Read Quechua Cuzco Bible 1988 APOCALIPSIS 13 Bible Online

APOCALIPSIS 13 - Quechua Cuzco Bible 1988 bible

APOCALIPSIS 13

¹Ñoqan rikurqani mama qochamanta huk manchay wak'a animal lloqsimushaqta, qanchis umayoqta chunka waqrayoqta. Sapanka waqranpitaq rikurqani huk coronata, umankunapitaq Dios contra rimaq qelqata.

²Chay rikusqay wak'a animalqa leopardomanmi rikch'akusqa, chakinkunataq ukumariq hina kasqa, simintaq leonpa simin hina kasqa. Dragontaq*f** chay wak'a animalman qorqan atiyninta, kamachikunan tiyanata, hatun munaychakuynintawan.

³Wak'a animalpa huknin umantataq wañunanpaq hina k'irisqata rikurqani, ichaqa chay k'irinmi alliyachisqa karqan. Hinan lliw kay pachantin runakuna musphaspa chay wak'a animalta qatikurqanku.

⁴Wak'a animalman atiyta qosqanraykun dragontaqa*f** runakuna yupaycharqanku, hinallataq kikin wak'a animaltapas yupaycharqanku: ¿Pitaq kay manchay wak'a animal hinaqa? ¿Pitaq paywan maqanakuytaqa atinman? nispa.

⁵Chay wak'a animaltan hinallata rimachirqan Dios contra millay qhelli simikunata, hinallataq tawa chunka iskayniyoq killa kamachikunanpaq atiyta qorqan.

⁶Chaymi Diospa contranpi millay qhelli simikunata rimaspa k'amirqan sutintapas, kamachikunan tiyanatapas, hanaq pachapi kaqkunatapas.

⁷Diosllapaqña kawsaqkunawan maqanakuspa atipananpaqmi wak'a animalman atiyta qorqan, hinallataq lliw ayllukunata, llaqtakunata, tukuy t'aqa rimaqkunata, suyukunata kamachinanpaqpas atiyta qorqan.

⁸Chaymi kay pachapi llapa tiyaqkunaqa chay wak'a animalta yupaychanqaku, kay pacha qallariymantapacha wañuchisqa Corderoq kawsay libronpi sutinku mana qelqasqa kaq llapa runakunaqa.

⁹Pipas ninriyoqqa uyarichun.

¹⁰Pipas preso apanapaq kaqqa, preso apasqapunin kanqa, pipas espadawan wañuchinapaq kaqqa espadawan wañuchisqallapunin kanqa. Chayraykun Diosllapaqña kawsaqkunaqa pacienciatapas iñiytapas necesitanku.

¹¹Chay qhepatataq rikurqani wak manchay wak'a animalta hallp'a pachamanta wicharimushaqta. Chaymi kasqa borrego hina iskay waqrayoq, rimasqataq ichaqa dragón*f** hina.

¹²Ñawpaqkaq wak'a animalpa atiyninwanmi chaypa ñawpaqenpi kamachirqan, chaymi wañunanpaq k'irimanta alliyachisqa ñawpaqkaq wak'a animalta kay pachapi llapa tiyaqkunawan yupaychachirqan.

¹³Musphana milagrokunatan ruwarqan, hanaq pachamanta kay pachaman nina paratapas llapa runa rikushaqtinmi chayachimurqan.

¹⁴Ñawpaqkaq wak'a animalpa ñawpaqenpi milagrokunata ruwananpaqmi atiyta qorqan, chaykunawanmi kay pachapi tiyaqkunata q'oturqan, hinaspa kamachirqan espadawan k'irisqaña kaspapas kawsashaq chay wak'a animalpa rikch'ayninta ruwanankupaq.

¹⁵Hinan ñawpaqkaq wak'a animalpa rikch'ayninta kawsachinanpaq qhepakaq wak'a animalman atiyta qorqan, ahinapin chay wak'a animalpa rikch'ayninqa rimarirqan, chay rikch'ayta mana yupaychaqkunatataq lliwta wañuchinanpaq kamachirqan.

¹⁶Hinaspan llapan huch'uykunatapas, hatunkunatapas, qhapaqkunatapas, wakchakunatapas, kamachikunatapas, mana kamachikunatapas, paña makinkupi otaq mat'inkupi marcachirqan.

¹⁷Manan pipas rantiytapas qhatuytapas atirqanchu, aswanpas marcasqa kaqkunallan. Chay marcaqa wak'a animalpa sutinmi, otaq sutinpa numeron.

¹⁸Chayta entiendenanpaqmi runaqa yachayniyoq kanan. Yuyayniyoq kaqqa chay manchay wak'a animalpa numeronta yupachun, chayqa runaq numeronmi. Chay numeroqa soqta pachak soqta chunka soqtayoqmi.