Read Quechua Cuzco Bible 1988 APOCALIPSIS 10 Bible Online

APOCALIPSIS 10 - Quechua Cuzco Bible 1988 bible

APOCALIPSIS 10

¹Chaymantataq wak kallpasapa angelta hanaq pachamanta uraykamushaqta rikurqani, phuyuwan p'istuykusqata, uma patanpi k'uychiyoqta. Uyanmi inti hina k'ancharqan, phakankunataq nina rawray aysakuyman rikch'akurqan.

²Makinpitaq kicharisqa huch'uy qelqa k'uyuta hap'isharqan. Paña chakinwanmi mama qochata sarurqan, lloq'e chakinwantaq hallp'a pachata sarurqan.

³Hinaspan kunkayoqta qaparirqan, leonpas qaparishanman hinaraq. Chay hinata qapariqtinmi, qanchis t'oqyaykuna kunununurqan.

⁴Chay qanchis t'oqyaqkuna kunununuqtinmi ñoqa qelqanayña kasharqan, ichaqa hanaq pachamantan huk kunka nimuwarqan: Sonqollaykipi waqaychay chay qanchis t'oqyaqkunaq rimasqanta, ama chaykunataqa qelqaychu, nispa.

⁵Mama qochapi hallp'a patapiwan sayashaq rikusqay angelmi hanaq pachaman makinta haywarirqan,

⁶hinaspan hanaq pachatapas, kay pachatapas, mama qochatapas, lliw chaykunapi kaqkunatapas kamaq, wiñay-wiñaypaq kawsaq Diospa sutinpi jurarqan: ¡Suyana tiempoqa tukukapunñan!

⁷Qanchiskaq ángel trompetata tocayta qallarinqa chay p'unchaymi Diospa pakasqa yuyaykusqanqa hunt'akunqa, kamachin profetakunaman*f** willasqanman hina, nispa.

⁸Hanaq pachamanta uyarisqay kunkataq huktawan nimuwarqan: Riy, chaskimuy mama qochapi hallp'a patapiwan sayashaq angelpa hap'ishasqan kicharisqa huch'uy qelqa k'uyuta, nispa.

⁹Hinan angelman rirqani, chay huch'uy qelqa k'uyuta qowananpaq mañaq, chaymi payqa niwarqan: Hap'iy, hinaspa mikhuy. Simiykipiqa miel hinan misk'i kanqa, wiksaykipitaqmi hayallaña kanqa, nispa.

¹⁰Chaymi angelpa makinmanta huch'uy qelqa k'uyuta chaskispa mikhuykurqani, hinan simiypi miel hina misk'i karqan, millp'uykuqtiyñataq wiksaypi hayallaña karqan.

¹¹Hinan angelqa niwarqan: Huktawanmi profetizanayki askha llaqtakunamanta, suyukunamanta, tukuy t'aqa rimaqkunamanta, reykunamantawan, nispa.