Read Quechua Cuzco Bible 1988 JUDAS 1 Bible Online

JUDAS 1 - Quechua Cuzco Bible 1988 bible

JUDAS 1

¹Jesucristoq kamachin Jacoboq wawqen ñoqa Judasmi kay cartata qelqamuykichis Diospa waqyasqankunaman. Qankunatan Dios Yaya munakushasunkichis, Jesucristotaq waqaychashasunkichis.

²Diosmi anchatapuni khuyapayasunkichis, thak-kaytapas qosunkichis, munakusunkichispas.

³Munasqay wawqe-panaykuna, maytapunin munarqani llapanchispa qespikuyninchismanta qankunaman qelqamuyta, ichaqa kunanmi sonqoy tanqariwan kaykunata qelqamunaypaq: qankunatan valekuykichis iñiyrayku qaqatapuni sayanaykichispaq. Chay iñiytan ch'ulla kutillata Diosqa llaqtanman qorqan.

⁴Diosta mana manchakuq wakin runakunan mana reparachikuq hinalla haykumurqasunkichis. Paykunaqa millay runakunan kanku, chaykunan ñawpaqmantaña huchachanapaq nisqaña karqanku, Diosninchispa khuyapayakuynintapas mana chanin kawsaymanmi tukuchinku, sapallan Qollana Señorninchis Jesucristotapas negankun.

⁵Yachashankichisña chaypas, munanin huk kutitawan qankunata kayta yuyarichiyta: Señor Diosqa Israel llaqtantan Egipto suyumanta horqomurqan, ichaqa chay qhepatan mana iñiq kaqkunata wañurachirqan.

⁶Hinallataq qallariypi munayniyoq kasqankuwan mana contentakuq angelkunatapas wiñaypaq watasqata laqhayaq ukhupi hatun taripay p'unchaypaq Diosqa waqaychashan, hanaq pacha tiyanankuta saqesqanku hawa.

⁷Kaqllataqmi Sodoma llaqtapas, Gomorra llaqtapas, muyuriqpi llaqtakunantin, chay angelkuna hinallataq qhellipi purirqanku aychaq sinchi munasqankunata ruwaspanku, chay hawa wiñay ninaq muchuchiyninta ñak'arirqanku. Chaykunaqa llapa wanananchispaq ejemplo churasqan kashan.

⁸Chay hinallataqmi chay mosqokuq runakunapas cuerponkuta qhellichanku, atiyniyoq Señorta pisichanku, hanaq pachapi atiyniyoqkunatapas k'aminku.

⁹Kikin umalli ángel Miguelpas saqrawan churanakushaspa, Moisespa ayanta qechunakushaspanqa, manan anchaykacharqanchu k'amispa saqrata huchachananpaq, aswanmi nirqan: Señormi anyasunki, nispa.

¹⁰Chay runakunan ichaqa mana yachashaspa imatapas k'aminku. Paykuna kikinkumanta munarisqankupitaq waqllinku mana yuyayniyoq uywakuna hina, wañuyman rinankupaq.

¹¹¡Ay, imaynaraqmi paykunaqa kanqaku! Cainpa ruwasqanta hinan ruwashanku. Qolqeraykun Balaam hina pantaykunku. Koré hinan sinchi mana kasukuq kaspanku wañuchisqa kanku.

¹²Iñiq t'aqa mikhuyniykichiskunapipas sinchi p'enqaymi paykunaqa kanku, chaypin qankunawan kuska kusisqa mikhunkupas ukyankupas mana p'enqarikuspa, paykunaqa mana allin michiqkuna hinan kikillankuta michikunku. Paykunaqa kanku wayraq apaykachasqan mana parayoq phuyu hinan, cosecha tiempopi mana ruruyoq sach'a sinchi ch'akisqa, saphimanta t'irasqa hinan.

¹³Paykunaqa mama qochaq sinchi phoqchiqesqan hinan kanku, p'enqay ruwasqankuqa qochaq wikch'usqan qhelli phosoqo hinan rikhurin. Paykunaqa mana takyaykuspa phawaykachaq ch'askakuna hinan kanku. Chaymi paykunaqa huchachasqa kashanku, laqhayaqkunaq aswan tutayaqninpi wiñaypaq kanankupaq.

¹⁴Paykunamantan Adanpa qanchiskaq miraynin Enokpas profetizarqan: Señortan rikurqani waranqa-waranqa ch'uya angelkunawan hamushaqta,

¹⁵lliwta taripananpaq, hinaspa llapa millay runakunata lliw mana chanin ruwasqankumanta, Diosta mana manchakuspa huchasapakunaq paypa contranpi llapa k'arak simikunata rimasqankumantawan huchachananpaq, nispa.

¹⁶Chay runakunaqa millay munasqallankuta ruwayta munaspankun chhuchupakunku, qhepallanpi rimakunku, hinallataq hatunchakuspanku runakunapaq allinta rimaq tukunku imatapas chaskinankuraykulla.

¹⁷Qankuna ichaqa, munasqay wawqe-panaykuna, yuyariychis Señorninchis Jesucristoq apostolninkunaq*f** ñawpaqmantaña nisqanku simikunata.

¹⁸Paykunan nirqasunkichis: P'uchukay qaylla tiempokunapiqa kanqan asipayakuqkuna, millay munayninkuman hina puriqkuna, nispa.

¹⁹Paykunaqa t'aqanachiqkunan kanku, kay pacha kaqpi yuyayniyoqmi kanku, manataqmi Diospa Espiritunqa paykunapi kanchu.

²⁰Qankuna ichaqa, munasqay wawqe-panaykuna, ancha ch'uya iñiyniykichispi wiñachinakuspa, Santo Espirituq atiyninpi Diosmanta mañakuspa,

²¹Diospa munakuyninpi wiñay kawsaypaq waqaychakuychis Señorninchis Jesucristoq khuyapayakuyninta suyakuspa.

²²Wakin iskayrayaqkunata iñiyninkupi yanapaykuychis.

²³Wakinta qespichiychis, ninamanta qechurqoq hina, wakinkunatataq cuidakuywan khuyapayaychis, ichaqa mana chanin kawsayninkuta qhellichasqa p'achata hina cheqnikuychis.

²⁴Chay hinaqa, mana urmaqta waqaychaqniykichis Diosman, ancha kusikuywan qhapaq qayllanman mana huchachanata asuykachiqniykichis sapallan atiyniyoq, yachayniyoq Qespichiqninchis Diosman, qhapaqchaypas, hatunchaypas, hatun kamachikuypas, qhapaq atiypas Señorninchis Jesucristowan kachun, qaynapas, kunanpas, wiñay-wiñaypaqpas. Ahinapuni kachun.