Read Quechua Cuzco Bible 1988 APOCALIPSIS 17 Bible Online

APOCALIPSIS 17 - Quechua Cuzco Bible 1988 bible

APOCALIPSIS 17

¹Qanchis hatun p'ukuyoq kaq qanchis angelkunamanta huknintaq hamuspa niwarqan: Hamuy, askha unu patapi tiyashaq sinchi millay rabona warmiq huchachasqa kasqanta rikuchisqayki.

²Paywanmi kay pachapi reykunaqa qhelli huchapi purirqanku, kay pachapi tiyaq runakunapas qhelli huchapi puriyninwanmi vinowan hina machaykurqanku, nispa.

³Chaymantataq Santo Espíritu kallpachaykuwaqtin hina ch'inneqman angelqa pusawarqan. Chaypin huk warmita rikurqani sansaq-puka manchay wak'a animalpi sillaykusqata. Chay wak'a animalmi qanchis umayoq chunka waqrayoq kasqa, Diospa contranpi rimay simikunawan hunt'a qelqasqataq kasqa.

⁴Chay warmiqa sani-puka p'achawan, sansaq-puka p'achawan p'achasqan kasqa, chay p'achataq qoriwan, umiña rumikunawan, perlakunawan sumaqchasqa kasqa. Makinpitaq hap'ishasqa qori qeruta millakuykunawan hunt'ata, qhellipi purisqankunawan hunt'ata.

⁵Mat'inpitaq sasa entiendena suti qelqasqa kasqa: Hatun Babilonia, rabonakunaqpas kay pachapi tukuy millakuykunaqpas maman, nisqa.

⁶Hinaspan chay warmita repararqani, Diospi iñiqkunaq yawarninwan, Jesuspa testigonkunaq yawarninwan ima machasqa kashaqta. Hinan payta rikuspa sinchitapuni muspharqani.

⁷Chaymi angelqa niwarqan: ¿Imanaqtintaq musphashanki? Ñoqan willasqayki chay warmimanta sasa entiendenata, warmita q'epiq qanchis umayoq chunka waqrayoq manchay wak'a animalmantapas.

⁸Chay wak'a animal rikusqaykiqa ñawpan karqan, kunanqa manan kanñachu, ichaqa chinkay-chinkay ukhumantan wicharimunqa, hinaspa wiñay chinkayman ripunqa. Kay pacha kamaymantapacha kawsaq qelqapi sutinku mana qelqasqa kaqkunataq chay manchay wak'a animalta rikuspanku musphanqaku. Chay wak'a animalmi ñawpa karqan, kunantaq manaña kapunchu, chaymantaqa kutimunqaraqmi.

⁹Entiendey atiqqa entiendechun: Chay qanchis umaqa warmiq tiyasqan qanchis orqokunan,

¹⁰hinallataq chay umakunaqa qanchis reykuna kanku. Chaykunamantan urmankuña phisqa, huknintaq kamachikushan, huknintaq manaraq hamunchu. Hamuspaqa pisi tiempollatan kamachikunqa.

¹¹Ñawpa karqan chay manchay wak'a animalqa manañan kapunchu, chayqa pusaqkaq reymi, payqa chay qanchisnintinmanta hukninmi, wiñay chinkaymantaq rishan.

¹²Chunka waqra rikusqaykiqa chunka reykunan, kamachinankupaq atiyta manaraq chaskiqkunan, ichaqa chaskinqakun atiyta chay manchay wak'a animalwan kuska reykuna hina pisi tiempollata kamachikunankupaq.

¹³Chay chunka reykunaqa huk yuyaynillayoqmi kanku, atiyninkutapas kamachikuyninkutapas manchay wak'a animalmanmi qonqaku.

¹⁴Chay reykunaqa Cordero contran paywan kashaqkuna contran maqanakunqaku, ichaqa Corderon paykunata atipanqa, señorkunaq Señornin, reykunaq Reynin kasqanrayku. Corderowan kashaqkunaqa Diospa waqyasqankunan akllasqankunan, paykunan iñiypi qaqata sayanku, nispa.

¹⁵Angelqa nillawarqantaqmi: Rabona warmiq tiyasqanpi rikusqayki askha unuqa llaqtakunan, askha runakunan, suyukunan, tukuy t'aqa rimaqkunan.

¹⁶Rikusqayki chunka waqrawan manchay wak'a animalpiwanmi rabona warmita cheqninqaku. Hinaspa qechunqaku, llat'ananqaku, aychantapas mikhunqaku, ninawantaq ruphaykuchinqaku.

¹⁷Diosmi sonqonkupi yuyaykachirqan paypa munayninta ruwanankupaq, ahinapin huk yuyaylla kaspa kamachikunanku atiyta manchay wak'a animalman qorqanku Diospa rimasqankuna hunt'akunankama.

¹⁸Chay rikusqayki warmiqa kay pacha reykunata kamachiq hatun llaqtan, nispa.