Read Quechua Cuzco Bible 1988 APOCALIPSIS 1 Bible Online

APOCALIPSIS 1 - Quechua Cuzco Bible 1988 bible

APOCALIPSIS 1

¹Diosmi kaykunata Jesucristoman rikuchirqan, Jesucristotaq yaqaña sucedenan kaqkunata kamachinkunaman rikuchinanpaq. Chaymi Jesucristoqa angelninwan chaykunata kamachin Juanman willachirqan.

²Juanmi tukuy imaymana rikusqanta willakuspa Diospa siminta Jesucristoq willasqantawan willakurqan.

³Kusisamiyoqmi kay qelqapi profetizasqa simikunata leeqqa, hinallataq leesqata uyarispa chay qelqasqakunata hunt'aqkunapas, chaykunaq sucedenan tiempoqa sispaykamushanñan.

⁴Ñoqa Juanmi Asia provinciapi kaq qanchis iñiq t'aqaman qelqamuykichis: Diosmi Jesucristopiwan qanchis espiritupiwan sumaqta qhawarisunkichis thak-kaytapas qosunkichis. Diosmi ñawpapas karqan, kunanpas kashan, qhepamanpas kanqa. Jesucriston hunt'aq testigoqa, wañusqanmanta kawsarimpuq phiwipas, kay pacha reykunata kamachiqpas. Qanchis espiritukunapas Diospa tiyananpa ñawpaqenpin servishanku. Jesucriston munakuwaqninchis, huchanchiskunamanta yawarninwan kacharichiwaqninchis,

⁶hinaspa Dios Yayanta servinanchispaq reykunata sacerdotekunata ima churawaqninchispas. Payman hatunchaypas atiypas wiñay-wiñaypaq kachun. Ahinapuni kachun.

⁷Qhawariychis, phuyupin Cristo hamushan, llapa runan payta rikunqa, t'urpuspa k'iriqninkunapas rikunqan, hinaspan kay pacha lliw ayllukuna payta rikuspa waqaykunqaku. Arí, ahinapuni kachun.

⁸Tukuy-atiyniyoq Señor Diosmi nin: Ñoqan kani qallariypas tukukuypas[1]. Ñoqan kani ñawpa kaqpas, kunan kaqpas, qhepaman kaqpas, nispa.

⁹Ñoqa wawqeykichis Juanmi Jesuswan hukllachasqa kaspa Diospa kamachikunanta suyaq-masiykichis kani, qankunawan kuskataq ñak'ariykunatapas pacienciawan muchushani. Patmos sutiyoq islapin preso kasharqani Diospa siminmantawan, Jesucristomantawan willakusqayrayku.

¹⁰Hinan Señorpa p'unchayninpi Santo Espirituq kallpachasqan kashaspay qhepaypi huk kunkata uyarirqani, kunkayoqta rimashaqta, cornetaq waqayninta hina.

¹¹Chay kunkan niwarqan: Qelqa k'uyupin qelqanki rikusqaykita, hinaspa Asia provinciapi kaq qanchis iñiq t'aqaman apachinki: Efesoman, Esmirnaman, Pergamoman, Tiatiraman, Sardisman, Filadelfiaman, Laodiceamanwan, nispa.

¹²Hinan rimaykamuwaqniyta rikunaypaq qhepayta qhawarikuspa rikurqani qanchis qori candelerota,

¹³chay candelerokuna chawpipitaq runaman rikch'akuqta rikurqani, qoysu p'achawan p'achasqata, qhasqon cheqaspi qori cinturonwan chumpiykusqata.

¹⁴Chukchantaq kasqa yuraq millma hina, rit'i hina yuraqllaña, ñawinpas rawrashaq nina hina kasqa.

¹⁵Chakinkunapas hornopi ch'uyayachisqa k'anchashaq bronceman rikch'akuqmi kasqa, kunkanpas askha unuq phaqchasqanmanmi rikch'akusqa.

¹⁶Paña makinpitaq qanchis qoyllurkunata hap'ishasqa, siminmantataq iskay ladon filoyoq espada lloqsimushasqa, uyantaq allinta k'anchashaq inti hina kasqa.

¹⁷Hinan ñoqaqa payta rikuspa wañusqa hina ñawpaqenpi wikch'ukurqani. Chaymi payqa paña makinwan llamiykuwaspa niwarqan: Ama mancharikuychu, ñoqan kani ñawpa kaqpas qhepa kaqpas.

¹⁸Ñoqaqa kawsaq kaqmi kani, wañusqan karqani, kunantaq ichaqa wiñay-wiñaypaq kawsani. Ñoqaq munayniypin kashan Wañuypas Ukhu-pachapas.

¹⁹Chay hinaqa, rikusqaykikunatan qelqanki: kunan kaqkunata, imakunachus qhepaman kanantawan.

²⁰Paña makiypi qanchis qoyllurkuna rikusqaykimanta, qanchis qori candeleromantawan entiendey: Chay qanchis qoyllurkuna rikusqaykiqa qanchis iñiq t'aqaq angelninkunan, qanchis candelerota rikusqaykipas qanchis iñiq t'aqan, nispa.