Read Quechua Cuzco Bible 1988 3 JUAN 1 Bible Online

3 JUAN 1 - Quechua Cuzco Bible 1988 bible

3 JUAN 1

¹Ancha munasqay Gayo, ñoqa kurak runan qelqamuyki, qanta cheqaqtapuni munakuspay.

²Munasqa wawqéy, ñoqaqa tukuy imapipas allillanpuni qhalillapuni kanaykipaqmi Diosmanta mañapuyki, yachanin Cristowan kawsayniykiqa allinpuni kasqanta.

³Wawqekuna hamuspanmi hunt'aqpuni kashasqaykimanta willawanku, chaymi maytapuni kusikurqani, qanqa cheqaq-kayman hinapunin kawsashanki.

⁴Ñoqaqa iñiypi wawaykunaq cheqaq-kaypi purisqanta uyarispan tukuy imamantapas astawanqa kusikuni.

⁵Munasqa wawqéy, tukuy imapipas iñiq-masinchiskunata yanapaspaykiqa allintapunin ruwashanki, astawanqa karu llaqtamanta kaqkunata yanapaspa.

⁶Paykunan iñiq t'aqaman willarqanku munakuywan yanapaykusqaykimanta. Valeykukuykin, Diospa sonqonman chayaqta hinapuni paykunata yanapaykuy allillan purinankupaq.

⁷Paykunaqa Jesucristomanta willamunankupaqmi puririrqanku, manataqmi imatapas Diospi mana iñiq runakunamantaqa chaskinkuchu.

⁸Chaymi ñoqanchisqa chay hina wawqekunata qorpachananchispuni, cheqaq-kay allin willakuykunata willaypi yanapakuq kananchispaq.

⁹Iñiq t'aqamanmi huk cartata qelqamurqani, ichaqa Diotrefesmi mana kasukuyta munawankuchu, paykuna ukhupi uma kayta munaspa.

¹⁰Chayraykun hamuspayqa, contraykupi llullakuspa yanqa rimasqanmanta anyasaq. Payqa manan rimasqallanwanqa contentakunchu, aswanpas watukamuq wawqekunatan mana chaskinchu, paykunata chaskiyta munaqkunatapas hark'anmi, hinaspan iñiq t'aqamanta qarqon.

¹¹Munasqa wawqéy, qanqa ama mana allin ruwaqkunata qatipakuychu, aswanpas allinkaqllatapuni ruway. Allinkaqta ruwaqqa Diospan, mana allinkaqta ruwaqmi ichaqa, Diosta mana reqsinchu.

¹²Demetriomantaqa lliwmi allinta rimanku, kikinpa cheqaq kawsayninpas chaytapunin sut'inchan. Ñoqaykupas ahina kasqantapunin willayku, yachankichistaqmi willasqaykuqa cheqaq kasqanta.

¹³Askhapunin kashan qanman rimapayanayqa, ichaqa manan cartallapichu chaykunataqa qelqamuyta munani,

¹⁴aswanpas usqhayllan qanwan tupaykuyta munashani uya-uya pura rimananchispaq.

¹⁵Qanqa allillanña kashay. Kaypi kaq amigonchiskunan napaykamusunki. Qanpas chaypi kaq amigonchiskunata sapankankuta napaykapuway.