Read Quechua Cuzco Bible 1988 APOCALIPSIS 16 Bible Online

APOCALIPSIS 16 - Quechua Cuzco Bible 1988 bible

APOCALIPSIS 16

¹Kunkayoq waqyakuqtan Dios yupaychana wasimanta uyarirqani. Chay kunkan qanchis angelkunata nirqan: Riychis, hinaspa hallp'a pachaman hich'aykamuychis Diospa k'arak phiñakuyninwan hunt'a chay qanchis hatun p'ukukunata, nispa.

²Hinan ñawpaqkaq angelqa rispan hallp'a pachaman hatun p'ukunta hich'aykurqan, hinan asnaq lleqthi ch'upu onqoy hamurqan, chaymi manchay wak'a animalpa marcan marcayoq runakunata, rikch'ayninta yupaychaqkunatawan hap'irqan.

³Iskaykaq angeltaq mama qochaman hatun p'ukunta hich'aykurqan, chaymi mama qochaqa wañuchisqa runaq yawarninman hina tukurqan, hinan mama qochapi lliw kawsaqkunaqa wañurarqanku.

⁴Kinsakaq angeltaq mayukunaman pukyukunamanwan hatun p'ukunta hich'aykurqan, hinan yawarman tukurqan.

⁵Chaymantataq unukunata kamachiq angelta uyarirqani: Señorníy, qanmi ñawpa kaqpas kunan kaqpas kanki, Ch'uya Diosmi kanki, chay hinata juzgasqaykiraykun chaninpuni kanki.

⁶Paykunaqa qanllapaqña kawsaqkunaq, profetakunaq*f** yawarnintan hich'arqanku, chaymi qanpas paykunaman yawarta ukyachillarqankitaq, chaytapunin paykunaqa chaskinanku, nispa nishaqta.

⁷Uyarillarqanitaqmi altarmanta huk kunkata: Arí, Tukuy-atiyniyoq Señor Diosníy, juzgasqaykikunaqa chaninmi cheqaqtaqmi, nispa nimushaqta.

⁸Tawakaq angeltaq intiman hatun p'ukunta hich'aykurqan, hinan intiqa atiyta chaskirqan runakunata ruphaykunanpaq.

⁹Hinaqtinmi runakunaqa intiq sinchi qanqeyninwan ruphasqa kaspa, chay manchay ñak'arichiykunata chayachimuq Diosta ñakarqanku, manataq huchankumanta Diosman kutirikurqankuchu payta hatunchanankupaq.

¹⁰Phisqakaq angeltaq manchay wak'a animalpa kamachikunan tiyanaman hatun p'ukunta hich'aykurqan, hinan kamachikushasqan suyuqa laqhayaykapurqan, chaymi runakunaqa nanaymanta qallunkutaraq k'utukurqanku.

¹¹Chaypas manan millaykuna ruwasqankuta saqepuspa Diosman kutirikurqankuchu, aswanmi hanaq pacha Diosta ñakarqanku nanayninkumanta lleqthi ch'upunkumantawan.

¹²Soqtakaq angeltaq Eufrates hatun mayuman hatun p'ukunta hich'aykurqan, hinan chay mayuqa ch'akipurqan, inti lloqsimuy lado reykunaq ñannin kapunanpaq.

¹³Chaymantataq rikurqani dragonpa*f** siminmanta, manchay wak'a animalpa siminmanta, llulla profetaq*f** siminmantawan kinsa millay espiritukuna k'ayraman rikch'akuq lloqsimushaqta.

¹⁴Chaykunaqa milagrokunata ruwaq supaykunaq espiritunmi, paykunan kay pachantinpi tiyaqkunaq reyninkunaman rinku, Tukuy-atiyniyoq Diospa hatun taripay p'unchayninpaq hatun maqanakuyman paykunata huñuykamunankupaq.

¹⁵Señor Jesucriston nirqan: ¡Uyariychis! Suwa hinan hamushani. Kusisamiyoqmi makilla suyashaqqa, p'achankunatapas waqaychaqqa, ama q'ala purinanpaq, p'enqaynintapas ama rikunankupaq, nispa.

¹⁶Chay reykunatan huñuykurqan Hebreo rimaypi Armagedón*f** nisqa cheqaspi.

¹⁷Qanchiskaq angeltaq wayraman hatun p'ukunta hich'aykurqan, hinan Dios yupaychana hanaq pacha wasipi kaq kamachikuy tiyanamanta kunkayoqta nimurqan: ¡Ruwasqañan! nispa.

¹⁸Chaymantataq illapakuna, kunununuykuna, t'oqyaykuna karqan, manchay-machaytataq pacha chhaphchikurqan, chay hina sinchi pacha chhaphchikuyqa manan hayk'aqpas karqanchu kay pachapi runakunaq kasqanmantapacha.

¹⁹Hinan hatun Babilonia llaqtaqa kinsaman ch'eqtakurqan, kay pachapi llapa llaqtakunapas thunikurqan. Hatun Babilonia llaqtamantataq Diosqa yuyarirqan, k'arak phiñakuyninwan hunt'a qerupi vinota llapachallanta ukyachinanpaq.

²⁰Llapa islakunan chinkapurqan, orqokunapas manan kapurqanchu.

²¹Hanaq pachamantataq runakunaman sinchi manchay chikchi chayamurqan huk quintal hina llasa. Chaymi runakunaqa chay chikchi ñak'arichiqtin Diosta ñakarqanku, chay ñak'arichiy sinchipuni kasqanrayku.