Read Quechua Cuzco Bible 1988 2 JUAN 1 Bible Online

2 JUAN 1 - Quechua Cuzco Bible 1988 bible

2 JUAN 1

¹Ñoqa kurak runan Diospa akllasqan mamaman wawaykikunamanwan qelqamuyki. Qankunatan cheqaqtapuni munakuykichis, manataq ñoqallachu, aswanpas cheqaq-kayta llapa reqsiqkunapas munakullasunkichistaqmi.

²Qankunataqa munakuykichis sonqonchispi cheqaq-kay kasqanraykun, chay cheqaq-kayqa wiñaypaqmi ñoqanchiswan kanqa.

³Cheqaqtapuni munakuspa Dios Yayanchis churin Jesucristopiwan sumaqta qhawariwasunchis, khuyapayawasunchis, thak-kaytapas qowasunchis.

⁴Anchatapunin kusikurqani, imaynan Dios Yaya kamachiwarqanchis chayman hina wakin wawaykikuna cheqaq-kaypi purishasqankuta rikuspay.

⁵Kunanqa, panáy, valekuyki hukkuna hukkunawan munanakunanchistan. Kay qelqamusqayqa manan mosoq kamachikuychu, aswanpas qallariymantapacha yachasqanchis kikin kamachikuymi.

⁶Munakuyqa Diospa kamachikuyninkunaman hina kawsananchismi. Qallariymantapacha yachasqaykichis kamachikuyninqa kaymi: munakuypi kawsanaykichismi.

⁷Askhan pantachikuqkunaqa kay pachapi purishanku, paykunaqa Jesucristoq runa kaypi hamusqantan neganku. Chay hina runakunaqa q'otukuqkunan, Cristo contra sayariqkunataqmi.

⁸Qankunaqa makilla paykunamanta cuidakuychis, llank'asqaykichis ama usuqpaq kananpaq, aswanpas hunt'asqa premiota chaskinaykichispaq.

⁹Pipas Cristoq yachachikuyninpi mana takyaspa astawan yapaykun chayqa, manan Dioswan hukllachasqachu kashan, Cristoq yachachikuyninpi takyaqmi ichaqa Yayawanpas Churiwanpas hukllachasqa kashan.

¹⁰Pipas watukuq hamuspa mana kay yachachikuytachu yachachisunkichisman chayqa, ama chay runataqa wasiykichispi chaskiychischu, amataq napaykullaychispaschu.

¹¹Pipas payta napaykuqqa mana allinkunata ruwaq-masinñan kapun.

¹²Askhapunin kashan qankunata rimapayanayqa, ichaqa manan cartallapichu chaykunataqa qelqamuyta munani, aswanpas watukuqmi hamuyta munashaykichis, uya-uya pura rimananchispaq, hinaspa sonqopas-sonqo kananchispaq.

¹³Diospa akllasqan ñañaykiq wawankunan napaykamusunkichis.