paykunata ruwanki, nispa, nichirqan.

³⁴Chaymi Abimelekqa kaq tutapacha soldadonkunantin lloqsimuspa tawa t'aqaman rakinakurqan, Shehem qayllapitaq pakarqarikurqanku.

³⁵Gaaltaq llaqta punkuman lloqsimurqan, hinan Abimelekqa soldadonkunantin pakakusqankumanta lloqsirqarimurqanku.

³⁶Chay runakunata rikurqospataq Gaalqa Zebulta nirqan: —¡Qhawariy! Runakunaraqsi orqokunamanta uraykarqarimushan, nispa. Zebultaq nirqan: —Orqokunaq llanthuntachá runata hina qanqa qhawashanki, nispa.

³⁷Wakmanta Gaalqa nillarqantaq: —¡Qhawariy! Pachaq Pupun nisqamantapas huk t'aqa hamushallantaq. Huk t'aqapas Watuqkunaq Encina Sach'an ñanmanta hamushallantaq, nispa.

³⁸Zebultaq ichaqa nipurqan: —Kunanri, ¿ima ninkitaq, simisapa? Kusataraqtaq rimasharqankiqá: ¿Imataq kashanchis Abimelekpa kamachinpi kananchispaqri? nispa. Haqaymi qanpa pisichasqayki soldadokuna. ¡Phawayyá! Riy, hinaspa paykunawan maqanakamuy, nispa.

³⁹Chaymi Gaalqa Shehem runakunapiwan maqanakuq lloqsirqan.

⁴⁰Abimelektaq ichaqa Gaalta qatiykacharqan, hinan Gaalqa paymanta ayqerikapurqan. Askhataq k'irisqa karqanku, llaqtaman haykuna punkupipas.

⁴¹Abimelektaq Aruma llaqtapi qhepakurqan, Zebulñataq Shehemmanta Gaalta wawqenkunatawan qarqompurqan.

⁴²Qhepantin p'unchaytaq Shehem llaqta runakunaqa chakrankuman qhawaq lloqsirqanku, chaytataq Abimelekman willarqanku.

⁴³Hinan payqa soldadonkunata kinsaman t'aqarqarispa pampaman pakarqarichirqan. Llaqtamanta lloqsisqankuta rikurqospataq pakakusqankumanta phawarispa maqamurqanku.

⁴⁴Abimelektaq paywan kaq soldadokunapiwan llaqta punkuman phawarispa chaypi sayarparirqan. Wakin iskay t'aqañataq chakrankupi kashaqkunaman phawaykuspa wañuchirqanku.

⁴⁵Chay p'unchay ch'isiyaqnintinmi Abimelekqa llaqta runakunawan maqanakurqan llaqtata hap'ikapunankama, hinaspan llapan chaypi tiyaq runakunata wañuchirqan, llaqtamantaq kachita wisñiykurqan.

⁴⁶Chay ruwasqanta yachaspataq, Shehem llaqta torrepi kashaqkuna haykurqanku El-Berit nisqa diosninku yupaychana wasi ukhu pukaraman.

⁴⁷Chaypi llapa runakunaq huñusqa kasqanta yachaspataq,

⁴⁸Abimelekqa llapa soldadonkunantin Salmón orqota wicharqan. Chaypitaq hachawan ch'aphrakunata wit'urqan, chayta winaychakuspan q'epikurqan. Hinaspa soldadonkunata kamachirqan: —Usqhaylla qankunapas ñoqa hina ruwaychis, nispa.

⁴⁹Hinan ch'aphrakunata winaycharqarikuspa, Abimelekpa qhepanta rirqanku diosninku yupaychana wasikama. Chaypitaq ch'aphrata tawqaykuspa ninawan kanaykurqanku. Chay hinapin llapan torrepi kaqkunata wañuchirqanku, yaqa waranqata hina qharikunantinta warmikunantinta.

⁵⁰Chaymantataq Abimelekqa Tebes llaqtaman rirqan, hinaspan llaqtata muyuykuspa hap'ikapurqan.

⁵¹Chay llaqta chawpipin allin ruwasqa torre karqan, chaymanmi llapan qharikuna warmikuna llaqta uma runakunapiwan pakarqokurqanku, ukhumanta punkuta wisq'arqamuspataq torre pataman seqarqorqanku.

⁵²Abimelektaq maqanakuspa torre punkuman chayarqan, chayta kanaykunan kashaqtintaq,

⁵³huk warmiqa torre patamanta tunawa rumiwan ch'aqemuspa Abimelekpa umanta ch'eqtarqan.

⁵⁴Hinan Abimelekqa usqhaylla arma q'epiysiqninta waqyarispa nirqan: —Espadaykita horqokuspa sipirqapuway, ama ñoqamanta: Warmiq sipisqanmi wañurqon ninankupaq, nispa. Chaymi arma q'epiysiqninqa sat'irqapurqan, Abimelektaq wañupurqan.

⁵⁵Hinan Israel runakunaqa Abimelekta wañusqata rikuspanku, wasinkuta ripurqanku.

⁵⁶Chay hinapin Diosqa Abimelekman kutichipurqan taytanta mana allin ruwasqanmanta, qanchis chunkantin wawqenkuna wañuchisqanmantawan.

⁵⁷Kaqllataq Shehem runakunamanpas Diosqa kutichipurqan mana chanin ruwasqankumanta, Jerobaalpa churin Jotampa ñakayninpas llapankumanmi chayarqan.